നമ്മുടെ അടുക്കളയിലെ നിത്യസാന്നിധ്യമായ പുളി കേവലം രുചി കൂട്ടാൻ മാത്രമല്ല, ആരോഗ്യ സംരക്ഷണത്തിലും മുൻപന്തിയിലാണെന്ന് പഠനങ്ങൾ വ്യക്തമാക്കുന്നു. ദഹനസംബന്ധമായ പ്രശ്നങ്ങൾ പരിഹരിക്കാൻ പുളി എങ്ങനെ സഹായിക്കുന്നുവെന്നും അതിന്റെ മറ്റ് ആറ് പ്രധാന ഗുണങ്ങൾ എന്തൊക്കെയാണെന്നും നോക്കാം.
ദഹനപ്രക്രിയ സുഗമമാക്കാൻ പുളി സഹായിക്കുന്നത് പ്രധാനമായും മൂന്ന് ഘടകങ്ങളിലൂടെയാണ്. അവ ഇതാണ്.
- സ്വാഭാവിക ശോധന സഹായി: നാരുകളാൽ സമ്പന്നമായ പുളി മലബന്ധം അകറ്റാൻ സഹായിക്കുന്നു. ഇതിലെ നാരുകൾ മലത്തിന് കട്ടി നൽകുകയും കുടലിലൂടെയുള്ള ചലനം സുഗമമാക്കുകയും ചെയ്യുന്നു.
- ദഹനരസങ്ങളുടെ ഉത്പാദനം: പുളിയിലടങ്ങിയിരിക്കുന്ന ടാർടാറിക് ആസിഡ് കരളിലെ പിത്തരസത്തിന്റെ ഉത്പാദനം വർധിപ്പിക്കുന്നു. ഇത് കൊഴുപ്പ് വേഗത്തിൽ ദഹിക്കാൻ സഹായിക്കുന്നു. കൂടാതെ, പുളിയുടെ രുചി ഉമിനീർ ഗ്രന്ഥികളെ ഉത്തേജിപ്പിക്കുകയും ഭക്ഷണത്തിലെ കാർബോഹൈഡ്രേറ്റുകളെ വിഘടിപ്പിക്കാൻ സഹായിക്കുന്ന അമിലൈസ് എന്ന എൻസൈമിന്റെ അളവ് കൂട്ടുകയും ചെയ്യുന്നു.
- അസിഡിറ്റി നിയന്ത്രിക്കുന്നു: പുളി അസിഡിക് ആണെന്ന് തോന്നാമെങ്കിലും, മിതമായ അളവിൽ ഉപയോഗിക്കുന്നത് വയറിലെ പിഎച്ച് നില ക്രമീകരിക്കാൻ സഹായിക്കും. ഇത് നെഞ്ചെരിച്ചിൽ പോലുള്ള അസ്വസ്ഥതകൾക്ക് ആശ്വാസം നൽകുന്നു.
പുളിയുടെ മറ്റ് 6 ആരോഗ്യ ഗുണങ്ങൾ
ഹൃദയാരോഗ്യം: പുളിയിലെ നാരുകൾ ശരീരത്തിലെ ‘ചീത്ത’ കൊളസ്ട്രോൾ കുറയ്ക്കാൻ സഹായിക്കുമെന്ന് പഠനങ്ങൾ സൂചിപ്പിക്കുന്നു.
വീക്കം കുറയ്ക്കുന്നു: ഇതിലടങ്ങിയിരിക്കുന്ന പോളിഫെനോളുകൾ ശരീരത്തിനകത്തെ വീക്കങ്ങൾ കുറയ്ക്കാൻ സഹായിക്കുന്നു. ഇറിറ്റബിൾ ബവൽ സിൻഡ്രോം പോലുള്ള പ്രശ്നങ്ങളുള്ളവർക്ക് ഇത് ഗുണകരമാണ്.
ശരീരഭാരം കുറയ്ക്കാൻ: പുളിയിൽ ഹൈഡ്രോക്സിസിട്രിക് ആസിഡ് അടങ്ങിയിട്ടുണ്ട്. ഇത് ശരീരത്തിൽ കൊഴുപ്പ് അടിഞ്ഞുകൂടുന്നത് തടയാൻ സഹായിച്ചേക്കാം.
പ്രതിരോധശേഷി: വൈറ്റമിൻ സിയും മറ്റ് ആന്റിഓക്സിഡന്റുകളും ധാരാളമുള്ളതിനാൽ രോഗപ്രതിരോധ ശേഷി വർധിപ്പിക്കുന്നു.
ബാക്ടീരിയകളെ പ്രതിരോധിക്കുന്നു: ഭക്ഷണത്തിലൂടെയുണ്ടാകുന്ന അണുബാധകളെയും ബാക്ടീരിയകളെയും പ്രതിരോധിക്കാനുള്ള ശേഷി പുളിക്കുണ്ട്.
മെറ്റബോളിസം വർധിപ്പിക്കുന്നു: രാവിലെ വെറും വയറ്റിൽ പുളി കലക്കിയ വെള്ളം കുടിക്കുന്നത് ശരീരത്തിന്റെ മെറ്റബോളിസം വേഗത്തിലാക്കാൻ സഹായിക്കുന്നു.
രക്തം കട്ടി കുറയ്ക്കാനുള്ള മരുന്നുകൾ കഴിക്കുന്നവരോ വിട്ടുമാറാത്ത വൃക്കരോഗമുള്ളവരോ പുളി ഭക്ഷണത്തിൽ ഉൾപ്പെടുത്തുന്നതിന് മുൻപ് ഡോക്ടറുടെ ഉപദേശം തേടേണ്ടതാണ്. അമിതമായ ഉപയോഗം പല്ലുകളുടെ ഇനാമലിന് കേടുപാടുകൾ വരുത്താനും സാധ്യതയുണ്ട്.
