വാഷിങ്ടൺ: ചൈനയും യുഎസും പരസ്പരം നിരീക്ഷിക്കുന്നുണ്ടെന്നും ആണവായുധങ്ങളുടെ കാര്യത്തിലും ഇരുരാജ്യങ്ങളും മുമ്പിലാണെന്നും യുഎസ് പ്രസിഡന്റ് ഡൊണാൾഡ് ട്രംപ് പറഞ്ഞു. ചൈനയുമായി ചേർന്നു പ്രവർത്തിക്കാമെന്നും ട്രംപ് കൂട്ടിച്ചേർത്തു. ചൈനീസ് പ്രസിഡന്റ് ഷീ ജിന്‍പിങ്ങുമായുള്ള കൂടിക്കാഴ്ചയ്ക്ക് പിന്നാലെയാണ് ട്രംപിന്റെ പ്രതികരണം.
ഒക്ടോബര്‍ 30-ന് ദക്ഷിണ കൊറിയയില്‍ നടന്ന 32-ാമത് എപെക് യോഗത്തില്‍ ചൈനീസ് പ്രസിഡന്റ് ഷീ ജിന്‍പിങ്ങും യുഎസ് പ്രസിഡന്റ് ട്രംപും കണ്ടുമുട്ടിയിരുന്നു. 2019-ല്‍ ഒസാക്കയില്‍ നടന്ന ജി20 ഉച്ചകോടിയുടെ ഭാഗമായി ഇരുവരും കണ്ടുമുട്ടിയതിനു ശേഷമുള്ള ആദ്യ കൂടിക്കാഴ്ചയാണിത്.
ചൈന തങ്ങളെ നിരീക്ഷിക്കുന്നുവെന്നും തങ്ങള്‍ എപ്പോഴും അവരെയും നിരീക്ഷിക്കുന്നുവെന്നും ട്രംപ് പറഞ്ഞു. ചൈനയെ തട്ടിമാറ്റുന്നതിന് പകരം, അവരുമായി ചേര്‍ന്ന് പ്രവര്‍ത്തിക്കുന്നതിലൂടെ ശക്തിപ്പെടാന്‍ കഴിയുമെന്നും ട്രംപ് പറഞ്ഞു. അതേസമയം യുഎസിന്റെ പവര്‍ ഗ്രിഡിന്റെയും ജലവിതരണ സംവിധാനങ്ങളുടെയും ഭാഗങ്ങളില്‍ ചൈനയുടെ നുഴഞ്ഞുകയറ്റമുണ്ടായതായി യുഎസ് രഹസ്യാന്വേഷണ ഏജന്‍സികള്‍ ആരോപിക്കുന്നുണ്ട്. ഇതായിരിക്കാം ചൈനയുടെ നിരീക്ഷണവുമായി ബന്ധപ്പെട്ട ട്രംപിന്റെ പരാമർശത്തിനു പിന്നിലെന്നും കരുതുന്നവരുണ്ട്.
‘മറ്റേത് രാജ്യത്തെക്കാളുമധികം ആണവായുധങ്ങള്‍ യുഎസിനുണ്ട്. ലോകത്തെ 150 തവണ തകര്‍ക്കാന്‍ ആവശ്യമായ ആണവായുധങ്ങള്‍ യുഎസിന്റെ പക്കലുണ്ട്. റഷ്യയാണ് രണ്ടാമത്. ചൈന മൂന്നാമതും. പക്ഷേ, അഞ്ച് വര്‍ഷത്തിനുള്ളില്‍ അവര്‍ ഒപ്പമെത്തും. ചൈനയും റഷ്യയും ആണവായുധങ്ങള്‍ പരീക്ഷിക്കുന്നുണ്ട്, അക്കാര്യം പുറത്ത് അറിയുന്നില്ലെന്നേ ഉള്ളൂ. ചൈന ആണവായുധങ്ങള്‍ അതിവേഗം നിര്‍മിക്കുകയാണ്. ആണവ നിരായുധീകരണത്തെക്കുറിച്ച് എന്തെങ്കിലും ചെയ്യണമെന്നാണ് കരുതുന്നത്’- ട്രംപ് പറഞ്ഞു.
