മുംബൈ: ഓഫ്-റോഡിംഗ് രാജാവ് എന്ന് പേരെടുത്ത ജനപ്രിയ താരം മഹീന്ദ്ര ഥാറിന്‍റെ മുഖം മിനുക്കലാണ് വാഹനപ്രേമികളുടെ ഇടയിലെ ചൂടുള്ള വാർത്ത. മഹീന്ദ്ര തങ്ങളുടെ മികച്ച ഓഫ്-റോഡ് ഡ്രൈവിംഗ് അനുഭവം പകരുന്ന ഥാറിന്‍റെ ഫേസ്‍ലിഫ്റ്റ് പതിപ്പിന്‍റെ പണിപ്പുരയിലാണ്. യുവാക്കൾക്കിടയിലാണ് മഹീന്ദ്ര ഥാറിന്‍റെ ജനപ്രീതി ഏറ്റവും കൂടുതൽ പ്രകടമാകുന്നത്. 2020 ൽ പുറത്തിറങ്ങിയ മഹീന്ദ്ര ഥാറിന്‍റെ നിലവിലെ തലമുറ വിപണിയിൽ ഏറെ ശ്രദ്ധ നേടിയെടുത്തു. ഇന്ത്യൻ യുവതയുടെ ലൈഫ്‌സ്റ്റൈൽ വാഹന ശ്രേണിയിലേയ്ക്കാണ് ഥാർ ഓടിച്ചുകയറിയത്.
വിപണി സാധ്യത നിലനിർത്തുന്നതിനായി ബജറ്റ് ഫ്രണ്ട്‌ലി ടൂവീൽ ഡ്രൈവ് വേരിയന്റ്, അഞ്ച് ഡോർ ഥാർ റോക്‌സ് എന്നിവയും കമ്പനി അവതരിപ്പിച്ചിരുന്നു. ഇവ രണ്ടും വൻ തോതിൽ ജനപ്രിയമായി മാറി. നിലവിൽ മഹീന്ദ്ര ഇപ്പോൾ അതിന്റെ മൂന്ന്-ഡോർ മോഡലാണ് പുതുക്കുന്നത്. രണ്ടാം തലമുറ വേരിയന്റ് പുറത്തിറങ്ങി ഏകദേശം അഞ്ച് വർഷത്തിന് ശേഷം, ഒരു മിഡ്-സൈക്കിൾ അപ്‌ഡേറ്റാണ് ന്നുകൊണ്ടിരിക്കുകയാണ്. വാഹനം നിരവധി തവണ പരീക്ഷണം നടത്തുന്നത് കണ്ടെത്തിയിട്ടുണ്ട്. പുതുക്കിയ ഫ്രണ്ട് ബമ്പർ, ഗ്രിൽ, ഫെൻഡറുകൾ, വീൽ ആർച്ചുകൾ, എൽഇഡി ഡിആർഎൽ എന്നിവയുൾപ്പെടെയുള്ള ബാഹ്യ മാറ്റങ്ങൾ നൽകും. എന്നാൽ മെക്കാനിക്കൽ മാറ്റങ്ങൾക്ക് സാധ്യതയില്ല.
ഫോഗ് ലാമ്പ് ഹൗസിംഗുകളിൽ ഇപ്പോൾ ഷാർപ്പായിട്ടുള്ള വിശദാംശങ്ങൾ ചേർത്തിട്ടുണ്ട്. ഗ്രില്ലിലും ചെറിയ മാറ്റങ്ങൾ വരുത്തിയിട്ടുണ്ട്. കൂടുതൽ മെച്ചപ്പെടുത്തലിനായി കമ്പനി സി ആകൃതിയിലുള്ള എൽഇഡി ലൈറ്റിംഗ് സിഗ്നേച്ചർ നൽകുമോ എന്ന് കണ്ടറിയണം. 10.25 ഇഞ്ച് ടച്ച്‌സ്‌ക്രീൻ ഇൻഫോടെയ്ൻമെന്റ് സിസ്റ്റം ഡാഷ്‌ബോർഡിന്റെ മധ്യഭാഗത്തായി സ്ഥാപിക്കും. ഗിയർ ലിവറിന് ചുറ്റുമുള്ള ഭാഗവും പുനർരൂപകൽപ്പന ചെയ്യുന്നുണ്ട്. അതിൽ വയർലെസ് ചാർജിംഗ് പാഡ് സ്ഥാപിച്ചേക്കും. മൂന്ന് ഡോറുകളുള്ള ഥാർ ഫെയ്‌സ്‌ലിഫ്റ്റിന്റെ സ്പൈ ഫോട്ടോകളിൽ എസ്‌യുവിയുടെ മുൻ ബമ്പർ പൂർണ്ണമായും പുനർരൂപകൽപ്പന ചെയ്‌തതായി കാണപ്പെടുന്നുണ്ട്. ഇത് കൂടുതൽ മസ്‍കുലാർ ലുക്ക് നൽകുന്നു എന്ന് തന്നെ പറയാം. പുതിയ സ്പൈ ഷോട്ടുകൾ, ഥാർ റോക്‌സിൽ നിന്ന് പ്രചോദനം ഉൾക്കൊണ്ട ഒരു രൂപമായിരിക്കും മോഡലിന് ലഭിക്കുകയെന്ന് സൂചന നൽകുന്നു.
പുതുക്കിയ പതിപ്പിൽ ശ്രേണിയിലുടനീളം ആറ് എയർബാഗുകൾ ഉൾപ്പെടുന്ന ഒരു പുതുക്കിയ സുരക്ഷാ സ്യൂട്ടും ഉൾപ്പെടുത്തിയേക്കാം. പുനർരൂപകൽപ്പന ചെയ്ത ഫ്രണ്ട് ഫാസിയയ്‌ക്കൊപ്പം പുതിയ സ്റ്റൈൽ ചെയ്ത അലോയ് വീലുകളും ഉണ്ടാകും . എസ്‌യുവി അതിന്റെ ലാഡർ – ഫ്രെയിം ഡിസൈനും എഞ്ചിൻ ഓപ്ഷനുകളും നിലനിർത്തും എന്നാണ് കമ്പനിയുടെ അറിയിപ്പ്. 1.5 ലിറ്റർ ഡീസൽ , 2.0 ലിറ്റർ ടർബോ പെട്രോൾ , 2.2 ലിറ്റർ ഡീസൽ പവർട്രെയിനുകളും മാറ്റമില്ലാതെ തുടരും. ഫെയ്‌സ്‌ലിഫ്റ്റ് ചെയ്ത പുതിയ മഹീന്ദ്ര ഥാർ സെപ്റ്റംബർ 25 ന് പുറത്തിറങ്ങുമെന്ന് പ്രതീക്ഷിക്കുന്നു. മഹീന്ദ്ര ഥാർ ഫെയ്‌സ്‌ലിഫ്റ്റിന്റെ വില 12.00 ലക്ഷം രൂപ മുതൽ 18.00 ലക്ഷം രൂപ വരെയാകുമെന്ന് പ്രതീക്ഷിക്കുന്നു.
