കോഴിക്കോട്: സമസ്ത-മുസ്ലീം ലീഗ് തർക്കത്തിന് കാരണം ജമാ അത്തെ ഇസ്ലാമി ബന്ധമെന്ന് സൂചിപ്പിച്ച് ഹമീദ് ഫൈസി. സമസ്തയിലെ പ്രശ്നങ്ങളുടെ പാശ്ചാത്തലം പരിശോധിച്ചാൽ ഒരു വിഭാഗം ജമാഅത്തെ ഇസ്ലാമിയുമായി ഉണ്ടാക്കാൻ ശ്രമിക്കുന്ന ബന്ധമാണെന്ന് വ്യക്തമാകുമെന്നാണ് സമസ്ത നേതാവ് പറയുന്നത്. ജമാ അത്തെ ഇസ്ലാമി ഇന്ത്യയിലെ ജനാധിപത്യ വ്യവസ്ഥിതിയോട് സഹകരിച്ചു പോകാത്തവാരാണെന്നും എന്നാൽ തെരഞ്ഞെടുപ്പിൽ ജയിക്കാൻ അവർ ഏത് വഴിയും സ്വീകരിക്കുമെന്നും അദ്ദേഹം പറഞ്ഞു.
‘സമസ്തയിലെ പ്രശ്നങ്ങളുടെ പിന്നാമ്പുറം പരിശോധിച്ചാൽ തെളിയുന്ന ചിത്രം ഒരു വിഭാഗം ജമാഅത്തെ ഇസ്ലാമിയുമായി പുതിയ ചില ബന്ധങ്ങൾ ഉണ്ടാക്കാൻ ശ്രമിക്കുന്നതാണെന്ന് കണ്ടെത്താനാകും’- അദ്ദേഹം പറഞ്ഞു. രാഷ്ട്രീയ പാർട്ടി രൂപീകരിച്ച് ജമാ അത്തെ ഇസ്ലാമി മുന്നണികൾക്കൊപ്പം തെരഞ്ഞെടുപ്പിൽ മത്സരിക്കുന്നത് ഗുരുതരമായി കാണേണ്ടിയിരിക്കുന്നുവെന്നും ലക്ഷ്യ സാക്ഷാത്കാരത്തിന് ഏതു വഴിയും അവർ സ്വീകരിക്കുമെന്നും അദ്ദേഹം പറഞ്ഞു.
ജമാ അത്തെ ഇസ്ലാമിയെ മത നവീകരണ വാദികളെന്നു വിശേഷിപ്പിച്ച ഹമീദ് ഫൈസി അവരുമായി അകലം പാലിക്കണമെന്ന സമസ്തയുടെ പ്രഖ്യാപിത നിലപാടിൽ നിന്ന് പിന്നോട്ടു പോയാൽ അപകടമാണെന്നും മുന്നറിയിപ്പ് നൽകുന്നു. ‘മത നവീകരണ വാദികളുമായി അകലം പാലിക്കണമെന്ന സമസ്തയുടെ പ്രഖ്യാപിത നിലപാടിൽ വെള്ളം ചേർക്കാൻ ശ്രമിക്കുന്നത് അപകടകരമാണ്. ജമാഅത്ത്-ബ്രദർഹുഡ് ആശയങ്ങൾക്ക് മുസ്ലീങ്ങളിൽ സ്വാധീനം ചെലുത്താൻ വഴിയൊരുക്കി കൊടുക്കലായിരിക്കും ഇത് എന്ന കാര്യം ബന്ധപ്പെട്ടവർ ആലോചിക്കേണ്ടിയിരിക്കുന്നു’- അദ്ദേഹം പറഞ്ഞു.
ജമാ അത്തെ ഇസ്ലാമിയുടെ യുവജന സംഘടനയായ സോളിഡാരിറ്റിയെയും പേരെടുത്ത് വിമർശിച്ച സമസ്ത നേതാവ് അബ്ദുൾ ഹമീദ് ഫൈസി, ജമാ അത്തെ ഇസ്ലാമി മുസ്ലീം ബ്രദർഹുഡിന്റെ മറുപുറമാണെന്നും അഭിപ്രായപ്പെട്ടു.
