ശൈത്യകാലത്ത് നെഞ്ചുവേദന അനുഭവപ്പെടുന്നത് സാധാരണമാണെങ്കിലും അത് വെറുമൊരു മസിൽ വേദനയാണോ അതോ ഹൃദയാഘാതമാണോ എന്ന് തിരിച്ചറിയേണ്ടത് അത്യന്താപേക്ഷിതമാണ്. തണുപ്പുകാലത്ത് രക്തക്കുഴലുകൾ സങ്കോചിക്കുന്നത് രക്തസമ്മർദ്ദം വർദ്ധിക്കാനും ഹൃദയത്തിന് കൂടുതൽ സമ്മർദ്ദം നൽകാനും കാരണമാകുന്നു. ഇതിനുപുറമെ ശ്വാസകോശ സംബന്ധമായ അണുബാധകൾ, ഭക്ഷണരീതിയിലുണ്ടാകുന്ന മാറ്റങ്ങൾ മൂലമുള്ള അസിഡിറ്റി തുടങ്ങിയവയും നെഞ്ചുവേദനയ്ക്ക് കാരണമാകാം. പ്രമുഖ കാർഡിയോളജിസ്റ്റ് ഡോ. സുനിൽ വധ്വ ശൈത്യകാലത്തെ നെഞ്ചുവേദനയെക്കുറിച്ച് പറയുന്നത് നോക്കാം.
ഹൃദയാഘാതവും സാധാരണ വേദനയും എങ്ങനെ തിരിച്ചറിയാം?
നെഞ്ചുവേദന അനുഭവപ്പെടുമ്പോൾ അത് ഹൃദയസംബന്ധമാണോ എന്ന് തിരിച്ചറിയാൻ ചില വ്യത്യാസങ്ങൾ ശ്രദ്ധിക്കുക. സാധാരണ വേദനയാണെങ്കിൽ കുത്തുന്നതുപോലെയുള്ള വേദനയായിരിക്കും. ചുമയ്ക്കുമ്പോഴോ ശ്വാസം ആഞ്ഞു വലിക്കുമ്പോഴോ അല്ലെങ്കിൽ നടക്കുമ്പോഴോ വേദന കൂടുകയും കുറച്ചു സമയം കഴിഞ്ഞ് മാറുകയും ചെയ്യുന്നു. ഹൃദയാഘാതമാണെങ്കിൽ നെഞ്ചിൽ കടുത്ത ഭാരം കയറ്റിവെച്ചതുപോലെയോ വരിഞ്ഞുമുറുക്കുന്നതുപോലെയോ തോന്നും. ഈ വേദന സാധാരണയായി 15-20 മിനിറ്റിലധികം നീണ്ടുനിൽക്കും.
ഹൃദയാഘാതത്തിന്റെ വേദന പലപ്പോഴും താടിയെല്ല്, കഴുത്ത്, പുറംഭാഗം അല്ലെങ്കിൽ കൈകളിലേക്ക് പടരാൻ സാധ്യതയുണ്ട്. അമിതമായ വിയർപ്പ്, ശ്വാസംമുട്ടൽ, ഓക്കാനം, തലകറക്കം എന്നിവ ഹൃദയാഘാതത്തിന്റെ പ്രധാന ലക്ഷണങ്ങളാണ്. മസിൽ വേദനയ്ക്ക് സാധാരണ ഇത്തരം ലക്ഷണങ്ങൾ ഉണ്ടാകാറില്ല.
എപ്പോൾ ഡോക്ടറെ കാണണം?
ശ്വാസംമുട്ടലോ കടുത്ത വിയർപ്പോ ഉണ്ടായാൽ, വേദന കൈകളിലേക്കോ താടിയെല്ലിലേക്കോ പടരുന്നുണ്ടെങ്കിൽ, പ്രമേഹം, അമിത രക്തസമ്മർദ്ദം, കൊളസ്ട്രോൾ എന്നിവയുള്ളവർക്ക് ചെറിയ അസ്വസ്ഥത തോന്നിയാൽ പോലും ഉടൻ പരിശോധന നടത്തണം.
മുൻകരുതലുകൾ
ശരീരം എപ്പോഴും ചൂടാക്കി നിർത്തുക. തണുപ്പിൽ നിന്നും സംരക്ഷണം നൽകുന്ന വസ്ത്രങ്ങൾ ധരിക്കുക. തണുപ്പത്ത് കഠിനമായ വ്യായാമങ്ങൾ ഒഴിവാക്കി, പതുക്കെ ശരീരത്തെ വ്യായാമത്തിലേക്ക് ശീലിപ്പിക്കുക. അമിതമായി ഭക്ഷണം കഴിക്കുന്നത് ഒഴിവാക്കുക. ഇത് അസിഡിറ്റി കുറയ്ക്കാനും ഹൃദയാരോഗ്യം നിലനിർത്താനും സഹായിക്കും. ദാഹം തോന്നിയില്ലെങ്കിലും ശരീരം ഹൈഡ്രേറ്റഡ് ആയി നിലനിർത്തുക.
നെഞ്ചുവേദനയെ ഒരിക്കലും നിസ്സാരമായി കാണരുത്. സംശയം തോന്നിയാൽ ഉടൻ തന്നെ ഒരു ഡോക്ടറുടെ ഉപദേശം തേടുന്നത് ജീവൻ രക്ഷിക്കാൻ സഹായിക്കും.
