ഗാസ: 2023 ഒക്ടോബർ 7-നു ശേഷം ഇതുവരെ ഗാസയിൽ കൊല്ലപ്പെട്ടവരുടെ എണ്ണം 70000 കടന്നു. വെടി നിർത്തലിന് ശേഷവും 352 പേർ കൊല്ലപ്പെട്ടതായി റിപ്പോർട്ട്. കഴിഞ്ഞ ദിവസവും രാത്രി ഇസ്രയേൽ നടത്തിയ ഡ്രോൺ ആക്രമണത്തിൽ സഹോദരങ്ങളായ രണ്ടു കുട്ടികൾ കൊല്ലപ്പെട്ടതായി ഗാസയിലെ ഹമാസ് നിയന്ത്രണത്തിലുള്ള ആരോഗ്യമന്ത്രാലയം അറിയിച്ചിരുന്നു. വിഷയത്തിൽ ഇസ്രായെൽ ഇതുവരെ പ്രതികരിച്ചിട്ടില്ല.
വെടിനിർത്തൽ കരാർ ലംഘിക്കുന്ന ഭീകരവാദികളെ ലക്ഷ്യമിട്ടാണ് തങ്ങൾ ആക്രമണം നടത്തുന്നതെന്നാണ് ഇസ്രയേൽ വാദം. ഭീകരവാദികൾ സൈനികർക്കുനേരെ വെടിയുതിർത്തുവെന്നും ആറു പേർക്ക് പരിക്കേറ്റതായും ഇസ്രയേൽ ആരോപിക്കുന്നു. അതേസമയം ലെബനനിലും ഇസ്രയേൽ ആക്രമണം ശക്തമാക്കിയിട്ടുണ്ട്. സിറിയയിലും ഇസ്രയേൽ സൈന്യം ആക്രമണം നടത്തുന്നതായി ചില റിപ്പോർട്ടുകൾ പുറത്തുവന്നിട്ടുണ്ട്. സിറിയയിൽ 13 പേരാണ് ഇസ്രായേലിന്റെ ആക്രമണത്തിൽ കൊല്ലപ്പെട്ടത്.
ഒരു മാസത്തിനു മുമ്പ് ഗാസയിലെ അൽ-ഷിഫ ആശുപത്രിയടക്കമുള്ള സ്ഥലങ്ങൾക്കു നേരെ ഐഡിഎഫ് ആക്രമണം നടത്തിയതായി അന്തർദേശീയ മാധ്യമങ്ങൾ റിപ്പോർട്ട് ചെയ്തിരുന്നു. ഇസ്രയേൽ സൈനികനെ ആക്രമിച്ചതായി ഞങ്ങൾക്കറിയാമെന്നും അതാണ് കാരണമെന്നുമായിരുന്നു യുഎസ് വൈസ് പ്രസിഡന്റ് ആക്രമണത്തെക്കുറിച്ച് അന്ന് പ്രതികരിച്ചത്.
