ബെംഗളൂരു: വ്യാജരേഖ ചമച്ചതിന് മുൻ ശുചീകരണ തൊഴിലാളിക്കെതിരെ ധർമ്മസ്ഥല കൂട്ട ശവസംസ്കാര കേസ് അന്വേഷിക്കുന്ന പ്രത്യേക അന്വേഷണ സംഘം (എസ്‌ഐടി) കുറ്റം ചുമത്തി. മുൻ ശുചീകരണ തൊഴിലാളി ചിന്നയ്യയ്‌ക്കെതിരെ ഭാരതീയ ന്യായ സംഹിത (ബിഎൻഎസ്) പ്രകാരം പത്ത് പുതിയ കുറ്റങ്ങൾ കൂടി ചേർത്തു. കള്ളസാക്ഷ്യം, വ്യാജരേഖ ചമയ്ക്കൽ, തെളിവുകൾ കെട്ടിച്ചമയ്ക്കൽ എന്നിവയുമായി ബന്ധപ്പെട്ടതാണ് പുതിയ കുറ്റങ്ങൾ.
കേസിലെ യഥാർത്ഥ കുറ്റപത്രങ്ങളിൽ മാറ്റമില്ലെന്ന് പോലീസ് ഉദ്യോഗസ്ഥർ പറഞ്ഞു. കണ്ടെടുത്ത മനുഷ്യാവശിഷ്ടങ്ങൾ, കാണാതായവരുടെ കേസുകൾ, നിരവധി അസ്വാഭാവിക മരണ റിപ്പോർട്ടുകൾ (യുഡിആർ) എന്നിവയെക്കുറിച്ചുള്ള അന്വേഷണം തുടരുകയാണ്. ബെൽത്തങ്ങാടി കോടതിയിൽ സമർപ്പിച്ച തലയോട്ടിയുമായി ബന്ധപ്പെട്ട കേസിലാണ് പുതുതായി ചേർത്ത വകുപ്പുകൾ, അതേ എഫ്‌ഐആറിൽ അവയും ഉൾപ്പെടുത്തിയിട്ടുണ്ടെന്ന് മുതിർന്ന ഉദ്യോഗസ്ഥൻ മാധ്യമങ്ങളോട് പറഞ്ഞു. ധർമ്മസ്ഥല ക്ഷേത്ര ഭരണസമിതിയിലെ മുൻ ശുചീകരണ തൊഴിലാളിയായ ചിന്നയ്യ, 70–80 മൃതദേഹങ്ങൾ പലയിടങ്ങളിലായി കുഴിച്ചിട്ടതായി നേരത്തെ അവകാശപ്പെട്ടിരുന്നു. തെളിവായി അദ്ദേഹം കോടതിയിൽ ഒരു തലയോട്ടി ഹാജരാക്കിയിരുന്നു. ഈ സംഭവത്തിലാണ് പുതിയ നടപടികൾ.
വ്യാജരേഖ ചമയ്ക്കൽ, തെളിവുകൾ കെട്ടിച്ചമയ്ക്കൽ, തെളിവ് നശിപ്പിക്കൽ, വ്യാജ സാക്ഷ്യം എന്നീ കുറ്റങ്ങളാണ് എസ്‌ഐടി പ്രതിക്കെതിരെ ചുമത്തിയിരിക്കുന്നത്. രാത്രി മുഴുവൻ നീണ്ട ചോദ്യം ചെയ്യലിനുശേഷമാണ് ചിന്നയ്യയെ പോലീസ് അറസ്റ്റ് ചെയ്തത്. തെറ്റായ വിവരങ്ങൾ നൽകി അയാൾ തങ്ങളെ തെറ്റിദ്ധരിപ്പിച്ചതായി അന്വേഷണ ഉദ്യോഗസ്ഥർ ആരോപിച്ചു. തിരിച്ചറിഞ്ഞ 15 സ്ഥലങ്ങളിൽ നിന്ന് ഒരു പുരുഷന്റെ അസ്ഥികൂട അവശിഷ്ടങ്ങൾ മാത്രമേ കണ്ടെടുത്തിട്ടുള്ളൂ.
മുൻ പ്രസ്താവനകളിൽ, ചില മൃതദേഹങ്ങളിൽ ലൈംഗികാതിക്രമത്തിന്റെ ലക്ഷണങ്ങൾ ഉണ്ടായിരുന്നതായി ചിന്നയ്യ ആരോപിച്ചിരുന്നു. ക്ഷേത്രത്തെ അപകീർത്തിപ്പെടുത്താൻ താൻ ശ്രമിച്ചിട്ടില്ലെന്ന് ചിന്നയ്യ തറപ്പിച്ചു പറഞ്ഞു. ചിന്നയ്യയുടെ അവകാശവാദങ്ങൾ കെട്ടിച്ചമച്ചതാണെന്ന് എസ്‌ഐടി കണ്ടെത്തിയാൽ നടപടിയെടുക്കുമെന്ന് കർണാടക ആഭ്യന്തര മന്ത്രി ജി പരമേശ്വര നിയമസഭയെ അറിയിച്ചിരുന്നു. കൂട്ട ശവസംസ്കാര ആരോപണങ്ങളെക്കുറിച്ചുള്ള അന്വേഷണം വഴിതെറ്റിക്കാനുള്ള ബോധപൂർവമായ ശ്രമത്തിന്റെ ഭാഗമാണോ തലയോട്ടിയും അനുബന്ധ വസ്തുക്കളും കോടതിയിൽ സമർപ്പിച്ചതെന്ന് എസ്‌ഐടി ഇപ്പോൾ പരിശോധിച്ചുവരികയാണ്.
