ഡൽഹി: ചെങ്കോട്ടയ്ക്ക് സമീപമുള്ള ലാൽകില മെട്രോ സ്റ്റേഷനടുത്ത് നടന്ന സ്ഫോടനത്തിൽ പരുക്കേറ്റ് എൽഎൻജെപി ആശുപത്രിയിൽ ചികിത്സയിലുണ്ടായിരുന്ന ഒരാൾ കൂടി മരിച്ചു. ഇതോടെ കൊല്ലപ്പെട്ടവരുടെ എണ്ണം 13 ആയി. അതെസമയം ബോംബ് സ്ഫോടനത്തിൽ കാറോടിച്ചത് ഡോക്ടർ ഉമര്‍ മുഹമ്മദാണെന്ന് ഡിഎൻഎ ടെസ്റ്റിൽ സ്ഥിരീകരണമായി. ഭീകരർ ഉപയോഗിച്ചതെന്ന് കരുതുന്ന കാറുകളും പൊലീസ് കസ്റ്റഡിയിലെടുത്തിട്ടുണ്ട്.
ചെങ്കോട്ടയിലെ സ്ഫോടനം ഭീകരാക്രമണം ആണെന്ന് കേന്ദ്രസർക്കാർ നേരത്തേ സ്ഥിരീകരിച്ചിരുന്നു. ഫരീദാബാദ് ഭീകര സംഘത്തെ കേന്ദ്രീകരിച്ചാണ് അന്വേഷണം മുന്നോട്ടുപോകുന്നത്. അതിനിടെ ഇന്ന് സ്ഫോടനക്കേസിൽ മറ്റൊരു ഡോക്ടറെ കൂടി കസ്റ്റഡിയിലെടുത്തിട്ടുണ്ട്. അനന്ത്നാഗ് സ്വദേശി ഡോ.മുഹമ്മദ് ആരിഫിനെയാണ് പൊലീസ് കസ്റ്റഡിയിൽ എടുത്തത്.. അറസ്റ്റിലായ ഡോ. മുസമ്മിൽ ഷക്കീലിനെയും സംഘത്തെയും എൻഐഎ ചോദ്യം ചെയ്തു. ഡൽഹി സ്ഫോടനത്തിന്റെ സൂത്രധാരൻ എന്ന് കരുതുന്ന സ്ഫോടനത്തിൽ മരിച്ച ഡോക്ടർ ഉമർ മുഹമ്മദും ഫരീദാബാദിലെ സംഘവും മറ്റു പലയിടത്തും ഭീകരാക്രമണങ്ങൾക്ക് പദ്ധതിയിട്ടിരുന്നതായും എൻഐഎക്ക് വിവരം ലഭിച്ചതായി കണ്ടെത്തൽ.ഹരിയാന ഉത്തർപ്രദേശ് ജമ്മു കശ്മീർ സംസ്ഥാനങ്ങളിൽ നിരവധി പേർ എൻഐഎ നിരീക്ഷണത്തിലുണ്ട്.
ഉമറും അറസ്റ്റിലായ മുസ്‌മിൽ ഷക്കീലും കഴിഞ്ഞ ജനുവരിയിൽ ചെങ്കോട്ട സന്ദര്‍ശിച്ചിരുന്നു. മുസ്‌മിലിന്റെ ഫോൺ പരിശോധിച്ചതിൽ നിന്ന് ചാന്ദ്നി ചൗക്കിലും ജമാ മസ്ജിദിലും ഇവര്‍ എത്തിയതായി കണ്ടെത്തി. സംഭവ ദിവസം ഉമർ പതിനൊന്ന് മണിക്കൂർ ദില്ലിയിലുണ്ടായിരുന്നു. ഫരീദാബാദിൽ അറസ്റ്റുകൾ നടന്നതോടെ ഉമർ ഡൽഹിയിലെത്തിയതെന്നാണ് വിവരം.
