തിരുവനന്തപുരം: ‘വാനോളം മലയാളം, ലാല്‍ സലാം’ എന്ന പേരില്‍ സംസ്ഥാന സര്‍ക്കാര്‍ മോഹൻലാലിനെ ആദരിക്കാനൊരുങ്ങുന്നു. ദാദാ സാഹിബ് ഫാൽക്കേ അവാർഡ് നേടിയതിനാണ് മോഹൻലാലിനെ ആദരിക്കുന്നത്. ശനിയാഴ്ച വൈകീട്ട് അഞ്ച് മണിക്ക് തിരുവനന്തപുരം സെൻട്രൽ നടക്കുന്ന ചടങ്ങിലാണ് മോഹൻലാലിനെ ആദരിക്കുക.
21 വർഷങ്ങൾക്ക് ശേഷമാണ് ചലച്ചിത്ര മേഖലയിലെ പ്രഥമ പുരസ്കാരമായ ദാദാ സാഹേബ് ഫാൽക്കേ അവാർഡ് മോഹൻലാലിലൂടെ മലയാള സിനിമയിലേക്ക് എത്തിയിരിക്കുന്നത്. 2023 ലെ സമഗ്ര സംഭാവനയ്ക്കുള്ള പുരസ്കാരമാണ് മോഹൻലാലിനെ തേടിയെത്തിയത്. 2004 ൽ സംവിധാന രംഗത്തെ മികവിന് അടൂർ ഗോപാലകൃഷ്ണനും പുരസ്കാരം നേടിയിരുന്നു.
നാൽപ്പത്തിയെട്ട് വർഷത്തെ അഭിനയ ജീവിതത്തിനിടെ ഇന്ത്യൻ ചലച്ചിത്രങ്ങൾക്ക് നൽകിയ സമഗ്ര സംഭാവന പരിഗണിച്ച് 2001 ൽ രാജ്യത്തെ നാലാമത്തെ ഉയർന്ന ബഹുമതിയായ പത്മശ്രീ പുരസ്കാരവും 2019 ൽ രാജ്യത്തെ മൂന്നാമത്തെ ഉയർന്ന ബഹുമതിയായ പത്മഭൂഷണും നൽകി ഭാരത സർക്കാർ മോഹൻലാലിനെ ആദരിച്ചിട്ടുണ്ട്.
അതേസമയം ലാൽസലാം എന്ന് പരിപാടിയുടെ പേരിനൊപ്പം ചേർത്തത് വിവാദമാക്കേണ്ടെന്ന് മന്ത്രി സജി ചെറിയാൻ പറഞ്ഞു. അത് ലാലിനുള്ള സലാം എന്നു മാത്രമാണ് അർത്ഥമാക്കിയതെന്നാണ് സജി ചെറിയാൻ പറയുന്നത്.
