തിരുവനന്തപുരം: ഡിറ്റ് വാ ചുഴലിക്കാറ്റിൻ്റെ ഭാഗമായി കേരളത്തിൽ ഇന്ന് മഴമേഘങ്ങളും തണുത്ത കാലാവസ്ഥയും ഉണ്ടാകുമെന്ന് കാലാവസ്ഥാ നിരീക്ഷണ കേന്ദ്രം അറിയിച്ചു. പരക്കെ മഴ സാധ്യതയുണ്ടെന്നും മുന്നറിയിപ്പുണ്ട്. പ്രത്യേക അലേർട്ടുകളൊന്നും ഇല്ലെങ്കിലും ഒറ്റപ്പെട്ടയിടങ്ങളിൽ ശക്തമായ മഴ ലഭിച്ചേക്കുമെന്ന് അറിയിപ്പുണ്ട്.
രണ്ടു ദിവസമായി മഴ മേഘങ്ങൾ കേരളത്തിന്റെ അന്തരീക്ഷത്തിൽ തുടരുന്നതാണ് പകൽ സമയത്തുപോലും തണുത്ത കാലാവസ്ഥയ്ക്ക് കാരണം. തിരുവനന്തപുരം, കൊല്ലം, പത്തനംതിട്ട അടക്കമുള്ള തെക്കൻ ജില്ലകളിൽ പകൽ സമയങ്ങളിൽ മൂടിക്കെട്ടിയ കാലാവസ്ഥയും തണുപ്പും അനുഭവപ്പെടുകയും ഉച്ചയോടെ മഴമേഘങ്ങൾ നീങ്ങി തണുപ്പ് കുറയുകയും ചെയ്യും. വടക്കൻ കേരളത്തിൽ രാത്രിയും പുലർച്ചെയുമാണ് തണുപ്പ് അനുഭവപ്പെടുന്നത്.
