തിരുവനന്തപുരം: തദ്ദേശ തെരഞ്ഞെടുപ്പിൽ മുൻ ഡിജിപിയും മത്സരിക്കുന്നു. തിരുവനന്തപുരം കോര്‍പ്പറേഷനിലെ ശാസ്തമംഗലം വാർഡിലാണ് മുൻ ഡിജിപി ആർ ശ്രീലേഖ മത്സരിക്കുന്നത്. ഇന്ന് ബിജെപി പുറത്തുവിട്ട 67 പേരുടെ പട്ടികയിലാണ് ശ്രീലേഖയുടെ പേരുള്ളത്.
തിരുവനന്തപുരം കോർപ്പറേഷനിലെ ബിജെപിയുടെ 67 സ്ഥാനാര്‍ത്ഥികളടങ്ങുന്ന ആദ്യഘട്ട സ്ഥാനാര്‍ത്ഥി പട്ടികയിൽ പാളയത്ത് മുൻ കായിക താരവും സ്പോര്‍ട്സ് കൗണ്‍സിൽ സെക്രട്ടറിയുമായ പദ്മിനി തോമസും കൊടുങ്ങാനൂർ വാര്‍ഡിൽ വിവി രാജേഷുമാണ് മത്സരിക്കുന്നത്. കഴക്കൂട്ടത്ത് അനില്‍ കഴക്കൂട്ടവും പേരൂര്‍ക്കടയില്‍ ടിഎസ് അനില്‍കുമാറും താമര ചിഹ്നത്തിൽ ജനവിധി തേടും.
കോണ്‍ഗ്രസ് വിട്ടുവന്ന കെ. മഹേശ്വരന്‍ നായര്‍, തമ്പാനൂര്‍ സതീഷ് എന്നിവരും മത്സരരംഗത്തുണ്ട്. സിറ്റിങ് കൗണ്‍സിലര്‍മാരില്‍ ഭൂരിഭാഗം പേരും ഇത്തവണയും അതേ സീറ്റിൽ നിന്നാണ് മത്സരിക്കുക.തിരുമല വാര്‍ഡിൽ ദേവിമ, കരമനയിൽ കരമന അജി, നേമത്ത് എംആര്‍ ഗോപൻ എന്നിവരും സ്ഥാനാര്‍ത്ഥികളാകും. പേരൂര്‍ക്കടയിൽ ടിഎസ് അനിൽകുമാറും കഴക്കൂട്ടത്ത് അനിൽ കഴക്കൂട്ടവുമായിരിക്കും ബിജെപി സ്ഥാനാര്‍ത്ഥി.
ഭരിക്കാൻ ഒരു അവസരമാണ് ബിജെപി ചോദിക്കുന്നതെന്നും ഇന്ത്യയിലെ ഏറ്റവും മികച്ച നഗരമാക്കി തിരുവനന്തപുരത്തെ മാറ്റാനാണ് ലക്ഷ്യമെന്നും സ്ഥാനാര്‍ത്ഥികളെ പ്രഖ്യാപിച്ചുകൊണ്ട് സംസ്ഥാന അധ്യക്ഷൻ രാജീവ് ചന്ദ്രശേഖര്‍ പറഞ്ഞു. തലസ്ഥാനത്ത് കഴിഞ്ഞ തവണ 35 സീറ്റിലാണ് ബിജെപിക്ക് വിജയിക്കാനായത്.
