ഡൽഹി: ജനപ്രിയ ഓൺലൈൻ വീഡിയോ കോൾ, മീറ്റിംഗ് പ്ലാറ്റ്‌ഫോമായ ഗൂഗിൾ മീറ്റ് ബുധനാഴ്ച ഇന്ത്യയിലെ നിരവധി ഉപയോക്താക്കൾക്ക് പ്രവർത്തനരഹിതമായി. പ്ലാറ്റ്‌ഫോമിലെ ഓൺലൈൻ മീറ്റിംഗുകളിൽ ചേരുന്നതിനിടെ ഉപയോക്താക്കൾക്ക് വ്യാപകമായി തടസ്സങ്ങൾ നേരിട്ടുവെന്നാണ് റിപ്പോർട്ടുകൾ.
ഔട്ടേജ് മോണിറ്ററിംഗ് പ്ലാറ്റ്‌ഫോമായ ഡൗൺഡിറ്റക്ടറിന്റെ റിപ്പോർട്ടനുസരിച്ച് ഉച്ചയ്ക്ക് 12:29 വരെ ഇന്ത്യയിൽ കുറഞ്ഞത് 1,760 പേരെങ്കിലും ഗൂഗിൾ മീറ്റിൽ പ്രശ്‌നങ്ങൾ ഉള്ളതായി ഓൺലൈനിൽ റിപ്പോർട്ട് ചെയ്തിട്ടുണ്ട്. മിക്ക ഉപഭോക്താക്കൾക്കും വെബ്‌സൈറ്റ് വഴി ഗൂഗിൾ മീറ്റ് മീറ്റിംഗുകളിൽ ജോയിൻ ചെയ്യാൻ കഴിഞ്ഞില്ലെന്നാണ് പരാതി.
ഗൂഗിൾ മീറ്റ് മീറ്റിംഗുകളിൽ ജോയിൻ ചെയ്യാൻ ശ്രമിക്കുന്ന ഉപഭോക്താക്കൾക്ക് ‘502’ എന്ന എറർ മെസേജാണ് ലഭിച്ചത്. 30 സെക്കന്റിനു ശേഷം വീണ്ടും ശ്രമിക്കുവാനാണ് ‘എറർ സന്ദേശ’ത്തിലെ നിർദേശം. എന്നാൽ തുടർന്നുള്ള ശ്രമങ്ങളിലും ഇതേ സന്ദേശം മാത്രമാണ് ഉപഭോക്താക്കൾക്ക് ലഭിച്ചത്.
സമൂഹമാധ്യമങ്ങളിൽ ഗൂഗിൾ മീറ്റിനെതിരെ വ്യാപക വിമർശനമാണ് ഉയർന്നത്. പലർക്കും പ്രധാനപ്പെട്ട മീറ്റിങ്ങുകൾ നടത്താനായില്ലെന്നതാണ് വിമർശനത്തിലേക്ക് നയിച്ചത്. മിക്കവരും എക്സിലാണ് പരാതികൾ പോസ്റ്റു ചെയ്തിരിക്കുന്നത്. തന്റെ ഓഫീസിലെ ഒരാൾക്ക് ഗൂഗിൾ മീറ്റ് കിട്ടുന്നുണ്ടെന്നും തനിക്കു കിട്ടുന്നില്ലെന്നും ഒരാൾ പറയുന്നു. ഇത്ര വലിയ പ്ലാറ്റ്ഫോം പണിമുടക്കിയാൽ എന്തു ചെയ്യുമെന്നാണ് മറ്റൊരാൾ ചോദിക്കുന്നത്. ഗൂഗിൾ മീറ്റ് ജോയിൻ ചെയ്യുന്നതിൽ എന്ത് പ്രശ്നമാണുണ്ടായതെന്നതിൽ ഇതുവരെ വിശദീകരണമൊന്നും പുറത്തുവന്നിട്ടില്ല.
