തിരുവനന്തപുരം: സ്ത്രീകളുടെ ട്രെയിനിലെ സുരക്ഷയുടെ കാര്യത്തിൽ കേന്ദ്രസർക്കാർ ശ്രദ്ധ കാണിക്കുന്നില്ലെന്ന് മന്ത്രി വി ശിവൻകുട്ടി. ഞായറാഴ്ച രാത്രി വർക്കലയിൽ ഓടുന്ന ട്രെയിനിൽ നിന്ന് യുവതിയെ തള്ളിയിട്ട് സംഭവത്തിൽ പ്രതികരിക്കുകയായിരുന്നു അദ്ദേഹം. കേന്ദ്രസർക്കാർ മാത്രമല്ല കേരളത്തിലുള്ള യുഡിഎഫിന്റെ എംപിമാരും ഇക്കാര്യത്തിൽ ഇടപെടുന്നില്ലെന്നും മന്ത്രി കൂട്ടിചേർത്തു.
വർക്കലയിൽ ഓടുന്ന ട്രെയിനിന്റെ വാതിൽക്കൽ നിന്ന് മാറാത്തതിൽ പ്രകോപിതനായി മദ്യലഹരിയിലായിരുന്നയാൾ യുവതിയെ പിന്നിൽ നിന്ന് ചവിട്ടി പുറത്തേക്കിടുകയായിരുന്നു. വീഴ്ച്ചയിൽ ഗുരുതരമായി പരിക്കേറ്റ യുവതിയെ ഐശിയുവിൽ പ്രവേശിപ്പിച്ചിരിക്കുകയാണ്. പ്രത്യേകിച്ചൊരു തർക്കമോ പ്രകോപനമോ ഇല്ലാതെയായിരുന്നു സംഭവം നടന്നതെന്നതെന്ന് പരിക്കേറ്റ യുവതിയുടെ സുഹൃത്തും ദൃക്സാക്ഷിയുമായ യുവതിയും വ്യക്തമാക്കി.
സംഭവത്തിന് പിന്നാലെ പ്രതി സുരേഷ് കുമാറിനെ കസ്റ്റഡിയിൽ എടുത്തിരുന്നു. താനല്ല പ്രതിയെന്ന് സ്ഥാപിക്കാൻ ശ്രമിച്ചെങ്കിലും അന്വേഷണത്തിൻ ആരോപണങ്ങൾ ശരിയെന്ന് തെളിഞ്ഞു. റെയിൽവേ പോലീസ് പ്രതിക്കെതിരെ വധശ്രമത്തിന് കേസെടുത്തു.അറസ്റ്റ് രേഖപ്പെടുത്തിയ പ്രതിയെ ഇന്ന് ഉച്ചയ്ക്ക് കോടതിയിൽ ഹാജരാക്കും.
