ഇന്ത്യന്‍ സമ്പദ്വ്യവസ്ഥയുടെ നെടുംതൂണുകളായ റിലയന്‍സ് ഇന്‍ഡസ്ട്രീസ് ഉടമ മുകേഷ് അംബാനിയും ആദിത്യ ബിര്‍ള ഗ്രൂപ്പിന്റെ ഉടമ കുമാര്‍ മംഗലം ബിര്‍ളയും ഇന്ത്യന്‍ ആഢംബര വിപണിയില്‍ തോളോട് തോള്‍ ചേര്‍ന്ന് ഏറ്റുമുട്ടാനൊരുങ്ങുന്നു. റിലയന്‍സിന്റെ ‘ജിയോ വേള്‍ഡ് പ്ലാസ’ യ്ക്ക് എതിരെ ബിര്‍ള ഗ്രൂപ്പ് ‘ഗാലറീസ് ലഫായെറ്റിനെ’ ആണ് കളത്തിലിറക്കുന്നത്. ഗുച്ചിയും ഡിയോറും മുതല്‍ സബ്യസാചിയും തരുണ്‍ താഹിലിയാനിയും വരെ വിപണിയിൽ ഏറ്റുമുട്ടും.
സമ്പന്നരായ ഇന്ത്യക്കാര്‍ ആഢംബര വസ്തുക്കള്‍ വിദേശത്ത് നിന്ന് വാങ്ങാനാണ് ഇഷ്ടപ്പെട്ടിരുന്നത്. ഇതാണ് ഇന്ത്യയിലെ ആഢംബര വിപണിയുടെ വളര്‍ച്ചയ്ക്ക് തടസ്സമായി നിന്ന ഒരു പ്രധാന ഘടകം. എന്നാല്‍, ലോകത്തിലെ ഏറ്റവും വലിയ ആഢംബര ബ്രാന്‍ഡുകളുടെ കടന്നുവരവും ജിയോ വേള്‍ഡ് പ്ലാസ, ഗാലറീസ് ലഫായെറ്റ് തുടങ്ങിയ സ്ഥാപനങ്ങള്‍ തമ്മിലുള്ള മത്സരവും ഈ രീതി മാറ്റുമെന്നാണ് പ്രതീക്ഷ.
ആദിത്യ ബിര്‍ള ഗ്രൂപ്പുമായി സഹകരിച്ച് ലോകപ്രശസ്ത ഫ്രഞ്ച് ആഢംബര ഡിപ്പാര്‍ട്ട്മെന്റ് സ്റ്റോറായ ‘ഗാലറീസ് ലഫായെറ്റ്’ മുംബൈയില്‍ ആരംഭിച്ചതാണ് ഇവരുടെ മത്സരത്തിന് ആക്കം കൂട്ടിയത്. ഗുച്ചി , ഡിയോര്‍ തുടങ്ങി ഡസന്‍ കണക്കിന് ലോകോത്തര ബ്രാന്‍ഡുകളുടെ ബൂട്ടിക്കുകള്‍ ഉള്ള റിലയന്‍സ് ഇന്‍ഡസ്ട്രീസിന്റെ ‘ജിയോ വേള്‍ഡ് പ്ലാസ’ ലക്ഷ്യമിടുന്ന അതേ ഉപഭോക്തൃ വിഭാഗത്തെയാണ് പുതിയ സംരംഭവും ഉന്നമിടുന്നത്.
റിലയന്‍സ് ബ്രാന്‍ഡ്സ് : ബാലെന്‍സിയാഗ , ബര്‍ബെറി , ടിഫാനി & കോ ഉള്‍പ്പെടെ 90-ല്‍ അധികം പ്രീമിയം, ആഢംബര ബ്രാന്‍ഡുകളുടെ വന്‍ ശേഖരം റിലയന്‍സ് ബ്രാന്‍ഡ്സ് സ്വന്തമാക്കിയിട്ടുണ്ട്. ഇവയില്‍ പലതും ദീര്‍ഘകാല ഫ്രാഞ്ചൈസി കരാറുകളാണ് . കൂടാതെ, മനീഷ് മല്‍ഹോത്ര, അബു ജാനി സന്ദീപ് ഖോസ്ല തുടങ്ങിയ പ്രമുഖ ഡിസൈനര്‍മാരുടെ സ്ഥാപനങ്ങളില്‍ ഓഹരികള്‍ വാങ്ങിക്കൊണ്ട് ഇന്ത്യന്‍ കൗച്ചര്‍ രംഗത്തേക്കും റിലയന്‍സ് കടന്നു കയറി.
ആദിത്യ ബിര്‍ള ഫാഷന്‍ & റീട്ടൈല്‍ : പ്രശസ്ത ഇന്ത്യന്‍ ഡിസൈനര്‍മാരായ സബ്യസാചി , തരുണ്‍ താഹിലിയാനി എന്നിവരുടെ സ്ഥാപനങ്ങളില്‍ ഭൂരിഭാഗം ഓഹരികളും സ്വന്തമാക്കിക്കൊണ്ട് തദ്ദേശീയമായ എത്നിക് ആഢംബര മേഖലയിലാണ് എബിഎഫ്ആര്‍എല്‍ ശ്രദ്ധ കേന്ദ്രീകരിക്കുന്നത്.
