കൂർഗ്കാരുടെ ഒരു പരമ്പരാഗത വിഭവമാണ് കടമ്പുട്ട്. അവരുടെ ആഘോഷവേളകളിലെ ഒഴിച്ചുകൂടാനാവാത്ത വിഭവമാണിത്. മലയാളികളുടെ കൊഴുക്കട്ടയ്ക്ക് സമാനമായ പലഹാരമാണിത്. അരിപ്പൊടി കുഴച്ച് ഉരുട്ടിയെടുത്ത് ഉള്ളിൽ ഏലയ്ക്കയും തേങ്ങയും ശർക്കരയും വരട്ടിയത് വയ്ക്കുന്നതാണ് കൊഴുക്കട്ട. കടമ്പുട്ട് തയ്യാറാക്കുമ്പോഴും പ്രധാന ചേരുവകളായി വരുന്നത് അരിപ്പൊടിയും തേങ്ങയുമാണ്. എന്നാൽ ശർക്കരയോ ഏലയ്ക്കയോ ചേർക്കുന്നില്ല.
ഈ പലഹാരത്തിന്റെ രുചിയെന്നു പറയുന്നത് തേങ്ങയാണ്. കടമ്പുട്ട് ചിക്കൻ കറിക്കൊപ്പമോ വെജിറ്റബിൾ കുറുമയോടൊപ്പമോ കഴിക്കാം. നമുക്ക് വീട്ടിൽ വളരെ എളുപ്പത്തിൽ കടമ്പുട്ട് തയ്യാറാക്കാനാവും. ശശികല തന്റെ സോഷ്യൽ മീഡിയ പേജിലൂടെയാണ് ഈ കൂർഗ് വിഭവം പരിചയപ്പെടുത്തി തരുന്നത്.
ചേരുവകൾ
അരിപ്പൊടി- 1 ഗ്ലാസ്
നെയ്യ്- 1 ടീസ്പൂൺ
വെള്ളം- 1.5 ഗ്ലാസ്
തേങ്ങ ചിരകിയത്- ആവശ്യത്തിന്
തയ്യാറാക്കുന്ന വിധം
അടി കട്ടിയുള്ള ഒരു പാത്രത്തിൽ ഒന്നര ഗ്ലാസ് വെള്ളമെടുക്കാം. അതിലേയ്ക്ക് ഒരു നുള്ള് ഉപ്പും ഒരു ടീസ്പൂൺ നെയ്യും ചേർത്ത് തിളപ്പിക്കാം. വെള്ളം നന്നായി തിളച്ചു വരുമ്പോൾ ഒരു ഗ്ലാസ് അരിപ്പൊടി ചേർക്കാം. അൽപ സമയം അടച്ചു വയ്ക്കാം. വെള്ളം വറ്റി തുടങ്ങുമ്പോൾ തേങ്ങ ചിരകിയതിൽ നിന്ന് കുറച്ചു ചേർത്ത് നന്നായി ഇളക്കി യോജിപ്പിക്കാം. അരിപ്പൊടി സോഫ്റ്റാകുന്നതു വരെ ഇളക്കാം. ശേഷം അടുപ്പണച്ച് തണുക്കാൻ വയ്ക്കാം.
കൈയ്യിൽ കുറച്ച് വെളിച്ചെണ്ണ പുരട്ടി മാവിൽ നിന്നും അൽപമെടുത്ത് ചെറിയ ഉരുളകളാക്കാം. തേങ്ങ ചിരകിയതിൽ ഉരുളകൾ മുക്കിയെടുക്കാം. ഈ ഉരുളകൾ ഇഡ്ഡലി പാത്രത്തിൽ വച്ച് ആവിയിൽ വേവിച്ചെടുക്കാം. ചൂടോടെ തന്നെ കഴിക്കുക. ചിക്കൻ കറിക്കൊപ്പം നല്ലൊരു കോമ്പിനേഷനാണിത്.
