പട്ന: പോരാട്ടം കനക്കുന്നുവെന്ന് സൂചന നൽകി ബിഹാറിൽ ഒന്നാംഘട്ട തെരഞ്ഞെടുപ്പ് പുരോഗമിക്കുന്നു. വൈകിട്ട് മൂന്നു മണിവരെയുള്ള കണക്കുകളനുസരിച്ച് ബിഹാറിൽ 53.77 ശതമാനം പോളിങ് രേഖപ്പെടുത്തിയിട്ടുണ്ട്. കഴിഞ്ഞ തവണ ആദ്യ ഘട്ടത്തിൽ 55.68 ശതമാനം ആയിരുന്നു ആകെ പോളിങ് എന്നിടത്താണിത്. ആർജെഡിയിലേയും ബിഹാർ രാഷ്ട്രീയത്തിലേയും അതികായനുമായ മുതിർന്ന നേതാവ് ലാലുപ്രസാദ് യാദവ് പട്നയിലെ വെറ്റിനറി കോളേജിൽ തന്റെ വോട്ടുരേഖപ്പെടുത്തി.
കോൺഗ്രസിനും ബിജെപിക്കുമൊപ്പം, എൻഡിഎയിലുള്ള മുഖ്യമന്ത്രി നിതീഷ് കുമാറിന്റെ ജെഡിയുവും മഹാ ഗഡ്ബന്ധനൊപ്പമുള്ള തേജസ്വി യാദവിന്റെ ആർജെഡിയുമാണ് ബിഹാറിലെ പ്രധാന രാഷ്ട്രീയകക്ഷികൾ. വാശിയേറിയ പ്രചാരണം വോട്ടിംഗിലും പ്രതിഫലിക്കുന്ന കാഴ്ചയാണ് ബിഹാറിൽ നിന്നും കാണുന്നത്. 2020 ലെ നിയമസഭാ തെരെഞ്ഞെടുപ്പിലേക്കാളധികം വോട്ടർമാർ പോളിംഗ് ബൂത്തുകളിൽ എത്തുന്നുണ്ട്. ബെഗുസരായ് ജില്ലയിലാണ് ഏറ്റവും കൂടുതൽ പോളിങ്. ലോക്സഭാ തെരഞ്ഞെടുപ്പിലുണ്ടായതിലേറെ പോളിങ് രേഖപ്പെടുത്തുമെന്നാണ് കണക്കുകൾ പറയുന്നത്.
ബിഹാറിൽ വലിയ മാറ്റം കാണുന്നുവെന്ന് തേജസ്വി യാദവ് അവകാശപ്പെട്ടപ്പോൾ, ജനം ജംഗിൾ രാജിനെതിരെ വിധിയെഴുതുമെന്ന് പ്രധാനമന്ത്രി നരേന്ദ്രമോദി പറഞ്ഞു. വോട്ടെടുപ്പ് ദിവസം ബിഹാറിലെ അരാരിയയിൽ റാലിക്കെത്തിയ പ്രധാനമന്ത്രി നരേന്ദ്രമോദി ലാലുപ്രസാദ് യാദവിന്റെ ജംഗിൾ രാജാണ് ബിഹാറിന്റെ വികസനത്തെ പിന്നോട്ടടിച്ചതെന്ന് കുറ്റപ്പെടുത്തി. ബിഹാറിനെ ആർജെഡിയുടെ കാട്ടുഭരണം തകർത്തുവെന്നും ഇതിൽ നിന്നും ബിഹാറിനെ രക്ഷിച്ചുവെന്നും നരേന്ദ്ര മോദി പറഞ്ഞു. എന്നാൽ ഇഡി രാജും തൊഴിൽ രഹിതരാജും നോട്ടുനിരോധന രാജുമൊക്കെ നടപ്പിലാക്കുന്ന നരേന്ദ്രമോദിയുടെ ജംഗിൾരാജാണ് രാജ്യത്ത് നടക്കുന്നതെന്ന് രാഹുൽഗാന്ധി തിരിച്ചടിച്ചു. തങ്ങള്‍ ജയിക്കുമെന്നും അതിലൂടെ ബിഹാറിലെ ജനങ്ങളും ബിഹാറും വിജയിക്കുമെന്നും എല്ലാവർക്കും ഒപ്പം നമ്പർ വൺ ബിഹാർ സൃഷ്ടിക്കാൻ പ്രവർത്തിക്കുമെന്നും ആര്‍ജെഡി നേതാവ് തേജസ്വി യാദവും പ്രതികരിച്ചു.
ബിഹാറില്‍ ഒന്നാംഘട്ട വോട്ടെടുപ്പാണ് ഇന്ന് നടക്കുന്നത്. രണ്ടാംഘട്ടം നവംബർ 11 നും നടക്കും. 243 മണ്ഡലങ്ങളിൽ 121 മണ്ഡലങ്ങളിലാണ് ഒന്നാം ഘട്ട വോട്ടെടുപ്പ്. രണ്ടാം ഘട്ടത്തിൽ 122 മണ്ഡലങ്ങളിൽ വോട്ടെടുപ്പ് നടക്കും. അതേസമയം പോളിങ് നടക്കുന്നതിനിടെ ബിഹാർ ഉപമുഖ്യമന്ത്രിയുടെ വാഹനവ്യൂഹത്തിന് നേരെ അതിക്രമമുണ്ടായി. ഉപമുഖ്യമന്ത്രി വിജയ് സിൻഹയുടെ കാറിനു നേരെയാണ് കല്ലെറുണ്ടായത്. ബിഹാറിലെ ലക്കിസറായിലാണ് അതിക്രമമുണ്ടായത്.
