തിരുവനന്തപുരം: ലൈംഗിക ആരോപണ വിവാദത്തിൽ പുതിയ ശബ്ദരേഖകൾ പുറത്ത് വന്നതിൽ പ്രതികരണവുമായി രാഹുൽ മാങ്കൂട്ടത്തിൽ. ശബ്ദരേഖകൾ പുറത്തുവരുമ്പോൾ മാധ്യമപ്രവർത്തകർ അതിനെക്കുറിച്ച് തന്നോട് ചോദിക്കാത്തത് എന്തുകൊണ്ട് എന്നും അത് ശരിയായ മാധ്യമപ്രവർത്തനം അല്ലെന്നും രാഹുൽ മാങ്കൂട്ടത്തിൽ പ്രതികരിച്ചു.
എന്നാൽ ഓഡിയോയും ചാറ്റും അദ്ദേഹത്തിന്റേതല്ലേയെന്ന് മാധ്യമങ്ങൾ ചോദിച്ചപ്പോൾ രാഹുൽ വ്യക്തമായ മറുപടി നൽകാൻ തയ്യാറായില്ല. “എന്റെ ശബ്ദമാണോ അല്ലയോ എന്ന് കൃത്യസമയത്ത് പറയും” എന്നായിരുന്നു അദ്ദേഹത്തിന്റെ ഏക പ്രതികരണം. അന്വേഷണം നടക്കുകയാണെന്നും, പൊലീസിന് സ്വമേധയാ കേസ് എടുക്കാനാകുമെങ്കിൽ എടുക്കട്ടെയെന്നും രാഹുൽ വ്യക്തമാക്കി.
“രാജ്യത്തെ നിയമത്തിനെതിരായി ഈ ദിവസം വരെ ഒന്നും ചെയ്തിട്ടില്ല. നിയമപരമായി മുന്നോട്ട് പോകാൻ എനിക്ക് ആവകാശമുണ്ട്. അതുമായി മുന്നോട്ട് പോകും. അന്വേഷണം നടക്കുകയാണ്. നിയമപോരാട്ടം എപ്പോൾ വേണമെന്ന് ഞാൻ തീരുമാനിക്കും. മാധ്യമങ്ങൾ ഒരേ കാര്യം തിരിച്ചും മറിച്ചും കൊടുക്കുന്നു. എൻ്റെ നിരപരാധിത്വം ബോധ്യപ്പെടുത്തേണ്ടത് കോടതിയിലാണ്. അവിടെ അത് ബോധ്യപ്പെടുത്തും. മാധ്യമങ്ങളുടെ കോടതിയിൽ അത് വിശദീകരിക്കേണ്ട കാര്യമില്ല”, രാഹുൽ മാങ്കൂട്ടത്തിൽ പ്രതികരിച്ചു.
വിഷയത്തിൽ അന്വേഷണം നടക്കുന്നതിനാൽ അധികം സംസാരിക്കുന്നില്ലെന്നും ആവശ്യമായ സമയത്ത് തന്നെ നിയമപരമായ ഇടപെടൽ നടത്തുമെന്നും, രാജ്യത്തെ നിയമങ്ങൾക്കെതിരെ ഒന്നും ചെയ്തിട്ടില്ലെന്നുമാണ് രാഹുലിന്റെ നിലപാട്.
