ലോകമെമ്പാടുമുള്ള ഭക്ഷണപ്രേമികളുടെ പ്രിയപ്പെട്ട വിഭവങ്ങളിൽ ഒന്നാണ് നൂഡിൽസ്. പലതരം നൂഡിൽസുകൾ ഉണ്ടെങ്കിലും, എഗ്ഗ് നൂഡിൽസ്അതിൽ പ്രധാനപ്പെട്ടതും ഏറെ രുചികരവുമായ ഒരിനമാണ്. സാധാരണയായി, മറ്റ് ചില നൂഡിൽസുകളിൽ മുട്ട ചേർക്കാറില്ല. എന്നാൽ എഗ്ഗ് നൂഡിൽസിൽ മുട്ട ഒരു നിർബന്ധിത ചേരുവയാണ്. മുട്ട ചേർക്കുന്നത് നൂഡിൽസിന് നല്ല മഞ്ഞ നിറം, മൃദുവായ ഘടന, ഒരു പ്രത്യേക രുചി എന്നിവ നൽകുന്നു. കൂടാതെ, മുട്ടയുടെ സാന്നിധ്യം കാരണം ഇതിന് അൽപ്പം കൂടുതൽ പ്രോട്ടീനും ലഭിക്കുന്നു.
വീട്ടിൽ സേമിയ ഉണ്ടെങ്കിൽ എഗ്ഗ് നൂഡിൽസ് വളരെ വേഗത്തിലും എളുപ്പത്തിലും തയാറാക്കാവുന്നതാണ്. കുട്ടികൾക്കും മുതിർന്നവർക്കും ഒരുപോലെ കഴിക്കാവുന്ന രുചികരമായ വിഭവമാണിത്. ബ്രേക്ക്ഫാസ്റ്റ് കഴിക്കാൻ മടിക്കുന്ന കുട്ടികൾക്ക് ഇതൊരു മികച്ച ഓപ്ഷനാണ്.
ചേരുവകൾ
സേമിയ
മുട്ട
വെള്ളം
എണ്ണ
കുരുമുളകുപൊടി
വെണ്ണ
സവാള
കാരറ്റ്
കാപ്സിക്കം
കാശ്മീരിമുളകുപൊടി
പഞ്ചസാര
മഞ്ഞൾപ്പൊടി
ഉപ്പ്
തയ്യാറാക്കുന്ന വിധം
ഒരു പാത്രം അടുപ്പിൽ വച്ച് അൽപ്പം വെള്ളം ഒഴിച്ച് തിളപ്പിക്കാം. വെള്ളം തിളച്ചു വരുമ്പോൾ 100 ഗ്രാം സേമിയ ഇതിലേക്കു ചേർക്കാം. ആവശ്യമെങ്കിൽ അൽപ്പം എണ്ണ കൂടി ചേർക്കാവുന്നതാണ്. സേമിയ വെന്തതിനു ശേഷം അടുപ്പണച്ച് അരിച്ചെടുത്ത് വെയ്ക്കാം. ഒരു പാൻ അടുപ്പിൽ വച്ച് അൽപ്പം എണ്ണ ഒഴിച്ച് വെണ്ണ ചേർത്തു ചൂടാക്കാം. അതിലേക്ക് രണ്ട് മുട്ട പൊട്ടിച്ചൊഴിച്ചിളക്കി ഉടക്കാം. സവാള ചെറുതായി അരിഞ്ഞതു ചേർത്ത് വഴറ്റുക.
അൽപ്പം കാശ്മീരിമുളകുപൊടി, മഞ്ഞൾപ്പൊടി, കാരറ്റ്, കാപ്സിക്കം എന്നിവ കൂടി ചേർത്ത് ഇളക്കുക. വേവിച്ചു വച്ച സേമിയ ചേർത്തിളക്കാം. അൽപ്പം കുരുമുളകുപൊടി, പഞ്ചസാര, ഉപ്പ് തുടങ്ങിയവ ചേർത്തിളക്കി യോജിപ്പിക്കാം. അടുപ്പിൽ നിന്ന് മാറ്റി, ഇഷ്ടാനുസരണം വിളമ്പി കഴിക്കുക.
