ബംഗളൂരു: കർണാടകയിൽ വീണ്ടും അധികാര പോരാട്ടത്തിന് തുടക്കം കുറിച്ചുകൊണ്ട് അതൃപ്തി പരസ്യമാക്കിയിരിക്കുകയാണ് ഉപമുഖ്യമന്ത്രി ഡികെ ശിവകുമാർ. ചൊവ്വാഴ്ച തന്റെ മണ്ഡലമായ കനക്പുര സന്ദർശിച്ചപ്പോഴായിരുന്നു ഡികെ ശിവകുമാർ അതൃപ്തി പ്രകടമാക്കിയത്. മുഖ്യമന്ത്രി സ്ഥാനവുമായി ബന്ധപ്പെട്ട് അഞ്ചാറ് കോൺഗ്രസുകാർക്കിടയിൽ ഒരു രഹസ്യ കരാർ ഉണ്ടായിരുന്നുവെന്ന് ശിവകുമാർ പറഞ്ഞു. എന്നാൽ പാർട്ടിയെ ദുർബലപ്പെടുത്താതിരിക്കാൻ അതിനെക്കുറിച്ച് കൂടുതൽ പറയാൻ ആഗ്രഹിക്കുന്നില്ലെന്നും അദ്ദേഹം കൂട്ടിച്ചേർത്തു.
“എന്നെ മുഖ്യമന്ത്രിയാക്കാൻ ഞാൻ ആവശ്യപ്പെട്ടിട്ടില്ല. ഞങ്ങൾ അഞ്ചും ആറും പേർ തമ്മിലുള്ള രഹസ്യ കരാറാണിത്. ഇതിനെക്കുറിച്ച് പരസ്യമായി സംസാരിക്കാൻ ഞാൻ ആഗ്രഹിക്കുന്നില്ല. ഞാൻ എന്റെ മനസ്സാക്ഷിയിൽ വിശ്വസിക്കുന്നു. നമ്മൾ നമ്മുടെ മനസ്സാക്ഷിക്കു നിരക്കും വിധം പ്രവർത്തിക്കണം. പാർട്ടിക്ക് ഒരു തരത്തിലും നാണക്കേട് ഉണ്ടാക്കാനും അതിനെ ദുർബലപ്പെടുത്താനും ഞാൻ ആഗ്രഹിക്കുന്നില്ല. പാർട്ടി ഉണ്ടെങ്കിൽ, ഞങ്ങൾ അവിടെയുണ്ട്. പ്രവർത്തകർ ഉണ്ടെങ്കിൽ, ഞങ്ങൾ അവിടെയുണ്ട്.”-കർണാടക ഉപമുഖ്യമന്ത്രി ശിവകുമാർ പറഞ്ഞു
വിഷയത്തിൽ ‘ആശയക്കുഴപ്പം ഒഴിവാക്കാനായി’ എന്ന പേരിൽ മുഖ്യമന്ത്രി സിദ്ധരാമയ്യ കോൺഗ്രസ് കേന്ദ്ര നേതൃത്വത്തോട് തീരുമാനമെടുക്കാൻ ആവശ്യപ്പെട്ടതിനു തൊട്ടു പിന്നാലെയായിരുന്നു ഡികെ ശിവകുമാറും അദ്ദേഹത്തിന്റെ പ്രസ്താവനകളുമായി രംഗത്തെത്തിയിരിക്കുന്നത്.
കർണാടക നിയമസഭാ തിരഞ്ഞെടുപ്പിൽ 2023 മാർച്ചിൽ കോൺഗ്രസ് വിജയം നേടി. അന്നുതന്നെ പാർട്ടിയുടെ കേന്ദ്ര നേതൃത്വത്തിന്റെ അനുമതിയോടെ രണ്ടര വർഷത്തെ സിദ്ധാരാമയ്യയുടെ ഭരണത്തിന് ശേഷം ശിവകുമാറിന് അധികാരം കൈമാറണമെന്ന് ധാരണയായതായി വാർത്തകൾ പ്രചരിച്ചിരുന്നു. അടുത്തിടെ മന്ത്രിസഭാ പുനഃസംഘടനയെക്കുറിച്ച് സംസാരിച്ച മുഖ്യമന്ത്രി സിദ്ധാരാമയ്യ താൻ ചുമതലയിൽ തുടരുമെന്ന നിലപാടിൽ ഉറച്ചുനിന്നതോടെയാണ് മുമ്പുണ്ടായ കരാറിനെക്കുറിച്ചുള്ള ചർച്ചകൾ വീണ്ടും സജീവമായത്.
