തിരുവനന്തപുരം: വന്ദേഭാരത് ട്രെയിനില്‍ വിദ്യാര്‍ഥികള്‍ ആർഎസ്എസ് ഗണഗീതം പാടിയതിനെ പിന്തുണച്ച് യൂത്ത് കോണ്‍ഗ്രസ് നേതാവ് എന്‍എസ് നുസൂര്‍. മധുരമായാണ് കുട്ടികൾ പാടിയതെന്നും അവര്‍ പാടുന്ന ഗാനങ്ങളെല്ലാം അവരുടേതാണ് എന്ന ചിന്താഗതി എല്ലാപേരും മാറ്റിയെ തീരൂവെന്നും നുസൂർ പറഞ്ഞു. ഗാനം ആലപിച്ച കുട്ടികൾക്ക് ആശംസകള്‍ നേരുന്നതായും നുസൂർ ഫേസ്ബുക്കിൽ കുറിച്ചു.
അത് ഒരിക്കലും ഒരു വിവാദഗാനം അല്ലെന്നും വർഷങ്ങൾക്ക് മുൻപ് താനും ഭാരത് സ്കൗട്ട്സ് ആൻഡ് ഗൈഡ്സ് ക്യാമ്പുകളിൽ ഈ ഗാനം പാടിയിരുന്നുവെന്നും ഇന്നും അത് തുടർന്ന് വരുന്നുമുണ്ടെന്നും നുസൂർ പറഞ്ഞു. പിന്നെന്തിനാണ് ഈ ഗാനം RSS ന് തീറെഴുതുന്നതെന്ന് അദ്ദേഹം ചോദിക്കുന്നു. കുട്ടികൾ വന്ദേഭാരത് ട്രെയിനിൽ ഗാനമാലപിക്കുന്ന വീഡിയോയോടൊപ്പമാണ് കോൺഗ്രസ് നേതാവിന്റെ കുറിപ്പ്.
അതേസമയം നുസൂറിന്റെ പോസ്റ്റ് ‘എന്തായാലും സതീശന്റെ കോണ്‍ഗ്രസ്സല്ലാത്തവരുമുണ്ട്’ എന്ന കുറിപ്പോടെ ബിജെപി നേതാവ് കെ സുരേന്ദ്രൻ ഷെയർ ചെയ്തിട്ടുണ്ട്. സമൂഹത്തിന്റെ സമസ്ത മേഖലകളിലും വര്‍ഗീയ വിഷം കലര്‍ത്തി, ജനങ്ങളെ മതത്തിന്റെയും ജാതിയുടെയും പേരില്‍ വിഭജിച്ച് രാഷ്ട്രീയ മുതലെടുപ്പ് നടത്തുകയെന്ന സംഘപരിവാറിന്റെ സങ്കുചിത രാഷ്ട്രീയമാണ് വന്ദേഭാരത് സര്‍വീസ് ഉദ്ഘാടനത്തിലും കണ്ടതെന്നായിരുന്നു വിഡി സതീശൻ പ്രതികരിച്ചിരുന്നത്. വിഡി സതീശന്റെ നിലപാടിന് വിരുദ്ധമായിട്ടായിരുന്നു യൂത്ത് കോൺഗ്രസ് നേതാവിന്റെ പോസ്റ്റ്.
എറണാകുളം-ബെംഗളൂരു വന്ദേഭാരത് സര്‍വീസ് ഉദ്ഘാടനത്തിനിടെ സ്കൂൾ വിദ്യാർത്ഥികൾ സംഘപരിവാറിന്റെ ഗണഗീതം പാടിയത് നേരത്തേ വിവാദമായിരുന്നു. സംഭവത്തിൽ അന്വേഷണം നടത്തുമെന്ന് വിദ്യാഭ്യാസമന്ത്രിയും അറിയിച്ചിരുന്നു.
