കൊച്ചി : അനധികൃത സ്വത്ത് സമ്പാദനക്കേസിലെ വിജിലൻസ് കോടതി ഉത്തരവിനെതിരെ എഡിജിപി എം ആർ അജിത് കുമാർ നൽകിയ ഹർജി പരിഗണിക്കവേ ഹൈക്കോടതിയുടെ രൂക്ഷ വിമർശനം. തനിക്ക് ക്ലീൻ ചിറ്റ് നൽകിയ അന്വേഷണ റിപ്പോർട്ട് അസാധുവാക്കിയ വിജിലൻസ് കോടതി ഉത്തരവ് റദ്ദാക്കണമെനന്നായിരുന്നു ആവശ്യം.
കീഴ് ഉദ്യോഗസ്ഥൻ ക്ലീൻ ചിറ്റ് നൽകിയത് ശരിയായില്ലെന്നും ഹൈക്കോടതി ജഡ്ജിക്കെതിരെയുള്ള അന്വേഷണം ജില്ലാ കോടതി ജഡ്ജി നടത്തിയത് പോലെയായിപ്പോയെന്നും കോടതി വിമർശിച്ചു. എംആര്‍ അജിത് കുമാറിനെതിരെ ആരാണ് അന്വേഷണം നടത്തിയതെന്ന് ഹൈക്കോടതി ആരാഞ്ഞു. ഉന്നത ഉദ്യോഗസ്ഥനാണോ അതോ ജൂനിയര്‍ ഉദ്യോഗസ്ഥനാണോ അന്വേഷിച്ചത്. ജൂനിയര്‍ ഉദ്യോഗസ്ഥന്‍ അന്വേഷിച്ചതില്‍ അസ്വഭാവികതയില്ലേയെന്ന് ഹൈക്കോടതി ചോദിച്ചു.
ഹൈക്കോടതി ജഡ്ജിക്കെതിരെ രജിസ്ട്രാര്‍ അന്വേഷണം നടത്തിയാല്‍ എങ്ങനെയിരിക്കുമെന്ന് കോടതി വാക്കാൽ പരാമർശിച്ചു. സർക്കാർ ഉദ്യോഗസ്ഥർക്കെതിരെ കേസെടുക്കുമ്പോൾ പാലിക്കേണ്ട നിയമങ്ങൾ പാലിച്ചിട്ടുണ്ടോ എന്ന് പരിശോധിക്കേണ്ടതുണ്ടെന്ന് കോടതി പറഞ്ഞു . പാലിച്ചിട്ടില്ല എന്ന് അജിത് കുമാർ മറുപടി നൽകി. എല്ലാ നടപടിക്രമങ്ങളും പാലിച്ചതായി കാണുന്നില്ല എന്ന് കോടതിയും പറഞ്ഞു. പി സി ആക്ടിലെ സെക്ഷൻ 70 ഉപകാരം സർക്കാരിന്റെ അപ്പ്രൂവൽ ആവശ്യമാണെന്ന് കോടതി വ്യക്തമാക്കി. തുടർന്ന് ഇക്കാര്യത്തിൽ അടക്കം വിശദീകരണം നൽകാൻ പി വി അൻവറിനോട് കോടതി ആവശ്യപ്പെട്ടു.
കേസിൽ വിജിലന്‍സിനോടും ഹൈക്കോടതി മറുപടി തേടി. മുന്‍കൂര്‍ അനുമതി വാങ്ങിയാണോ അന്വേഷണം നടത്തിയതെന്നും
വിജിലന്‍സ് സ്വീകരിച്ച നടപടിക്രമങ്ങള്‍ സംബന്ധിച്ച് വിശദീകരണം നല്‍കണമെന്നും ഹൈക്കോടതി ആവശ്യപ്പെട്ടു. പ്രൊസിക്യൂഷന്‍ അനുമതിയില്ലാതെ കേസെടുത്ത മജിസ്‌ട്രേറ്റ് കോടതി നടപടിയില്‍ വീഴ്ചയെന്നും ഹൈക്കോടതി പറഞ്ഞു. വിജിലന്‍സ് കോടതിയുടെ നടപടിക്രമത്തില്‍ നിയമ പ്രശ്‌നമുണ്ടെന്നാണ് ഹൈക്കോടതിയുടെ നിരീക്ഷണം. വിജിലന്‍സ് കോടതി ഉത്തരവിലെ നിയമപ്രശ്‌നങ്ങളാണ് പരിശോധിക്കുന്നതെന്നും രാഷ്ട്രീയ പ്രശ്‌നങ്ങള്‍ പരിശോധിക്കുകയല്ല കോടതിയുടെ ചുമതലയെന്നും ഹൈക്കോടതി വ്യക്തമാക്കി.
വിജിലൻസിൻ്റെ റിപ്പോർട്ട് കൃത്യമായി പരിശോധിക്കാതെ ക്ലീൻ ചിറ്റ് തള്ളിയ വിജിലൻസ് കോടതിയുടെ നടപടി സ്റ്റേ ചെയ്യണമെന്ന് ആവശ്യപ്പെട്ടാണ് അജിത് കുമാർ ഹൈക്കോടതിയെ സമീപിച്ചത്. അന്വേഷണ നടപടികള്‍ സ്റ്റേ ചെയ്യണോ എന്നതില്‍ ഹൈക്കോടതി നാളെ വിധി പറയും. ഒരു എംഎൽഎ മാധ്യമങ്ങളിലൂടെ നടത്തിയ പൊതു ആരോപണങ്ങൾ മാത്രമാണ് പരാതിയായി കോടതിയിൽ എത്തിയതെന്നും പരാതിക്ക് വിശ്വാസയോഗ്യമായ മറ്റ് തെളിവുകളൊന്നും ഉണ്ടായിരുന്നില്ലെന്നുമാണ് അജിത് കുമാറിന്റെ വാദം.
