തിരുവനന്തപുരം: സീറ്റു നിഷേധിച്ചതിലും പാർട്ടി അവഗണനയിലും മനം നൊന്ത് ആത്മഹത്യ ചെയ്ത ബിജെപി പ്രവർത്തകനായിരുന്ന ആനന്ദ് കെ തമ്പിയുടെ വീട് സന്ദർശിച്ച് സംസ്ഥാന അധ്യക്ഷൻ രാജീവ് ചന്ദ്രശേഖർ. അനുഭാവികളുടെ പ്രതിഷേധം ശക്തമായതോടെയാണ് ബിജെപി അധ്യക്ഷന്റെ നേതൃത്വത്തിലുള്ള സംഘം ആനന്ദിന്റെ വീട് സന്ദർശിച്ചത്. സംഘടന എപ്പോഴും കൂടെയുണ്ടാകുമെന്നും രാജീവ് ചന്ദ്രശേഖർ ആനന്ദിന്റെ ബന്ധുക്കളോട് പറഞ്ഞു. ബിജെപി തിരുവനന്തപുരം ജില്ലാ പ്രസിഡന്റ് കരമന ജയൻ, സംസ്ഥാന നേതാവ് സി ശിവൻകുട്ടി തുടങ്ങിയവരും രാജീവ് ചന്ദ്രശേഖറിനൊപ്പമുണ്ടായിരുന്നു.
ആനന്ദ് ബിജെപി അനുഭാവിയല്ലെന്നും ഇന്ത്യ മുന്നണിയുടെ ഭാഗമാണെന്നുമുള്ള ശിവസേനയുടെ ഭാഗമാണെന്നുമുള്ള ബിജെപി സംസ്ഥാന ജനറൽ സെക്രട്ടറി എസ് സുരേഷിന്റെ വാർത്താസമ്മേളനത്തിലെ പരാമർശം നേരത്തേ വിവാദമായിരുന്നു. 25 വർഷത്തോളം സംഘവുമായി ബന്ധപ്പെട്ട് പ്രവർത്തിച്ചയാളായിരുന്നു ആനന്ദ്. പ്രതിഷേധം ശക്തമായതോടെ അദ്ദേഹം തന്റെ പരാമർശം തെറ്റാണെന്നും ഖേദം രേഖപ്പെടുത്തുന്നുവെന്നും അറിയിച്ചിരുന്നു. തുടർന്നാണ് ബിജെപി സംസ്ഥാന അധ്യക്ഷൻതന്നെ നേരിട്ടെത്തുന്നത്.
ട്രാവൻകൂർ സഹകരണ സംഘം പ്രസിഡന്റും ബിജെപി മുൻ വക്താവുമായ എംഎസ് കുമാറിനേയും രാജീവ് ചന്ദ്രശേഖർ സന്ദർശിച്ചു. സഹകരണ സംഘത്തിൽനിന്ന് വായ്പയെടുത്തവരിൽ തിരിച്ചടവില്ലാത്ത ബിജെപി നേതാക്കളുടെ പേര് പുറത്തുവിടുമെന്ന് എംഎസ് കുമാർ ഭീഷണി മുഴക്കിയിരുന്നു.
