കൊച്ചി: തദ്ദേശതെരഞ്ഞെടുപ്പിൽ മുട്ടടയിലെ കോൺഗ്രസ് സ്ഥാനാർത്ഥി വൈഷ്ണ സുരേഷിനെ വോട്ടർ പട്ടികയിൽ നിന്ന് ഒഴിവാക്കിയ നടപടിയിൽ ഹൈക്കോടതിയുടെ വിമർശനം. വൈഷ്ണയുടെ പേര് വോട്ടർപട്ടികയിൽ നിന്ന് ഒഴിവാക്കിയത് അനീതിയാണെന്ന് ഹൈക്കോടതി വ്യക്തമാക്കി. ഒരാൾ മത്സരിക്കാൻ ഇറങ്ങിയതാണ്, സ്ഥാനാർത്ഥിത്വവും പ്രഖ്യാപിച്ചു, രാഷ്ട്രീയ കാരണത്താൽ അവരെ ഒഴിവാക്കുകയല്ല വേണ്ടതെന്നും ഹൈക്കോടതി പറഞ്ഞു.
വെഷ്ണയെ വോട്ടർ പട്ടികയിൽ ഉൾപ്പെടുത്താനുള്ള നടപടിയെടുക്കണമെന്നും ഹൈക്കോടതി സംസ്ഥാന തെരഞ്ഞെടുപ്പ് കമ്മീഷനോട് നിർദ്ദേശിച്ചു. നടപടിയെടുക്കാൻ തയ്യാറായില്ലെങ്കിൽ അസാധാരണ അധികാരം പ്രയോഗിക്കുമെന്നും ഹൈക്കോടതി പറഞ്ഞു. ഒരു പെൺകുട്ടി മൽസരിക്കാൻ നിൽക്കുമ്പോഴാണോ ഇത്തരം പ്രശ്‌നങ്ങളെന്ന് കോടതി ചോദിച്ചു. സാങ്കേതിക കാരണങ്ങളാൽ തെരഞ്ഞെടുപ്പിൽ മത്സരിക്കാനുള്ള അവകാശം നിഷേധിക്കരുതെന്നും കോടതി കൂട്ടിചേർത്തു.
വൈഷ്ണ നൽകിയ രേഖയിൽ വീട്ടുനമ്പർ തെറ്റാണ് എന്ന് ചൂണ്ടികാണിച്ചാണ് സിപിഐഎം പ്രവർത്തകനായ ധനേഷ് കോർപറേഷൻ തിരഞ്ഞെടുപ്പ് ചുമതലയുള്ള അഡിഷനൽ സെക്രട്ടറിക്കു പരാതി നൽകിയത്. പരാതിയെ തുടർന്ന് വോട്ടർ പട്ടികയിൽ നിന്ന് വൈഷ്ണയുടെ പേര് വെട്ടുകയും ഈ കാരണത്താൽ തദ്ദേശതെരഞ്ഞെടുപ്പിൽ മത്സരിക്കുന്ന കാര്യം പ്രതിസന്ധയിലാവുകയും ചെയ്തിരുന്നു.