ദില്ലി ചെങ്കോട്ട സ്ഫോടന കേസിലെ പ്രതികൾ ഉപയോഗിച്ച ബ്രെസാ കാറും അന്വേഷണസംഘം കണ്ടെത്തിയിട്ടുണ്ട്. ഈ കാർ അൽ ഫലാഹ് സർവകലാശാലയിൽ പാർക്ക് ചെയ്തിരിക്കുകയായിരുന്നു. ഭീകര സംഘത്തിലെ വനിത ഡോക്ടറായ ഷഹീൻ്റെതാണ് കാർ. ഭീകരപ്രവർത്തനത്തിലേക്ക് വനിതകളെ എത്തിക്കാനായി പ്രവർത്തിച്ചതിലും ഇവർക്ക് പങ്കുണ്ടെന്നാണ് റിപ്പോർട്ടുകൾ പറയുന്നത്. പ്രതികള്‍ ഉപയോഗിച്ചിരുന്ന ചുവന്ന എക്കോ സ്പോർട്ട് കാർ കഴിഞ്ഞ ദിവസം കണ്ടെത്തിയിരുന്നു. ഫരീദാബാദ് പൊലീസാണ് വാഹനം പിടികൂടിയത്. ഡൽഹി രെജിസ്ട്രേഷനുള്ള DL 10 CK0458 നമ്പർ കാറാണ് പൊലീസ് കണ്ടെത്തിയത്. ഖണ്ഡവാലി ഗ്രാമത്തിലായിരുന്നു ഈ കാർ നിർത്തിയിട്ടിരുന്നത്.
ചെങ്കോട്ട സ്ഫോടന കേസന്വേഷണം പാകിസ്ഥാനിലേക്കുന്നതായാണ് ഇതുമായി ബന്ധപ്പെട്ട മറ്റൊരു വിവരം. അറസ്റ്റിലായ ലക്നൗ സ്വദേശിനി ഡോക്ടര്‍ ഷഹീന് മസൂദ് അസറിൻ്റെ ബന്ധുക്കളുമായി ബന്ധമെന്ന് കണ്ടെത്തൽ. മസൂദ് അസറിൻ്റെ അനന്തരവൻ്റെ ഭാര്യ ആരിഫ ബീവിയുമായി അടുത്ത ബന്ധമുണ്ടെന്നാണ് കണ്ടെത്തല്‍. ജെയ്ഷേ മുഹമ്മദിന്റെ വനിതാ സംഘത്തിനായി ഷഹീൻ പ്രവർത്തിച്ചിരുന്നു എന്ന വിവരം നേരത്തെ പുറത്തുവന്നിരുന്നു. ഇതോടൊപ്പം ജെയ്ഷേ മുഹമ്മദിലെ ഉന്നതരുമായും ഷഹീന് ബന്ധമുണ്ടെന്നാണ് നിലവില്‍ പുറത്തുവരുന്ന റിപ്പോര്‍ട്ടുകൾ.
സ്ഫോടനത്തിന് ഉപയോഗിച്ച ഹ്യുണ്ടായി i20 കാറിന് പുറമേ രണ്ട് കാറുകൾ കൂടി ഉമറും മുസമിലും വാങ്ങിയതായാണ് പൊലീസിന്റെ കണ്ടെത്തല്‍. വ്യാജ വിലാസത്തിലാണ് ഈ കാർ രജിസ്റ്റർ ചെയ്തിരുന്നത്. രണ്ടാമത്തെ കാർ രജിസ്റ്റർ ചെയ്തിരുന്നത് ദില്ലി ന്യൂ സീലംപൂരിലെ ഒരു വിലാസത്തിലാണ്. പൊലീസ് ഇവിടെയെത്തി പരിശോധന നടത്തിയിരുന്നു. വ്യാജ രേഖകൾ നൽകി വാഹനം രജിസ്റ്റർ ചെയ്തുവെന്നാണ് പൊലീസിന്റെ നിഗമനം. രേഖകൾ പ്രകാരം ഡോക്ടർ ഉമർ നബി എന്നയാളുടെ പേരിലാണ് വാഹനം രജിസ്റ്റർ ചെയ്തിരിക്കുന്നത്.
