തിരുവനന്തപുരം: എച്ച്ഐവി ബാധിതരുടെ എണ്ണത്തിൽ സംസ്ഥാനത്ത് വർദ്ധന. കഴിഞ്ഞവർഷം സംസ്ഥാനത്ത് 1213 പേർക്ക് എച്ച്ഐവി രോഗബാധ സ്ഥിരീകരിച്ചു. സംസ്ഥാനത്താകെ 23,608 എച്ച്ഐവി ബാധിതരാണുള്ളത്.
പുതുതായി അണുബാധയുണ്ടാകുന്ന 15 -നും 24 -നും ഇടയിൽ പ്രായമുള്ളവരുടെ എണ്ണവും കൂടിവരുകയാണ്. 2022- 23-ൽ ഈ പ്രായപരിധിയിൽപ്പെടുന്നവരുടെ എണ്ണം 2124 ആയിരുന്നു. 2025 ഏപ്രിൽ മുതൽ ഒക്ടോബർവരെ ഇത് 3635 ആയി ഉയർന്നു.
കഴിഞ്ഞ മൂന്നുവർഷത്തിനിടെ 4477 പേരിലാണ് പുതുതായി രോഗം സ്ഥിരീകരിച്ചത്. ഇതിൽ 3393 പുരുഷൻമാരും 1065 സ്ത്രീകളും 19 ട്രാൻസ്‌ജെൻഡർ വ്യക്തികളും ഉൾപ്പെടുന്നു. 62.6 ശതമാനത്തിന് അണുബാധ ഉണ്ടായത് ഒന്നിലധികം പങ്കാളികളുമായി സുരക്ഷിതമല്ലാത്ത ലൈംഗികബന്ധം വഴിയാണ്. 24.6 ശതമാനത്തിന് സ്വവർഗരതിയിലൂടെയും 8.1 ശതമാനത്തിന് സൂചി പങ്കിട്ടുള്ള മയക്കുമരുന്ന് ഉപയോഗത്തിലൂടെയും രോഗം പകർന്നു.
