വാഷിങ്ടൺ: ഇന്ത്യ ഉൾപ്പടെയുള്ള രാജ്യങ്ങൾക്ക് പിഴയടക്കം വലിയ ശതമാനം തീരുവ ചുമത്തിയ അമേരിക്കൻ പ്രസിഡന്റ് ഡൊണാൾഡ് ട്രംപിൻറെ തീരുമാനങ്ങൾക്ക് വൻ തിരിച്ചടി. ട്രംപ് പ്രഖ്യാപിച്ച ഭൂരിഭാഗം തീരുവകളും നിയമവിരുദ്ധമാണെന്ന് അമേരിക്കൻ അപ്പീൽ കോടതി വിധിച്ചു. അടിയന്തര അധികാര നിയമങ്ങൾ പ്രകാരം ഏകപക്ഷീയമായി തീരുവകൾ ചുമത്തിയ ഡൊണാൾഡ് ട്രംപ് തന്റെ അധികാരം ദുർവിനിയോഗം ചെയ്തു എന്ന് വാഷിംഗ്ടൺ ഡിസിയിലെ ഫെഡറൽ അപ്പീൽ കോടതിയുടെ വിധിയിൽ പറയുന്നു.
7-4 എന്ന ഭൂരിപക്ഷ വിധിയിലാണ് ട്രംപിന്റെ തീരുവ നടപ്പാക്കുമെന്ന തീരുമാനം യുഎസ് ഫെഡറൽ അപ്പീൽ കോടതി തള്ളിയത്. ഭരണഘടന അനുസരിച്ച് തീരുവകൾ പ്രഖ്യാപിക്കാനുള്ള അധികാരം നിയമനിർമാണ സഭക്ക് മാത്രമാണ്. അതേസമയം, കേസുകൾ തീരുന്നത് വരെ നിലവിലെ തീരുവകൾ തുടരാമെന്നും കോടതി പറഞ്ഞു. നികുതി തീരുവ സംബന്ധിച്ചുള്ള തീരുമാനങ്ങൾ എടുക്കാൻ പ്രസിഡന്റിന് അധികാരമില്ലെന്നും ലെവികൾ നിശ്ചയിക്കാനുള്ള അധികാരം യുഎസ് കോൺഗ്രസിനാണെന്നും ഫെഡറൽ കോടതി വ്യക്തമാക്കി.
എന്നാൽ, കോടതി വിധിയെ വിമർശിച്ച് ട്രംപ് രംഗത്തെത്തി. താരിഫുകൾ ഇല്ലാതായാൽ ഒരു വലിയ ദുരന്തമായിരിക്കുമെന്നും അത് രാജ്യത്തെ സാമ്പത്തികമായി ദുർബലരാക്കും എന്നും അദ്ദേഹം പറഞ്ഞു. ഈ കോടതി വിധി അക്ഷരാർത്ഥത്തിൽ അമേരിക്കൻ ഐക്യനാടുകളെ നശിപ്പിക്കുന്നതാണെന്നും ട്രംപ് കൂട്ടിചേർത്തു. ഫെഡറൽ അപ്പീൽ കോടതിയുടെ വിധി ഇന്ത്യ ഉൾപ്പടെയുള്ള ലോകരാജ്യങ്ങൾ വലിയ പ്രതീക്ഷയോടെയാണ് കാണുന്നത്.
നേരത്തെ യുഎസുമായി വ്യാപാരക്കരാറിലേർപ്പെടാൻ തീരുമാനിച്ചിരുന്ന യാത്ര ജപ്പാന്റെ വ്യാപാര പ്രതിനിധി റിയോസെയ് അകാസാവ വ്യാഴാഴ്ച റദ്ദാക്കിയിരുന്നു. പ്രധാനമന്ത്രി നരേന്ദ്ര മോദി ഇന്ത്യ-ജപ്പാൻ വാർഷിക ഉച്ചകോടിയിൽ പങ്കെടുക്കാൻ ജപ്പാനിൽ എത്തിയതിനെ തുടർന്നാണ് യാത്ര റദ്ദാക്കിയത്. യുഎസുമായി ജപ്പാൻ നടത്തുന്ന 550 ബില്യൺ ഡോളറിന്റെ നിക്ഷേപ കരാറിന് ഔദ്യോഗിക സ്ഥിരീകരണം നൽകുന്നതിന് വേണ്ടിയാണ് പ്രതിനിധി യുഎസിലേക്ക് പോകാനിരുന്നത്.
