പത്തനംതിട്ട: മണ്ഡല മകരവിളക്ക് തീർത്ഥാടനത്തിന് തുടക്കം കുറിച്ച് ശബരിമല ക്ഷേത്രനട ഇന്ന് വൈകിട്ട് അഞ്ച് മണിക്ക് തുറക്കും. ഓൺലൈനായി 70,000 പേർക്ക് ബുക്ക് ചെയ്ത് സന്ദർശനം നടത്താം. തൽസമയ ബുക്കിംഗ് വഴി 20000 പേർക്കും ഒരു ദിവസം ദർശനത്തിന് സൗകര്യമുണ്ട്.
ബുക്കിങ്ങുകൾ കുതിച്ചുയറുന്നതായാണ് റിപ്പോർട്ടുകൾ. ആണ് ആദ്യ ദിവസങ്ങളിലുണ്ടായിരിക്കുന്നത്. ആദ്യ ദിവസങ്ങളിലെ ബുക്കിംഗ് ഇതിനോടകം പൂർത്തിയായി. പമ്പയിൽ നിന്ന് തീർഥാടകരെ ഉച്ചമുതൽ സന്നിധാനത്തേക്ക് കയറ്റിവിടും. മുപ്പതിനായിരം പേരാണ് ഇന്ന് ഓൺലൈൻ വഴി ബുക്ക് ചെയ്തിരിക്കുന്നത്.
കണ്ഠരര് മഹേഷ് മോഹനരുടെ സാന്നിധ്യത്തില് മേല്ശാന്തി അരുണ്കുമാര് നമ്പൂതിരിയാണ് നട തുറക്കുക. തുടര്ന്ന് മേല്ശാന്തി പതിനെട്ടാം പടിയിറങ്ങി ശ്രീകോവിലില് നിന്നുള്ള ദീപം കൊണ്ട് ആഴി ജ്വലിപ്പിക്കും. 6.30ന് ശബരിമല സോപാനത്ത് നിയുക്ത ശബരിമല മേല്ശാന്തി പ്രസാദ് നമ്പൂതിരിയെ തന്ത്രി അഭിഷേകം ചെയ്ത് അവരോധിക്കും.തുടര്ന്ന് മാളികപ്പുറം ക്ഷേത്രനടയില് നിയുക്ത മേല്ശാന്തി മനു നമ്പൂതിരിയുടെ അവരോധിക്കല് ചടങ്ങും നടക്കും.
ഞായറാഴ്ച പൂജകള് ഇല്ല. തിങ്കളാഴ്ച പുലര്ച്ചെ മൂന്നിന് വൃശ്ചിക പുലരിയില് പുതിയ മേല്ശാന്തിമാര് ശബരിമല, മാളികപ്പുറം നടകള് തുറക്കുന്നതോടെ തീര്ത്ഥാടനത്തിന് തുടക്കമാകും. ദിവസവും പുലര്ച്ചെ മൂന്നുമുതല് ഉച്ചയ്ക്ക് ഒരു മണിവരെയും ഉച്ചകഴിഞ്ഞ് മൂന്നു മുതല് രാത്രി 11 വരെയുമാണ് ദര്ശനം. മണ്ഡല സീസണിനായുള്ള ഒരുക്കങ്ങള് പൂര്ത്തിയായതായി അധികൃതര് അറിയിച്ചു. ശബരിമല തീർത്ഥാടനം ഭംഗിയായി നടക്കുമെന്ന് ദേവസ്വം ബോർഡ് പ്രസിഡന്റ് കെ ജയകുമാർ പറഞ്ഞു.