2023 മാർച്ചിൽ കോൺഗ്രസ് ദേശീയ അധ്യക്ഷൻ മല്ലികാർജുൻ ഖാർഗെയുടെ വസതിയിൽ വെച്ച് ചേർന്ന രഹസ്യ യോഗത്തിൽ സിദ്ധരാമയ്യ, ശിവകുമാർ, ഖാർഗെ, ജനറൽ സെക്രട്ടറി (സംഘടന) കെസി വേണുഗോപാൽ, എഐസിസി ജനറൽ സെക്രട്ടറി രൺദീപ് സുർജേവാല എന്നിവരുടെ സാന്നിധ്യത്തിൽ മുഖ്യമന്ത്രി സ്ഥാനം സംബന്ധിച്ച് ധാരണയിലെത്തിയിരുന്നതായി കോൺഗ്രസിനോട് അടുത്ത ചില വൃത്തങ്ങൾ പറയുന്നു.
എന്നാൽ ഈ വർഷം ജൂലൈ 2 ന് താൻ “മുഴുവൻ കാലാവധിയും മുഖ്യമന്ത്രിയായി തുടരും” എന്ന് സിദ്ധാരാമയ്യ പ്രഖ്യാപിച്ചതോടെയാണ് ധാരണയിൽ നിന്ന് പിന്നോട്ടു പോയെന്ന് മനസ്സിലാക്കാൻ കഴിഞ്ഞത്. ജൂലൈ 5 മുതൽ നവംബർ 21 വരെ അദ്ദേഹം ഈ നിലപാട് ആവർത്തിച്ചു. എന്നാൽ കഴിഞ്ഞ നവംബർ 22 ന് ബെംഗളൂരുവിൽ ഖാർഗെയുമായി രാത്രി വൈകി നടത്തിയ കൂടിക്കാഴ്ചയ്ക്ക് ശേഷം അദ്ദേഹത്തിന്റെ നിലപാടിൽ മാറ്റം വന്നു. മണിക്കൂറുകൾക്കുള്ളിൽ, “അധികാരം പങ്കിടൽ വിഷയത്തിൽ ഹൈക്കമാൻഡ് തീരുമാനമെടുക്കും” എന്ന് അദ്ദേഹം പറഞ്ഞു, രണ്ട് ദിവസത്തിന് ശേഷം “ഹൈക്കമാൻഡ് ആഗ്രഹിക്കുന്നുവെങ്കിൽ ഞാൻ തുടരും” എന്നായി സിദ്ധാരാമയ്യയുടെ പ്രതികരണം.
കഴിഞ്ഞ ദിവസം പാർട്ടി നേതൃത്വത്തെ സ്വാധീനിക്കാനായി കോൺഗ്രസ് എംഎൽമാർ ഡൽഹിയിലേക്ക് പോയ വിഷയത്തിൽ പ്രതികരണമാവശ്യപ്പെട്ട മാധ്യമപ്രവർത്തകരോട് ഇക്കാര്യത്തിൽ സിദ്ധാരാമയ്യ വ്യക്തത വരുത്തി. ആശയക്കുഴപ്പമില്ലാതിരിക്കാൻ ഹൈക്കമാന്റ് തീരുമാനം ഉണ്ടാകട്ടെയെന്നായിരുന്നു അദ്ദേഹത്തിന്റെ പ്രതികരണം. “അവരെ പോകട്ടെ. എംഎൽഎമാർക്ക് ഡൽഹിയിലേക്ക് പോകാൻ സ്വാതന്ത്ര്യമുണ്ട്. അവരുടെ അഭിപ്രായം എന്താണെന്ന് നമുക്ക് നോക്കാം. ആത്യന്തികമായി, ഹൈക്കമാൻഡാണ് തീരുമാനിക്കുന്നത്. അവർക്ക് എന്താണ് വേണ്ടതെന്ന് അവർ പറയട്ടെ. ആത്യന്തികമായി, ഈ ആശയക്കുഴപ്പത്തിന് പൂർണ്ണ വിരാമമിടാൻ, ഹൈക്കമാൻഡ് ഒരു തീരുമാനം എടുക്കണം.”- സിദ്ധാരാമയ്യ പറഞ്ഞു
എന്നാൽ മുഖ്യമന്ത്രി സിദ്ധരാമയ്യയുമായി അടുപ്പമുള്ളവർ പറയുന്നത് മുഖ്യമന്ത്രി സ്ഥാനവുമായി ബന്ധപ്പെട്ട്യാതൊരു ധാരണയും ഉണ്ടായിട്ടില്ലെന്നാണ്. അതേസമയം കർണാടകയിലെ നേതൃമാറ്റ വിഷയം പരസ്യമായി ചർച്ച ചെയ്യേണ്ട ഒന്നല്ലെന്ന് കോൺഗ്രസ് അധ്യക്ഷൻ മല്ലികാർജുൻ ഖാർഗെ ചൊവ്വാഴ്ച പ്രതികരിച്ചു.
