കൊല്ലം: കൊല്ലം കാവനാട് കായലിൽ രണ്ട് മത്സ്യബന്ധന ബോട്ടുകൾക്ക് തീപിടിച്ചു. മുക്കാട് കായലിൽ നങ്കൂരമിട്ടിരുന്ന ബോട്ടുകൾക്കാണ് തീപിടിച്ചത്. പാചകത്തിന് ഉപയോഗിക്കുന്ന ഗ്യാസിൽ നിന്ന് തീ പടർന്നതാകാം അപകടത്തിന് കാരണം എന്നാണ് പ്രാഥമിക നിഗമനം. അഗ്നിശമന സേന തീ അണയ്ക്കാനുള്ള ശ്രമം തുടരുകയാണ്.
ബോട്ടിലുണ്ടായിരുന്ന രണ്ട് തൊഴിലാളികൾക്ക് നിസാര പരുക്കേറ്റിട്ടുണ്ട്. തീ പടർന്നപ്പോൾ തന്നെ ബോട്ടുകളുടെ കെട്ടഴിച്ചു വിട്ടതിനാൽ മറ്റ് ബോട്ടുകളിലേക്ക് തീ പടരുന്നത് ഒഴിവായി. തീപിടിത്തമുണ്ടായത് കായലിന്റെ നടുഭാഗത്ത് ആയതിനാൽ അഗ്നിശമന സേനയുടെ വാഹനമെത്തിക്കാൻ കഴിഞ്ഞില്ല. സമീപ പ്രദേശത്തുള്ള ഐസ് പ്ലാന്‍റിൽ നിന്നും വെള്ളം എടുത്താണ് തീയണക്കാൻ ശ്രമം തുടരുന്നത്. ബോട്ടുകൾ സെൻ്റ് ജോർജ് തുരുത്തിൽ ചെന്ന് അടിഞ്ഞിരിക്കുകയാണ്.
