ജറുസലേം: ഗാസയിലെ യുദ്ധം അവസാനിപ്പിക്കാനുള്ള നീക്കങ്ങൾക്ക് വഴിയൊരുക്കി, ഹമാസ് മധ്യസ്ഥരാജ്യങ്ങളായ ഈജിപ്തിന്റെയും ഖത്തറിന്റെയും നേതൃത്വത്തിൽ മുന്നോട്ടുവെച്ച പുതിയ വെടിനിര്ത്തൽ കരാർ അംഗീകരിച്ചതായി എഎഫ്പി റിപ്പോർട്ട് ചെയ്തു. ഹമാസ് തിങ്കളാഴ്ച പുറത്തുവിട്ട പ്രസ്താവനപ്രകാരം, കരാറിൽ 60 ദിവസത്തെ വെടിനിര്ത്തലും, അവരുടെ പിടിയിലുള്ള 10 ഇസ്രയേലി ബന്ദികളെ രണ്ട് ഘട്ടങ്ങളിലായി മോചിപ്പിക്കലും ഉൾപ്പെടുന്നു. തടവിലിരിക്കെ മരിച്ച 18 ബന്ദികളുടെ ഭൗതികാവശിഷ്ടങ്ങളും കൈമാറാൻ ഹമാസ് സമ്മതിച്ചിട്ടുണ്ടെന്നും റിപ്പോർട്ടിൽ പറയുന്നു.
എന്നാൽ ഇക്കാര്യത്തിൽ ഇസ്രയേൽ ഇതുവരെ ഔദ്യോഗിക പ്രതികരണം നടത്തിയിട്ടില്ല. ഹമാസ് ആയുധങ്ങൾ വെച്ച് കീഴടങ്ങണമെന്നായിരുന്നു ഇസ്രയേൽ മുൻപ് ഉന്നയിച്ച പ്രധാന ആവശ്യം. ഇസ്രയേൽ പ്രതിരോധ സേനയുടെ കണക്കനുസരിച്ച്, 2023 ഒക്ടോബർ 7-ലെ ഹമാസ് ആക്രമണത്തിൽ പിടിക്കപ്പെട്ട 251 ബന്ദികളിൽ 49 പേർ ഇപ്പോഴും ഗാസയിലാണ്. അതിൽ 27 പേർ മരിച്ചിട്ടുണ്ടെന്നും സൈന്യം വ്യക്തമാക്കുന്നു.
2023 ഒക്ടോബർ 7ന് ഇസ്രയേലിന് നേർക്ക് ഹമാസ് നടത്തിയ ആക്രമണമാണ് യുദ്ധത്തിന് വഴിവെച്ചത്. നേരത്തെ ഹമാസ് ആക്രമണത്തിൽ 1,219 പേർ കൊല്ലപ്പെടുകയും 251 പേരെ ബന്ദികളാക്കുകയും ചെയ്തിരുന്നു. തുടർന്ന് നടന്ന ഇസ്രയേൽ ആക്രമണങ്ങളിൽ 62,000 പലസ്തീനികളുടെ ജീവൻ നഷ്ടപ്പെട്ടതായി കണക്ക് സൂചിപ്പിക്കുന്നു. ഇതിന് മറുപടിയായി ഇസ്രയേൽ ഗാസയിൽ വ്യാപകമായ വ്യോമാക്രമണങ്ങളും ഭൂമി അധിനിവേശവും നടത്തി. ആശുപത്രികൾ, സ്കൂളുകൾ, വീടുകൾ ഉൾപ്പെടെ ആയിരക്കണക്കിന് കെട്ടിടങ്ങൾ തകർന്ന് വീണു. 20 ലക്ഷത്തിലധികം ഗാസാക്കാർ വീടുകൾ വിട്ട് അഭയം തേടേണ്ടി വന്നു.
1948ൽ ഇസ്രയേൽ രാഷ്ട്രം രൂപീകരിക്കുമ്പോൾ അന്നത്തെ യുദ്ധത്തിൽ നൂറുകണക്കിന് പാലസ്തീനികൾ കുടിയൊഴിപ്പിക്കപ്പെട്ടിരുന്നു. 2007ൽ നടന്ന ആഭ്യന്തര സംഘർഷത്തിന് ശേഷം ഹമാസ് ഗാസയിലെ ഭരണ ചുമതല ഏറ്റെടുത്തിരുന്നു. തുടർന്ന് ഇസ്രയേലും ഈജിപ്തും ചേർന്ന് ഗാസയ്ക്ക് മേൽ കർശനമായ ഉപരോധം ഏർപ്പെടുത്തി. അതിനുശേഷം പലവട്ടം യുദ്ധങ്ങളും വെടിനിർത്തൽ കരാറുകളും നടന്നെങ്കിലും എല്ലാം ലംഘിക്കപ്പെട്ടു. ഐക്യരാഷ്ട്രസഭയും ഖത്തർ, ഈജിപ്ത്, അമേരിക്ക തുടങ്ങിയ രാജ്യങ്ങളും പലവട്ടം വെടിനിർത്തലിനായി മധ്യസ്ഥശ്രമങ്ങൾ നടത്തിയിരുന്നു. രക്തച്ചൊരിച്ചിലിനും നാശനഷ്ടങ്ങൾക്കും നടുവിൽ എത്തിയിരിക്കുന്ന പുതിയ കരാർ, മേഖലയിൽ സമാധാനത്തിലേക്ക് വഴിതുറക്കുമെന്ന പ്രതീക്ഷയിലാണ് ലോകം.
