ഡൽഹി: ഒക്ടോബർ 31-ന് പ്രൊജക്റ്റ് സിൻഡിക്കേറ്റിൽ പ്രസിദ്ധീകരിച്ച ‘ഇന്ത്യൻ രാഷ്ട്രീയം ഒരു കുടുംബ ബിസിനസ്സാണ്’ എന്ന ലേഖനം ചർച്ചയാകുന്നു. ഇന്ത്യൻ രാഷ്ട്രീയം കുടുംബ ബിസിനസാണെന്ന ശശി തരൂരിന്റെ പരാമർശം കോൺഗ്രസിനെ ലക്ഷ്യമിട്ടെന്ന് ബിജെപി ആരോപിച്ചു.
സ്വജനപക്ഷപാതത്തെയും കുടുംബവാഴ്ച രാഷ്ട്രീയത്തെയും കുറിച്ചുള്ള ശശി തരൂർ എം.പിയുടെ ലേഖനം രാഹുല്‍ ഗാന്ധിയേയും തേജസ്വി യാദവിനെയും ഉദ്ദേശിച്ചാണെന്ന്‌ ബിജെപി വക്താവ് ഷെഹ്സാദ് പൂനാവാല ‘എക്സി’ൽ കുറിച്ചു.
‘ഇന്ത്യൻ രാഷ്ട്രീയം എങ്ങനെ ഒരു കുടുംബ ബിസിനസ്സായി മാറിയെന്ന് ചൂണ്ടിക്കാട്ടി ഡോ. ശശി തരൂർ എഴുതിയ തന്റെ കാമ്പുള്ള ഒരു ലേഖനത്തിലൂടെ, ഇന്ത്യയിലെ സ്വജനപക്ഷപാതത്തിന്റെ പുത്രനായ രാഹുലിനും തേജസ്വി യാദവിനും നേരെ അദ്ദേഹം നേരിട്ട് ആക്രമണം നടത്തിയിരിക്കുന്നു’- ബിജെപി വക്താവ് ഷെഹ്സാദ് പൂനാവാല കുറിച്ചു.
പതിറ്റാണ്ടുകളായി നെഹ്റു ഗാന്ധി കുടുംബം ഇന്ത്യൻ രാഷ്ട്രീയത്തിൽ എങ്ങനെയാണ് ആധിപത്യം സ്ഥാപിച്ചതെന്ന് ലേഖനത്തിൽ പറയുന്നതായി ഷെഹ്സാദ് ചൂണ്ടിക്കാട്ടുന്നു. സ്വതന്ത്ര ഇന്ത്യയുടെ ആദ്യ പ്രധാനമന്ത്രി ജവഹർലാൽ നെഹ്റു, പ്രധാനമന്ത്രിമാരായിരുന്ന ഇന്ദിര ഗാന്ധി, രാജീവ് ഗാന്ധി, പ്രതിപക്ഷ നേതാവ് രാഹുൽ ഗാന്ധി, പ്രിയങ്ക ഗാന്ധി എംപി എന്നിവരും ഇതിൽ ഉൾപ്പെടുന്നു.
”ഡോ. തരൂർ ‘ഖത്രോം കെ ഖിലാഡി'(അപകടത്തിന്റെ കളിക്കാരൻ) ആയി മാറി. അദ്ദേഹം സ്വജനപക്ഷപാതത്തിന്റെ സന്തതികളെ അല്ലെങ്കിൽ നവാബുമാരെ നേരിട്ട് വിമർശിച്ചിരിക്കുന്നു. ഇത്രയും ധീരമായി സംസാരിച്ചതിന് ഡോ. തരൂരിന് എന്ത് പ്രത്യാഘാതം ഉണ്ടാകുമെന്ന് ഞാൻ ഭയപ്പെടുന്നു.’-പൂനെവാല പറഞ്ഞു. ആ കുടുംബം വളരെ പ്രതികാരബുദ്ധിയുള്ളവരായതിനാൽ താൻ അദ്ദേഹത്തിനുവേണ്ടി പ്രാർത്ഥിക്കുകയാണെന്നും ഷെഹ്സാദ് പൂനെവാല കൂട്ടിച്ചേർത്തു.
