നല്ല ഉറക്കം ആരോഗ്യത്തിന് അത്യാവശ്യമാണ്, എന്നാൽ പലപ്പോഴും പിരിമുറുക്കം നിറഞ്ഞ ചിന്തകൾ കാരണം നമുക്ക് ഉറക്കം ലഭിക്കാറില്ല. ഉറങ്ങുന്നതിന് മുമ്പ് മനസ്സിനെ ശാന്തമാക്കാൻ സഹായിക്കുന്ന അഞ്ച് ശീലങ്ങൾ അറിഞ്ഞിരിക്കാം.
- കഠിനമായ വ്യായാമങ്ങൾ ഒഴിവാക്കുക
പകൽ സമയത്ത് വ്യായാമം ചെയ്യുന്നത് രാത്രിയിൽ ശരീരത്തിന് ഉറങ്ങാനുള്ള സമയം അറിയിക്കുന്ന മെലറ്റോണിൻ എന്ന ഹോർമോണിന്റെ ഉത്പാദനം വർദ്ധിപ്പിക്കും. എന്നാൽ ഉറങ്ങുന്നതിന് തൊട്ടുമുമ്പ് കഠിനമായ വ്യായാമങ്ങൾ ഒഴിവാക്കുക, കാരണം ഇത് നിങ്ങളെ കൂടുതൽ ഉന്മേഷവാന്മാരാക്കും. രാവിലെയോ വൈകുന്നേരമോ വ്യായാമം ചെയ്യുന്നതാണ് ഉചിതം.
- കട്ടിൽ ഉറങ്ങാൻ മാത്രം ഉപയോഗിക്കുക
നമ്മുടെ മസ്തിഷ്കം സാഹചര്യങ്ങളുമായി വേഗത്തിൽ പൊരുത്തപ്പെടും. നിങ്ങൾ കിടക്കയിൽ ഇരുന്ന് ജോലി ചെയ്യുകയോ ഫോൺ ഉപയോഗിക്കുകയോ ചെയ്താൽ, മസ്തിഷ്കം ആ സ്ഥലത്തെ ഉണർന്നിരിക്കേണ്ട ഇടമായി കണക്കാക്കും. അതിനാൽ ഉറങ്ങാനും വിശ്രമിക്കാനും മാത്രമായി കിടക്ക ഉപയോഗിക്കുക. കിടന്ന് 20 മിനിറ്റിനുള്ളിൽ ഉറക്കം വന്നില്ലെങ്കിൽ, എഴുന്നേറ്റ് പോയി നേരിയ വെളിച്ചത്തിൽ പുസ്തകം വായിക്കുകയോ ശരീരം സ്ട്രെച്ച് ചെയ്യുകയോ ചെയ്യുന്നത് നല്ലതാണ്.
- ഉറങ്ങുന്നതിന് മുൻപുള്ള ചിട്ടകൾ
നമ്മുടെ തലച്ചോറിന് പെട്ടെന്ന് ഒരു സ്വിച്ച് ഇട്ടതുപോലെ ഉറക്കത്തിലേക്ക് മാറാൻ കഴിയില്ല. ഉറങ്ങുന്നതിന് 30 മിനിറ്റ് മുമ്പ് ലൈറ്റുകൾ അണയ്ക്കുകയോ വെളിച്ചം കുറയ്ക്കുകയോ ചെയ്യുക. ഫോൺ, ടിവി എന്നിവയിൽ നിന്ന് വിട്ടുനിൽക്കുക. ഈ സമയത്ത് ഡയറി എഴുതുകയോ, ശ്വസന വ്യായാമങ്ങൾ ചെയ്യുകയോ ആകാം.
- ഭക്ഷണക്രമത്തിൽ ശ്രദ്ധിക്കുക
ഉറങ്ങുന്നതിന് മുൻപ് കഴിക്കുന്ന ഭക്ഷണം ഉറക്കത്തെ ബാധിക്കും. ചായ, കാപ്പി, ചോക്ലേറ്റ് എന്നിവ രാത്രിയിൽ ഒഴിവാക്കുന്നത് നല്ലതാണ്. കനത്തതോ എരിവുള്ളതോ ആയ ഭക്ഷണം ദഹനക്കേടുണ്ടാക്കും. രാത്രി വിശക്കുന്നുണ്ടെങ്കിൽ നേരിയ അളവിൽ പഴങ്ങളോ നട്സോ കഴിക്കാവുന്നതാണ്.
- മനസ്സിലെ ഭാരങ്ങൾ ഇറക്കിവെക്കുക
പലപ്പോഴും വരാനിരിക്കുന്ന കാര്യങ്ങളെക്കുറിച്ചുള്ള ആധിയാണ് ഉറക്കം കെടുത്തുന്നത്. അത്തരം കാര്യങ്ങൾ ഒരു ഡയറിയിലോ പേപ്പറിലോ കുറിച്ചുവെക്കുന്നത് മനസ്സിന് ഒരു ആശ്വാസം നൽകും. അതിനുശേഷം ഏതാനും മിനിറ്റുകൾ ദീർഘമായി ശ്വസിക്കുന്നത് മനസ്സിനെ ശാന്തമാക്കാൻ സഹായിക്കും.
