തിരുവനന്തപുരം: കേരളത്തിൽ റെക്കോർഡ് തിരുത്തി കുതിച്ചുയർന്ന് സ്വർണവില. ഇന്ന് പവന് 640 രൂപ വർദ്ധിച്ച് 87560 രൂപയായി. ഇതോടെ ഈ മാസം ഒന്നിന് രേഖപ്പെടുത്തിയ 87440 രൂപയെന്ന റെക്കോർഡാണ് ഇന്ന് തകർന്നത്. കുതിച്ചുയരുന്ന സ്വർണവില വിവാഹവിപണിയിൽ ഗുരുതര പ്രത്യാഘാതമുണ്ടാക്കും.
ഇന്നലെ രാവിലെ 480 രൂപ കുറഞ്ഞിരുന്നെങ്കിലും ഉച്ചയ്ക്ക് വീണ്ടും 360 രൂപ കൂടി.അന്താരാഷ്ട്ര വിപണിയിലും ആഭ്യന്തര വിപണിയിലും സ്വർണവില വർഷങ്ങളായി ഉയർന്ന നിലയിലാണ്. നിലവിൽ രാജ്യാന്തര വിപണിയിൽ ഔൺസിന് 42 ഡോളർ കയറി 3886 ഡോളറിലെത്തി. 3890 ഡോളർ വരെ എത്തിയ സന്ദർങങ്ങളും ഉണ്ടായിട്ടുണ്ട്. ഇന്ത്യൻ രൂപ ഡോളറിനെതിരെ 7 പൈസ താഴ്ന്ന് 88.78 രൂപയായിരുന്നു. ഇതും സ്വർണവിലയെ സ്വാധീനിച്ചു. സെപ്റ്റംബർ 30 രൂപയുടെ മൂല്യം ഏറ്റവും താഴ്ന്ന നിലയിൽ എത്തിടിരുന്നു. 88.80 രൂപയായിരുന്നു അന്നത്തെ എക്കാലത്തെയും താഴ്ന്ന രൂപയുടെ മൂല്യം.
കേരളത്തെ സംബന്ധിച്ചിടത്തോളം വിവാഹത്തിന് ഏറെ പ്രധാനമാണ് തുലാം മാസം. ഉയർന്ന സ്വർണവില വിവാഹം നടത്തുന്നതിൽ കുടുംബങ്ങൾക്ക് പ്രധാന വെല്ലുവിളിയാകാൻ സാധ്യതയേറെയാണ്. ഇന്ത്യയിലേയോ കേരളത്തിലേയോ ഏതെങ്കിലും മതാചാരങ്ങളുടെ ഭാഗമായല്ല സ്വർണത്തിന്റെ തൂക്കം വിവാഹത്തിന്റെ പ്രധാന ഘടകമായത്. വിവാഹങ്ങൾ അത്യാഡംബരമായി നടന്നെന്ന പ്രതീതിയുണ്ടാക്കാനായി വൻ സാമ്പത്തിക ബാധ്യത ഏറ്റെടുക്കാൻ പോലും ഇടത്തരം കുടുംബങ്ങൾ തയ്യാറാണ്. ഇതാണ് വിവാഹങ്ങളിൽ സ്വർണത്തിന്റെ അളവ് പ്രധാന ഘടകമായതിന് കാരണം. ഇത്തരത്തിൽ സ്വർണം സാധാരണ കുടുംബങ്ങൾക്ക് അനാവശ്യമായി സാമ്പത്തിക സമ്മർദം ഉണ്ടാക്കുന്നു.
ദൂരവ്യാപകമായ പ്രത്യാഘാതമാണ് സ്വർണ ഭ്രമവും എല്ലാ അതിരും ഭേദിച്ച സ്വർണവിലയും കേരള സമൂഹത്തിനുണ്ടാക്കുന്നത്. സാമൂഹികമായി പിന്നോക്കം നിൽക്കുന്ന കുടുംബങ്ങളിൽ വിവാഹത്തിന് സ്വർണം ഒരുക്കണമെന്ന കണക്കു കൂട്ടലിൽ പെൺകുട്ടികളുടെ വിദ്യാഭ്യാസത്തിലും മറ്റു ആവശ്യങ്ങളിലും കുറവു വരുത്തുന്നതായി കാണാം. സ്വർണം അവശ്യ വസ്തുവാണെന്ന തരത്തിൽ സ്വർണക്കടകൾ വ്യാജ പ്രചരണം നടത്തുന്നു. മാർക്കറ്റിങ്ങിന്റെ ഭാഗമായി പെൺകുട്ടികളുള്ള കുടുംബങ്ങളിൽ എത്തുകയും തവണ വ്യവസ്ഥയിൽ പണപ്പിരിവ് നടത്തി സ്വർണം വിൽക്കുകയും ചെയ്യുന്നു. സ്കൂൾ വിദ്യാർത്ഥിനികൾ ആയിരിക്കുമ്പോൾ തന്നെ പെൺകുട്ടികൾ ഇത്തരം കെണികളിൽ പെടുന്നതിനാൽ വിദ്യാഭ്യാസച്ചിലവുകൾ എങ്ങിനെ കണ്ടെത്തുമെന്നത് പലപ്പോഴും ചോദ്യ ചിഹ്നമാകുന്നു.
