വാഷിംഗ്ടണ്‍: ഡൊണാൾഡ് ട്രംപിനെ കാണാൻ സിറിയൻ പ്രസിഡന്റ് യുഎസിലെത്തി. ഭീകരവാദികളുടെ കരിമ്പട്ടികയില്‍ നിന്ന് സിറിയന്‍ പ്രസിഡന്റ് അഹമ്മദ് അല്‍ ഷറയെ നീക്കം ചെയ്ത് ഒരു ദിവസത്തിന് ശേഷമാണ് അദ്ദേഹത്തിന്റെ ട്രംപുമായുള്ള സുപ്രധാനമായ ഔദ്യോഗിക കൂടിക്കാഴ്ച. സിറിയയിലെ ദീര്‍ഘകാല ഭരണാധികാരിയായിരുന്ന ബഷാര്‍ അല്‍ അസദിനെ, കഴിഞ്ഞ വര്‍ഷം അവസാനം വിമത നീക്കത്തിലൂടെ അട്ടിമിറിച്ചാണ് ഷറ അധികാരം സ്വന്തമാക്കിയത്. തിങ്കളാഴ്ച വൈറ്റ് ഹൗസില്‍വെച്ച് അഹമ്മദ് അല്‍ ഷറ, ഡൊണാള്‍ഡ് ട്രംപിനെ കാണും.
മുമ്പ് ഭീകരവാദികളുടെ കരിമ്പട്ടികയിൽ പെടുത്തിയിരുന്ന വ്യക്തിയാണ് ഷറ.
ഇസ്ലാമിക് സ്റ്റേറ്റിനെതിരായ (ഐഎസ്) യുഎസ് നേതൃത്വത്തിലുള്ള അന്താരാഷ്ട്ര സഖ്യത്തില്‍ ചേരാനുള്ള കരാറില്‍ സിറിയൻ പ്രസിഡന്റ് അഹമ്മദ് അല്‍ ഷറ ഒപ്പുവെച്ചേക്കും. സിറിയയിലെ യുഎസ് പ്രതിനിധി ടോം ബരാക്ക് ഇക്കാര്യം നേരത്തേ പറഞ്ഞിരുന്നു. ഡമാസ്‌കസിനടുത്ത് ഒരു സൈനിക താവളം സ്ഥാപിക്കാന്‍ അമേരിക്ക പദ്ധതിയിടുന്നതായി സിറിയയിലെ ഒരു നയതന്ത്രജ്ഞനെ ഉദ്ധരിച്ച് വാര്‍ത്താ ഏജന്‍സിയായ എഎഫ്പി റിപ്പോര്‍ട്ടുമുണ്ടായിരുന്നു.
രാസായുധങ്ങൾ ഇല്ലാതാക്കുന്നതടക്കമുള്ള യുഎസ് ആവശ്യങ്ങള്‍ ഷറയുടെ സര്‍ക്കാര്‍ നിറവേറ്റുന്നുണ്ടെന്ന് സ്റ്റേറ്റ് ഡിപ്പാര്‍ട്ട്മെന്റ് വക്താവ് ടോമി പിഗോട്ടും പറഞ്ഞു. ബഷാര്‍ അല്‍ അസദിന്റെ സ്ഥാനമൊഴിയലിനും അസദ് ഭരണകൂടത്തിന് കീഴിലെ 50 വര്‍ഷത്തിലധികം നീണ്ട അടിച്ചമര്‍ത്തലിനും ശേഷം സിറിയന്‍ നേതൃത്വത്തിൽ പ്രകടമാകുന്ന പുരോഗതിയെ യുഎസ് അംഗീകരിക്കുന്നതായും പിഗോട്ട് പറഞ്ഞു.
സിറിയയിൽ 13 വര്‍ഷത്തോളം തുടർന്ന ആഭ്യന്തരയുദ്ധത്തിന് ശേഷം പുനര്‍നിര്‍മ്മാണത്തില്‍ വലിയ വെല്ലുവിളികള്‍ നേരിടുന്നതിനിടെയാണ് ഷറ ട്രംപിനെ സന്ദർശിക്കുന്നത്. സെപ്റ്റംബറില്‍ ഐക്യരാഷ്ട്രസഭയിൽ ഷറ സന്ദർശനം നടത്തിയിരുന്നു. പിന്നാലെയാണ് ട്രംപിനെ കാണാൻ സിറിയൻ പ്രസിഡന്റ് എത്തുന്നത്. മുമ്പ് അല്‍ ഖ്വായ്ദയുമായി ബന്ധമുണ്ടായിരുന്ന ഷറയുടെ സംഘടനയായ ഹയാത്ത് തഹ്രീര്‍ അല്‍ ഷാമിനെയും (എച്ച്ടിഎസ്) ജൂലൈയില്‍ വാഷിംഗ്ടണ്‍ ഭീകരസംഘടനകളുടെ പട്ടികയിൽ നിന്ന് ഒഴിവാക്കിയിരുന്നു.
