വാഷിങ്ടണ്‍: തന്നെ വിമർശിച്ച് പദവിയിൽ വിജയിക്കാനാകില്ലെന്നും മംദാനിയുടെ കമ്യൂണിസ്റ്റ് ഭരണത്തിൽ നഗരവാസികൾക്ക് ഫ്‌ളോറിഡയിലേക്ക് പോകേണ്ടി വരുമെന്നും ട്രംപ് മുന്നറിയിപ്പ് നൽകി. മംദാനിയുടെ വിജയാഘോഷ പ്രസംഗം ഏറെ രോഷാകുലമായിരുന്നെന്നും തന്റെ നേര്‍ക്ക് ആയിരുന്നെന്നും ട്രംപ് പറഞ്ഞു. മംദാനി ഒരു മോശം തുടക്കത്തിലൂടെയാണ് പോകുന്നതെന്നും വാഷിങ്ടണിനോട് ബഹുമാനമില്ലെങ്കില്‍ മംദാനിക്ക് മേയർ പദവിയിൽ വിജയിക്കാനുള്ള സാധ്യത കുറവാണെന്നും ട്രംപ് മുന്നറിയിപ്പ് നൽകി.
മംദാനിയുടെ വിജയം ന്യൂയോര്‍ക്കിനെ കമ്യൂണിസ്റ്റ് ക്യൂബയോ സോഷ്യലിസ്റ്റ് വെനസ്വേലയോ ആക്കുമെന്നും ട്രംപ് പറഞ്ഞു. ന്യൂയോര്‍ക്ക് മേയറായുള്ള സൊഹ്‌റാന്‍ മംദാനിയുടെ വിജയത്തോടെ അമേരിക്കയ്ക്ക് അതിന്റെ പരമാധികാരത്തില്‍ ചെറിയൊരു നഷ്ടം സംഭവിച്ചതായും ട്രംപ് സമ്മതിക്കുന്നു. ഫോക്സ് ന്യൂസിനോടു സംസാരിക്കവേയായിരുന്നു യുഎസ് പ്രസിഡന്റിന്റെ പരാമർശം.
‘ഇന്നലെ രാത്രി, ന്യൂയോര്‍ക്കില്‍ നമുക്ക് നമ്മുടെ പരമാധികാരത്തില്‍ അല്‍പം കുറവുണ്ടായി. പക്ഷേ കുഴപ്പമില്ല, നമ്മള്‍ അക്കാര്യം ശ്രദ്ധിക്കും. യുഎസ് കോണ്‍ഗ്രസ് അംഗങ്ങളായ ഡെമോക്രാറ്റിക് പാര്‍ട്ടി അമേരിക്കയോട് എന്താണ് ചെയ്യാന്‍ ആഗ്രഹിക്കുന്നതെന്ന് നിങ്ങള്‍ക്ക് അറിയണമെങ്കിൽ ന്യൂയോര്‍ക്കിലെ കഴിഞ്ഞ ദിവസത്തെ തിരഞ്ഞെടുപ്പ് ഫലം കാണൂ ട്രംപ് പറഞ്ഞു. രാജ്യത്തെ ഏറ്റവും വലിയ നഗരത്തിന്റെ മേയറായി അവര്‍ ഒരു കമ്യൂണിസ്റ്റുകാരനെ പ്രതിഷ്ഠിച്ചിരിക്കുന്നു. ‘- ട്രംപ് പറഞ്ഞു.
എതിരാളികള്‍ അമേരിക്കയെ കമ്യൂണിസ്റ്റ് ക്യൂബയോ സോഷ്യലിസ്റ്റ് വെനസ്വേലയോ ആക്കി മാറ്റാന്‍ പഠിച്ച പണി പതിനെട്ടും നോക്കുകയാണ്, പലവര്‍ഷങ്ങളായി താൻ ഇക്കാര്യത്തിൽ മുന്നറിയിപ്പ് നല്‍കുന്നതാണെന്നും അദ്ദേഹം പറയുന്നു. 2024 നവംബര്‍ അഞ്ചാം തീയതി അമേരിക്കയിലെ ജനങ്ങള്‍ തങ്ങളുടെ സര്‍ക്കാരിനെ ഉത്തരവാദിത്വം ഏല്‍പിച്ചു. ഞങ്ങള്‍ നമ്മുടെ പരമാധികാരത്തെ പുനഃസ്ഥാപിച്ചു. എന്നാൽ മംദാനിയുടെ വിജയത്തോടെ അതിൽ കുറവുണ്ടായിയെന്ന് ട്രംപ് പറഞ്ഞു.മംദാനിയുടെ ഭരണത്തിന് കീഴില്‍ ന്യൂയോര്‍ക്ക് കമ്യൂണിസ്റ്റു ഭരണത്തിലേക്ക് നീങ്ങുമ്പോൾ ന്യൂയോര്‍ക്കുകാര്‍ക്ക് ഫ്‌ളോറിഡയിലേക്ക് പലായനം ചെയ്യേണ്ടിവരുമെന്നും ട്രംപ് മുന്നറിയിപ്പ് നല്‍കി.
