ഡൽഹി: വീടുകളിൽ എത്തി വോട്ടർമാരെ ചേർത്ത് കരട് വോട്ടർ പട്ടിക പുറത്തിറക്കാനുള്ള സമയപരിധി നീട്ടി. അന്തിമ കരട് പട്ടിക ഡിസംബർ 16നാകും പുറത്തിറക്കുക. ഡിസംബർ ഒമ്പതായിരുന്നു നേരത്തേ കരടു പട്ടിക പുറത്തിറക്കാനുള്ള തീയതി. ഡിസംബർ 4 വരെയായിരുന്ന എസ്ഐആർ ഫോമുകൾ തിരികെ വാങ്ങി അപ്‍ലോഡ് ചെയ്യാനുള്ള സമയവും ഒരാഴ്ച നീട്ടിയിട്ടുണ്ട്. ഡിസംബർ 11 വരെയാണ് എസ്ഐആർ ഫോം തിരികെ വാങ്ങാനുള്ള പുതുക്കിയ സമയപരിധി.
രേഖകൾ തിരികെ വാങ്ങാനുള്ള അവസാന തീയതി അവസാനിക്കാൻ നാലു ദിവസം മാത്രം ബാക്കി നിൽക്കെയാണ് കേരളമടക്കമുള്ള 12 സംസ്ഥാനങ്ങളിൽ തീവ്ര വോട്ടർപട്ടിക പരിഷ്കരണവുമായി ബന്ധപ്പെട്ട സമയക്രമത്തിൽ മാറ്റം വരുത്തി കേന്ദ്ര തെരഞ്ഞെടുപ്പ് കമ്മീഷൻ രംഗത്തെത്തിയത്. കേരളത്തിലും പശ്ചിമബംഗാളിലും അമിതഭാരം താങ്ങാനാകാതെ ബിഎൽഒമാർ ആത്മഹത്യ ചെയ്തതും കഴിഞ്ഞ ദിവസങ്ങളിൽ ചർച്ചയായിരുന്നു. ഫെബ്രുവരി 14 നാകും തെരഞ്ഞെടുപ്പ് കമ്മീഷൻ തീവ്ര വോട്ടർ പട്ടികപരിഷ്കരണത്തിനു ശേഷം അന്തിമ വോട്ടർ പട്ടിക പ്രസിദ്ധീകരിക്കുക.
