ഡൽഹി: അംഗീകരിക്കപ്പെട്ട കൃത്യമായ ഫോർമുല ഉപയോഗിച്ച് നിർമിക്കാത്ത ഒആർഎസ്(ORS) ലേബലിൽ വിൽക്കുന്ന ഉത്പന്നങ്ങളെ വിപണിയിൽ നിന്ന് നീക്കാൻ ഫുഡ് സേഫ്റ്റി ആൻഡ് സ്റ്റാൻഡേർഡ്സ് അതോറിറ്റി ഓഫ് ഇന്ത്യയുടെ തീരുമാനം. ലോകാരോഗ്യ സംഘടനയുടെ മാനദണ്ഡങ്ങൾ പാലിക്കാത്ത കമ്പനികളുടെ ഉത്പന്നങ്ങൾക്കാണ് നിയന്ത്രണം ഏർപ്പെടുത്തുന്നത്.
പഴങ്ങൾ അടിസ്ഥാനമാക്കിയുള്ള പാനീയങ്ങൾ, എനർജി ഡ്രിങ്കുകൾ, റെഡി-ടു-സെർവ് പാനീയങ്ങൾ, ഇലക്ട്രോലൈറ്റ് പാനീയങ്ങൾ എന്നിവയിൽ വ്യപകമായി ‘ORS’ (ഓറൽ റീഹൈഡ്രേഷൻ സൊല്യൂഷൻ) എന്ന പദം പേരിലോ ലേബലിലോ അല്ലെങ്കിൽ ബ്രാൻഡ് ലോഗോയിലോ ഉപയോഗിക്കുന്നുണ്ട്. അംഗീകരിക്കപ്പെട്ട കൃത്യമായ ഫോർമുല ഉപയോഗിച്ച് നിർമിക്കാത്ത ഇത്തരം ഉത്പന്നങ്ങൾ വിപണിയിൽ നിന്ന് നീക്കം ചെയ്യുന്നതായി ഫുഡ് സേഫ്റ്റി ആൻഡ് സ്റ്റാൻഡേർഡ്സ് അതോറിറ്റി ഓഫ് ഇന്ത്യ (FSSAI) ഉത്തരവ് പുറപ്പെടുവിച്ചു.
ഇ-കൊമേഴ്‌സ് പ്ലാറ്റ്‌ഫോമുകൾ, റീട്ടെയിൽ ഔട്ട്‌ലെറ്റുകൾ, ഫാർമസികൾ എന്നിവിടങ്ങളിൽ പരിശോധന നടത്താനും ഈ മാനദണ്ഡങ്ങൾ പാലിക്കാത്ത പാനീയങ്ങൾ വിൽക്കുന്നത് നീക്കം ചെയ്യാനും ഫുഡ് സേഫ്റ്റി ഇൻസ്‌പെക്ടർമാർക്ക് നിർദ്ദേശം നൽകിയിട്ടുണ്ട്.
പല ഉത്പന്നങ്ങളിലും അമിതമായ അളവിൽ പഞ്ചസാരയും സോഡയുമാണ് അടങ്ങിയിട്ടുള്ളത്. മിതമായ അളവിൽ മറ്റു ലവണങ്ങളും ഉണ്ടാകാം. ഇത്തരം പാനീയങ്ങളിൽ മിക്കപ്പോഴും മെഡിക്കൽ അതോറിറ്റികൾ നിശ്ചയിക്കുന്ന അളവിൽ ഒആർഎസിനു വേണ്ട ഘടകങ്ങളൊന്നും ഉണ്ടാകാറില്ല. ഇത് നിർജലീകരണത്തിനുള്ള പ്രതിവിധിയായി കണ്ട് ഉപയോഗിക്കുന്നവർക്ക് ഗുണകരമാകുന്നില്ലെന്ന് നേരത്തേ കണ്ടെത്തിയിരുന്നു. ഇതനുസരിച്ചാണ് ഇപ്പോൾ നടപടി ആരംഭിച്ചിരിക്കുന്നത്.
2006 ലെ ഭക്ഷ്യസുരക്ഷാ നിയമത്തിൽ പറഞ്ഞിരിക്കുന്ന മാനദണ്ഡങ്ങൾ പാലിക്കാതെയാണ് പല ഉത്പന്നങ്ങളും ഒആർഎസ് എന്ന ലേബലിൽ വിൽക്കുന്നതെന്ന് FSSAI കണ്ടെത്തിയിട്ടുണ്ട്. ഒക്ടോബറിൽ തന്നെ ഇക്കാര്യത്തിൽ ഇന്ത്യൻ ഭക്ഷ്യ നിയന്ത്രണ ബോർഡ് വ്യക്തത വരുത്തിയിരുന്നു. ഓറല്‍ റീഹൈഡ്രേഷന്‍ ലായനികളുടെ മെഡിക്കല്‍ മാനദണ്ഡങ്ങള്‍ പാലിക്കാത്ത പാനീയങ്ങളുടെ ബ്രാന്‍ഡിംഗില്‍ ‘ORS’ എന്ന പദം ഉപയോഗിക്കുന്നത് ഫുഡ് സേഫ്റ്റി ആന്‍ഡ് സ്റ്റാന്‍ഡേര്‍ഡ്‌സ് അതോറിറ്റി ഓഫ് ഇന്ത്യ (FSSAI) നേരത്തേ തന്നെ നിരോധിച്ചിരുന്നു. ഹൈദരാബാദ് ആസ്ഥാനമായുള്ള ശിശുരോഗ വിദഗ്ധയായ ഡോ. ശിവരഞ്ജിനി സന്തോഷ് നടത്തിയ 8 വര്‍ഷത്തെ അക്ഷീണമായ പരിശ്രമത്തെ തുടര്‍ന്നായിരുന്നു ഈ തീരുമാനം. ORS എന്ന പേരില്‍ വില്‍ക്കുന്ന ഉല്‍പ്പന്നങ്ങള്‍ കഴിച്ചതിനുശേഷവും കുട്ടികള്‍ കടുത്ത നിര്‍ജ്ജലീകരണവും വയറിളക്കവും അനുഭവിക്കുന്നതിന്റെ നിരവധി കേസുകള്‍ കണ്ടെത്തിയതിനാലായിരുന്നു ഡോ. ശിവരഞ്ജിനി സന്തോഷ് ഇതിനെതിരെ പോരാട്ടമാരംഭിച്ചത്.
