മുംബൈ: ഈ മാസം 31 നു മുൻപായി ഇറ്റാലിയൻ സൂപ്പ‍‍ർ മോട്ടോർസൈക്കിൾ ബ്രാൻഡായ ഡ്യുക്കാറ്റിയുടെ ഡെസേർട്ട്എക്സ് റാലി വാങ്ങുമ്പോൾ ഉപഭോക്താക്കൾക്ക് 1.50 ലക്ഷം രൂപ വരെ സ്റ്റോർ ക്രെഡിറ്റ് ലഭിക്കും. വരും ദിവസങ്ങളിൽ അഡ്വഞ്ചർ ബൈക്ക് വാങ്ങാൻ പദ്ധതിയിടുന്നവർക്കായി കിടിലൻ ഓഫറാണ് ഡ്യുക്കാറ്റി അവതരിപ്പിച്ചിരിക്കുന്നത്.
കമ്പനി ബൈക്കിന് നേരിട്ടാവില്ല ഓഫർ നൽകുന്നത്. ഡ്യുക്കാട്ടി സ്റ്റോറിൽ ഉപയോഗിക്കാവുന്ന ഒരു ക്രെഡിറ്റ്, കമ്പനി ഉപഭോക്താക്കൾക്ക് നൽകും. ഈ ക്രെഡിറ്റ് ഉപയോഗിച്ച് നിങ്ങളുടെ ബൈക്കിനുള്ള ആക്‌സസറികൾ, റൈഡിംഗ് ഗിയർ, ജാക്കറ്റുകൾ, ഹെൽമെറ്റുകൾ, കമ്പനി ഉൽപ്പന്നങ്ങൾ എന്നിവ വാങ്ങാം.
രാജ്യത്തെ വിവിധ സംസ്ഥാനങ്ങൾക്കും വിവിധ ഭൂപ്രദേശങ്ങൾക്കും ഓരോ നഗരത്തിനും ഡീലർഷിപ്പുകൾക്കും സ്റ്റോക്കിനും നിറത്തിനും വേരിയന്‍റിനുമൊക്കെ അനുസരിച്ച് ലഭിക്കുന്ന ഓഫറുകളിൽ വ്യത്യാസമുണ്ടാകുമെന്നും കമ്പനി വ്യക്തമാക്കി. അതായത് ഈ കിഴിവ് നിങ്ങളുടെ നഗരത്തിലോ ഡീലറിലോ കൂടുതലോ കുറവോ ആയിരിക്കാം. അത്തരമൊരു സാഹചര്യത്തിൽ, ഒരു വാഹനം വാങ്ങുന്നതിന് മുമ്പ്, കൃത്യമായ കിഴിവ് കണക്കുകൾക്കും മറ്റ് വിവരങ്ങൾക്കുമായി നിങ്ങളുടെ തൊട്ടടുത്തുള്ള പ്രാദേശിക ഡീലറെ സമീപിക്കുക.
ഇന്ത്യൻ വിപണിയിൽ ഡ്യുക്കാട്ടി ഡെസേർട്ട്എക്സ് റാലിയുടെ എക്സ്-ഷോറൂം വില 23.71 ലക്ഷം രൂപയാണ്. ഓഫ്-റോഡിംഗിനും ദീർഘദൂര ടൂറിംഗിനുമായി പ്രത്യേകം രൂപകൽപ്പന ചെയ്‌തിരിക്കുന്ന റാലി എഡിഷൻ ശക്തമായ പ്രകടനവും പരുക്കൻ രൂപവും നൽകുന്നു. വൈവിധ്യമാർന്ന ഭൂപ്രകൃതികൾക്കായി നിർമ്മിച്ച ഡെസേർട്ട്എക്സ് റാലിയിൽ, ബീക്ക്-സ്റ്റൈൽ ഫ്രണ്ട് മഡ്ഗാർഡും എക്സ്റ്റൻഡഡ് ട്രാവൽ ഫീച്ചർ ചെയ്യുന്ന കയാബ സസ്പെൻഷനും ഉണ്ട്.
പുതുതായി വികസിപ്പിച്ച സെൻട്രൽ-സ്പോക്ക്ഡ് വീലുകൾ പരമ്പരാഗത അലോയ് റിമ്മുകളെ അപേക്ഷിച്ച് ആഘാത പ്രതിരോധം കൂടുതൽ മെച്ചപ്പെടുത്തുന്നു, ഇത് ദുർഘടമായ പാതകളിൽ കൂടുതൽ പ്രതിരോധശേഷിയുള്ളതാക്കുന്നു. 937 സിസി ഡ്യുക്കാട്ടി ടെസ്റ്റസ്ട്രെറ്റ 11° ട്വിൻ-സിലിണ്ടർ എഞ്ചിൻ ആണ് ഈ ബൈക്കിന്‍റെ ഹൃദയം. ഈ എഞ്ചിൻ 9,250 rpm-ൽ 108 bhp കരുത്തും 6,500 rpm-ൽ 92 Nm ടോർക്കും നൽകുന്നു.
