പത്തനംതിട്ട: ശബരിമലയിൽ നിന്ന് സ്വർണം നഷ്ടപ്പെട്ടതുമായി ബന്ധപ്പെട്ട് തിരുവിതാംകൂർ ദേവസ്വം ബോർഡ് മുൻ പ്രസിഡൻ്റ് എ പത്മകുമാറിനെ പ്രത്യേക അന്വേഷണ സംഘം ചോദ്യം ചെയ്യുന്നു. ഇന്ന് രാവിലെയാണ് പത്മകുമാർ എസ്ഐടിക്ക് മുന്നിൽ ഹാജരായത്. 2019ൽ സ്വർണക്കൊള്ള നടക്കുമ്പോൾ ദേവസ്വം പ്രസിഡന്റായിരുന്നു എ പത്മകുമാർ.
ഇന്നലെ വൈകുന്നേരത്തോടെയാണ് ചോദ്യം ചെയ്യലിന് എത്തിച്ചേരാൻ പത്മകുമാറിനോട് എസ്ഐടി ആവശ്യപ്പെട്ടത്. തുടർന്ന് ആറൻമുളയിലെ വീട്ടിലുണ്ടായിരുന്ന പത്മകുമാര്‍ രാവിലെ തന്നെ തിരുവനന്തപുരത്തേക്ക് എത്തുകയായിരുന്നു. ചോദ്യം ചെയ്യലിന് മുന്നോടിയായി നോട്ടീസ് ഒന്നും നൽകിയിരുന്നില്ല.
സ്വർണക്കൊള്ളയുമായി ബന്ധപ്പെട്ട് നേരത്തേ അറസ്റ്റിലായ എൻ വാസുവിനെ ഇന്ന് വൈകീട്ട് നാലുമണി വരെ എസ്ഐടിയുടെ കസ്റ്റഡിയിൽ വിട്ടിട്ടുണ്ട്. വാസുവിനെയും ഒരുമിച്ചിരുത്തിയാണ് എ പത്മകുമാറിനെ ചോദ്യംചെയ്യുന്നത്. ശബരിമലയില്‍ സ്വര്‍ണക്കൊള്ള നടന്ന 2019-ല്‍ ദേവസ്വം ബോര്‍ഡ് കമ്മീഷണറായിരുന്ന എൻവാസു പിന്നീട് ദേവസ്വം ബോര്‍ഡ് പ്രസിഡന്റായും ചുമതലയേറ്റിരുന്നു. എ പത്മകുമാറിന് പിന്നാലെയായിരുന്നു വാസു പ്രസിഡന്റായത്. അറസ്റ്റിലായ മുന്‍ എക്‌സിക്യുട്ടീവ് ഓഫീസര്‍ ഡി. സുധീഷ്‌കുമാര്‍ വാസുവിന്റെ പ്രൈവറ്റ് സെക്രട്ടറിയായും പ്രവര്‍ത്തിച്ചിരുന്നു.
തിരുവനന്തപുരത്തെ രഹസ്യകേന്ദ്രത്തിൽവെച്ചാണ് എസ്പി ശശിധരന്‍റെ നേതൃത്വത്തിലുള്ള ചോദ്യം ചെയ്യൽ. ഇതിനുശേഷം പത്മകുമാറിനെ അറസ്റ്റ് ചെയ്തേക്കുമെന്നാണ് സൂചന.
