ഡൽഹി: ഭീകരതയെ കൈവിട്ടില്ലെങ്കിൽ പാക്കിസ്ഥാൻ ഭൂപടത്തിൽ ഉണ്ടാവില്ലെന്ന് മുന്നറിയിപ്പുമായി കരസേനാ മേധാവി ജനറൽ ഉപേന്ദ്ര ദ്വിവേദി. ഭീകരവാദികളെ കയറ്റുമതി ചെയ്യുന്നത് നിർത്താൻ തയ്യാറായില്ലെങ്കിൽ ഓപ്പറേഷൻ സിന്ദൂറിന്റെ രണ്ടാം ഭാഗം ഉണ്ടാകുമെന്നും ഉപേന്ദ്ര ദ്വിവേദി പറഞ്ഞു. പാക്കിസ്ഥാനിലെ അനുപ്ഗഡിൽ ഒരു സൈനിക പോസ്റ്റിൽ സംസാരിക്കുകയായിരുന്നു അദ്ദേഹം.
ഇനിയൊരു വിട്ടുവീഴ്ചയ്ക്കും ഇന്ത്യ തയ്യാറാവില്ലെന്ന് അദ്ദേഹം പറയുന്നു. ഓപ്പറേഷൻ സിന്ദൂർ 1.0 യിൽ ഉണ്ടായിരുന്ന സംയമനം ഇനിയൊരു തവണ പ്രതീക്ഷിക്കേണ്ടതില്ല. ഭീകരവാദം തുടർന്നാൽ ഭൂപടത്തിൽ തങ്ങളുടെ സ്ഥാനം നിലനിർത്തണോ വേണ്ടയോ എന്ന് പാക്കിസ്ഥാനെക്കൊണ്ട് ചിന്തിപ്പിക്കുന്ന നടപടിയുണ്ടാകും. ഭീകരതയെ സർക്കാർ സ്പോൺസർ ചെയ്യുന്നത് അവസാനിപ്പിക്കണം. ജനറൽ ഉപേന്ദ്ര ദ്വിവേദി പറഞ്ഞു.
ഓപ്പറേഷൻ സിന്ദൂറിൽ പാക്കിസ്ഥാന് നഷ്ടപ്പെട്ടത് 10 വിമാനങ്ങളാണെന്ന് വ്യോമസേനാ മേധാവിയും ഓർമിപ്പിച്ചിരുന്നു. അഞ്ച് പാക് യുദ്ധവിമാനങ്ങളെ ഇന്ത്യ വെടി വെച്ചിട്ടതായും ഇന്ത്യയുടെ വ്യോമ പ്രതിരോധ സംവിധാനങ്ങളുപയോഗിച്ച് പാക്കിസ്ഥാൻ വ്യോമ താവളങ്ങളിൽ സൂക്ഷിച്ചിരുന്ന മറ്റ് അഞ്ച് വിമാനങ്ങൾ കൂടി തകർത്തതായും വ്യോമസേനാ മേധാവി എയർ ചീഫ് മാർഷൽ എ.പി സിങ് നേരത്തേ പ്രതികരിച്ചിരുന്നു.
93-ാമത് വ്യോമസേനാ ദിനാഘോഷത്തോടനുബന്ധിച്ച് സംസാരിക്കവെയായിരുന്നു വ്യോമസേനാ മേധാവി ഇക്കാര്യം വ്യക്തമാക്കിയത്. ഇതിനു പിന്നാലെ കരസേനാ മേധാവിയുടെ മുന്നറിയിപ്പും പുറത്തു വരികയായിരുന്നു.
