തൃശൂർ: മൂന്നുമാസമായി അവശനിലയിലായിരുന്ന ഹൃഷിരാജ് എന്ന കടുവയെ കൂട്ടിൽ മരിച്ച നിലയിൽ കണ്ടെത്തി. മൂന്നു മാസത്തോളമായി അവശനിലയിലായിരുന്ന കടുവയ്ക്ക് ചലനശേഷി നഷ്ടപ്പെട്ടിരുന്നു. ഭക്ഷണവും മരുന്നും നേരിട്ട് വായിൽ വെച്ചുകൊടുത്തായിരുന്നു ജീവൻ നിലനിർത്തിയിരുന്നത്.
പത്തു വർഷം മുമ്പ് വയനാട്ടിലെ സുൽത്താൻ ബത്തേരി റേഞ്ചിൽ ഉൾപ്പെടുന്ന കാട്ടികുളത്തു വെച്ചു പിടികൂടിയ കടുവയായിരുന്നു ഹൃഷിരാജ്. 2015 ൽ പിടികൂടുമ്പോൾ 15 വയസായിരുന്നു പ്രായം. ഹൃഷിരാജിന് പ്രത്യേക പരിചരണം നൽകിയെങ്കിലും ജീവൻ രക്ഷിക്കാനായില്ല. ഇന്നലെ രാത്രിയോടെയാണ് കടുവ ചത്തത്.
ദേശീയ കടുവ സംരക്ഷണ അതോറിറ്റിയുടെ മാനദണ്ഡങ്ങളനുസരിച്ച് നടപടികൾ പൂർത്തിയാക്കുമെന്ന് തൃശൂർ മൃഗശാല അധികൃതർ അറിയിച്ചു. വെറ്ററിനറി സർജൻമാരായ ഡോ. ശ്യാം വേണുഗോപാൽ, ഡോ. ധന്യ എന്നിവരുടെ നേതൃത്വത്തിൽ പോസ്റ്റ്മോർട്ടം നടത്തും. പുത്തൂരിലെ സുവോളജിക്കൽ പാർക്ക് ഉദ്ഘാടനം കഴിഞ്ഞെങ്കിലും തൃശൂർ മൃഗങ്ങളെ പൂർണ്ണമായും അവിടേക്ക് മാറ്റിയിട്ടില്ല. ഇനി ഒരു കടുവ മാത്രമാണ് മൃഗശാലയിലുള്ളത്.
