കോഴിക്കോട്: കൊയിലാണ്ടി എംഎൽഎയും സിപിഎം നേതാവുമായ കാനത്തിൽ ജമീല(59) അന്തരിച്ചു. കോഴിക്കോട്ടെ സ്വകാര്യ ആശുപത്രിയിൽ അർബുദരോഗത്തെത്തുടർന്ന് ചികിത്സയിലായിരുന്നു. മലബാറിലെ ആദ്യ മുസ്ലിം വനിത എംഎൽഎയാണ് കാനത്തിൽ ജമീല.
1966 മെയ് 5 ന് കേരളത്തിലെ കോഴിക്കോട് ജില്ലയിലെ കുറ്റിയാടി ഗ്രാമത്തിൽ ടികെ അലിയുടെയും ടികെ മറിയത്തിന്റെയും മകളായി ജനിച്ച കാനത്തിൽ ജമീല സാമൂഹികമായി സജീവമായ തന്റെ കുടുംബ പാശ്ചാത്തലത്തിലായിരുന്നു വളർന്നത്. സമൂഹജീവിതവും പൊതുസേവനവും വളരെ നേരത്തെ തന്നെ അവരുടെ ജീവിതത്തിന്റെ ഭാഗമായി. വിദ്യാഭ്യാസകാലത്ത് തന്നെ, സാമൂഹിക പ്രവർത്തനങ്ങളിലും സ്ത്രീകളെയും കുട്ടികളെയും ബാധിക്കുന്ന പ്രാദേശിക വിഷയങ്ങളിലും അവർ ഇടപെട്ടിരുന്നു.
വിവാഹിതയായതോടെയാണ് തലക്കുളത്തൂർ പഞ്ചായത്തിൽ എത്തുന്നത്. 1995 ൽ ആദ്യമായി തലക്കുളത്തൂർ ഗ്രാമപഞ്ചായത്ത് അംഗമായതോടെയാണ് കാനത്തിൽ ജമീല രാഷ്ട്രീയത്തിലേക്ക് ചുവടുവെച്ചു. 1996 ൽ തന്നെ പഞ്ചായത്ത് പ്രസിഡന്റ് സ്ഥാനത്തെത്താനും ജമീലയ്ക്ക് കഴിഞ്ഞു. പിന്നീട് ചേളന്നൂർ ബ്ലോക്ക് പഞ്ചായത്ത് പ്രസിഡൻറ് സ്ഥാനമായിരുന്നു ജമീലയെ തേടിയെത്തിയത്. ജില്ലാ പഞ്ചായത്ത് പ്രസിഡൻറ് സ്ഥാനവും പിന്നീട് 2021 ൽ കൊയിലാണ്ടിയിൽ എംഎൽഎ സ്ഥാനവും ജമീലയ്ക്ക് ലഭിച്ചു.
ദേശീയപാത നിർമ്മാണവുമായി ബന്ധപ്പെട്ട് പരിസരവാസികളുടെ വഴിയും കുടിവെള്ളവും തടസ്സപ്പെട്ടതോടെ ശക്തമായ പ്രതികരണവുമായി കാനത്തിൽ ജമീല അടുത്തിടെ രംഗത്തുവന്നിരുന്നു. നേരത്തേ നിയമസഭാ സമ്മേളനത്തിനിടെ ശാരീരിക അസ്വസ്ഥതകൾ ഉണ്ടായതിനെ തുടർന്ന് നടത്തിയ പരിശോധനയിൽ ജമീലയ്ക്ക് കാൻസർ സ്ഥിരീകരിച്ചിരുന്നു.
സിപിഎമ്മിന് മികച്ച നേതാവിനെയാണ് നഷ്ടമായതെന്ന് സംസ്ഥാന സെക്രട്ടറി എം വി ഗോവിന്ദൻ പറഞ്ഞു. രോഗത്തോട് പോരാടി ജീവിതത്തിലേക്ക് മടങ്ങി വരുമ്പോഴാണ് ഈ മരണം. പരിപാടികളിൽ പങ്കെടുത്തു തുടങ്ങിയിരുന്നു. നല്ല പെരുമാറ്റത്തിലൂടെ ജന ഹൃദയങ്ങളിൽ സ്ഥാനം നേടിയ ആളാണ് കാനത്തിൽ ജമീല. പഞ്ചായത്ത് മെമ്പറായി തുടങ്ങി എംഎൽഎ വരെ ആയി മികച്ച പ്രവർത്തനം നടത്തി. നിയമസഭയിലും മികവാർന്ന പ്രകടനം. എംവി ഗോവിന്ദൻ അനുസ്മരിച്ചു. സൗമ്യതയോടെ ഇടപെടുന്ന രീതിയായിരുന്നു കാനത്തിൽ ജമീലക്ക് എന്ന് മന്ത്രി മുഹമ്മദ് റിയാസ് അനുസ്മരിച്ചു. ന്യൂനപക്ഷ വിഭാഗത്തിൽ നിന്നും താഴെ തട്ടിൽ പാർട്ടി പ്രവർത്തനം നടത്തിവന്ന നേതാവാണ് കാനത്തിൽ ജമീലയെന്ന് സിപിഎം കോഴിക്കോട് ജില്ലാ സെക്രട്ടറി എം മെഹബൂബ് അനുസ്മരിച്ചു. കൊയിലാണ്ടി എംഎൽഎയും സിപിഐ എം കോഴിക്കോട് ജില്ലാ കമ്മറ്റിയംഗവുമായ കാനത്തിൽ ജമീലയുടെ നിര്യാണം അത്യന്തം ദുഃഖകരമാണെന്നും ജനകീയ പ്രശ്നങ്ങളിൽ സജീവമായി ഇടപെട്ടിരുന്ന നേതാവായിരുന്നുവെന്നും മുഖ്യമന്ത്രി പിണറായി വിജയൻ അനുസ്മര കുറിപ്പിൽ പറഞ്ഞു.
കൊയിലാണ്ടി എംഎൽഎയുടെ മൃതദേഹം ചൊവ്വാഴ്ച രാവിലെ കോഴിക്കോട് ജില്ലാ കമ്മിറ്റി ഓഫീസിലും ശേഷം കൊയിലാണ്ടി ടൗൺഹാളിലും പൊതുദർശനത്തിന് വെക്കും. സംസ്കാരം ചൊവ്വാഴ്ച നടക്കും. ഔദ്യോഗിക ബഹുമതികളോടെ അത്തോളി കുനിയിൽക്കടവ് ജുമമസ്ജിദിലാണ് സംസ്കാരം.
