ന്യൂഡൽഹി: എൽപിജി ഗ്യാസ് സേവനത്തിൽ തൃപ്തരല്ലെങ്കിൽ ഇനി ഏത് കമ്പനിയിലേക്കും പോർട്ട് ചെയ്യാൻ അവസരമൊരുങ്ങുന്നു. നിലവിൽ ഉപഭോക്താക്കൾക്ക് വിതരണക്കാരെ മാറ്റാൻ മാത്രമാണ് കഴിയുന്നത്. ഇതിനായി റെഗുലേറ്ററി ബോർഡ് ഓഹരി ഉടമകളുടേയും ഉപഭോക്താക്കളുടേയും അഭിപ്രായം തേടി.
ഈ സംവിധാനം യാഥാർഥ്യമായാൽ കണക്ഷൻ മാറ്റാതെ തന്നെ മറ്റു എൽപിജി കമ്പനികളുടെ സേവനങ്ങൾ ലഭ്യമാകും. കൂടാതെ കമ്പനികൾക്കിടയിൽ കൂടുതൽ മത്സരം വരികയും മികവുറ്റ സേവനം ഉപഭോക്താക്കൾക്ക് നൽകാൻ കമ്പനികൾ നിർബന്ധിതരാകുകയും ചെയ്യും. ഇൻഡെൻ, ഭാരത്, എച്ച്പി തുടങ്ങിയ കമ്പനികൾ എൽപിജി മേഖലയിൽ പ്രവർത്തിക്കുന്നുണ്ട്. ആകെ ഉപഭോക്താക്കളുടെ എണ്ണത്തിൽ ഇൻഡെൻ ഗ്യാസാണ് മുമ്പിൽ. 15 കോടി ഉപഭോക്താക്കളാണ് ഇൻഡെനുള്ളത്. ഭാരത് ഗ്യാസിന് 8 കോടിയും. എച്ച്പി ഉപഭോക്താക്കളുടെ എണ്ണവും കുറവല്ല.
പാചകവാതക വിതരണം നിയന്ത്രിക്കുന്ന പെട്രോളിയം ആന്റ് നാച്ചുറൽ ഗ്യാസ് റെഗുലേറ്ററി ബോർഡ് (പിഎൻജിആർബി) ഇതിന്റെ ചട്ടക്കൂട് രൂപീകരിക്കാനുള്ള നടപടികളാരംഭിച്ചു. ഇതിനായി ഓഹരി ഉടമകളുടേയും ഉപഭോക്താക്കളുടേയും അഭിപ്രായങ്ങൾ ക്ഷണിച്ചു. ഒക്ടോബർ പകുതി വരെ ഇത് സമർപ്പിക്കാം. 2013 ഒക്ടോബറിൽ യുപിഎ സർക്കാർ 13 സംസ്ഥാനങ്ങളിലെ 24 ജില്ലകളിൽ പരീക്ഷണാർഥം എൽപിജി ഗ്യാസ് വിതരണക്കാരെ മാറ്റാൻ സംവിധാനം ഒരുക്കി. പിന്നീട് 2014 ജനുവരിയിൽ 480 ജില്ലകളിൽ ഇത് നടപ്പിലാക്കി. ഇതേ രീതിയിൽ കമ്പനികളേയും ഉപഭോക്താക്കൾക്ക് മാറ്റാനാകുമോ എന്ന പരിശോധനയാണ് ഇപ്പോൾ നടത്തുന്നത്.
2025 സാമ്പത്തിക വർഷത്തെ കണക്കനുസരിച്ച് ഇന്ത്യയിൽ 32 കോടിയിലധികം പാചകവാതക കണക്ഷനുകളാണ് ഉള്ളത്. സേവനങ്ങളിലെ പോരായ്മകൾ ചൂണ്ടിക്കാട്ടുന്ന 17 ലക്ഷത്തിലധികം ഉപഭോക്തൃ പരാതികൾ ഉണ്ടായിട്ടുണ്ട്. എന്നാൽ കണക്ഷൻ മാറ്റുകയെന്നത് ചിലവേറിയ കാര്യമായതിനാൽ ഉപഭോക്താക്കൾ പ്രശ്നങ്ങൾ സഹിച്ച് മുന്നോട്ടു പോകുകയാണ് ചെയ്തിരുന്നത്. പുതിയ സംവിധാനത്തിലൂടെ ഇതിൽ പരിഹാരമാകുമെന്നാണ് പ്രതീക്ഷിക്കുന്നത്.
