വിയറ്റ്നാം: വിയറ്റ്നാം തീരത്ത് ശക്തമായി വീശാൻ സാധ്യതയുള്ള ബുവാലോയ് ചുഴലിക്കാറ്റിന്റെ ആഘാതം കുറയ്ക്കാനായി രണ്ടര ലക്ഷത്തോളം പേരെ തീരപ്രദേശത്തു മാറ്റിയേക്കും. കാലവസ്ഥാ നിരീക്ഷണകേന്ദ്രത്തിന്റെ അറിയിപ്പിനെ തുടർന്നാണ് നടപടി. രാജ്യത്തെ പ്രധാന സ്റ്റീൽ നിർമാണശാലകളുൾപ്പെടുന്ന ഭാഗത്തും ഒഴിപ്പിക്കൽ നടപടി ആരംഭിച്ചിട്ടുണ്ട്.
വിയറ്റ്നാമിൽ ഈ വർഷമുണ്ടായ പത്താമത്തെ ചുഴലിക്കാറ്റാണിത്. കൃഷിമന്ത്രാലയത്തിന്റെ കണക്കുകൾ പ്രകാരം വിയറ്റ്നാമിൽ ഒരു വർഷത്തിനിടെ 100 ലധികം പേർ പ്രകൃതി ദുരന്തങ്ങളിൽ മരിക്കുകയോ കാണാതാകുകയോ ചെയ്തിട്ടുണ്ട്. കഴിഞ്ഞ വർഷം സെപ്റ്റംബറിൽ വിയറ്റ്നാമിൽ ഉണ്ടായ യാഗി കൊടുങ്കാറ്റിൽ വ്യപക നാശനഷ്ടങ്ങൾ റിപ്പോർട്ടു ചെയ്തിരുന്നു. നൂറുകണക്കിന് ആളുകളായിരുന്നു അന്ന് മരിച്ചത്.
133 കിലോമീറ്റർ വേഗതയിലായിരിക്കും ഇത്തവണ കാറ്റടിക്കുക. ഇപ്പോൾ കടലിൽ അനുഭവപ്പെടുന്ന ബുവാലോയ് ഞായറാഴ്ച്ച വൈകീട്ടോടെ വിയറ്റ്നാം തീരം തൊടുമെന്നാണ് കാലാവസ്ഥാ നിരീക്ഷണകേന്ദ്രത്തിന്റെ അറിയിപ്പ്. കാറ്റ് അതിവേഗതയിലുള്ളതാണെന്നും ശക്തമായ മഴ, മണ്ണിടിച്ചിൽ, വെള്ളപ്പൊക്കം, തീരദേശങ്ങൾ വെള്ളത്തിനടിയിലാവൽ തുടങ്ങിയ പ്രത്യാഘാതങ്ങൾ പ്രതീക്ഷിക്കുന്നതായും കേന്ദ്രം വ്യക്തത വരുത്തുന്നു.
സെൻട്രൽ വിയറ്റ്നാമിലെ ഏറ്റവും വലിയ നഗരമായ ദനാങ്ങിൽ നിന്ന് 2,10,000 പേരെ ഒഴിപ്പിക്കും. ഹ്യൂവിലെ തീരപ്രദേശത്തു നിന്ന് 32,000 പേരെയാകും ഒഴിപ്പിക്കുക. സ്റ്റീൽ നിർമാണത്തിന്റെ ഹബ്ബായ ഹാ തിന്നിൽ നിന്ന് 15,000 പേരെയും സുരക്ഷിതകേന്ദ്രങ്ങളിലേക്കു മാറ്റും. സുരക്ഷിതമായ സ്കൂളുകളിലേക്കോ ആരോഗ്യകേന്ദ്രങ്ങളിലേക്കോ മറ്റു താത്കാലിക ക്യാമ്പുകളിലേക്കോ ആകും ഇവരെ മാറ്റുക. തീരത്തു നിന്ന് പുറപ്പെട്ട എല്ലാ മത്സ്യബന്ധന ബോട്ടുകളെയും തിരിച്ചു വിളിച്ചു. നാല് ആഭ്യന്തര വിമാനത്താവളങ്ങൾ അടച്ചു. അടിയന്തര സാഹചര്യങ്ങൾ നേരിടാനായി 1,17,000 സൈനികരെയാണ് വിന്യസിച്ചിരിക്കുന്നത്.
