പഞ്ചസാര കാൻസർ കോശങ്ങളെ ‘തീറ്റിപ്പോറ്റുന്നു’ എന്ന ധാരണ നമ്മുടെ ഇടയിൽ ശക്തമാണ്. അതുകൊണ്ടുതന്നെ ഭക്ഷണത്തിൽ നിന്ന് പഞ്ചസാര പൂർണ്ണമായും ഒഴിവാക്കുന്നത് കാൻസറിനെ തോൽപ്പിക്കാൻ സഹായിക്കുമെന്ന് പലരും വിശ്വസിക്കുന്നു. എന്നാൽ ഇതിൽ എത്രത്തോളം വാസ്തവമുണ്ടെന്ന് വിശദീകരിക്കുകയാണ് റായ്പൂരിലെ പ്രമുഖ ഓങ്കോളജിസ്റ്റ് ഡോ.ജയേഷ് ശർമ്മ.
പഞ്ചസാരയും കാൻസറും തമ്മിലുള്ള ബന്ധം
കാൻസർ കോശങ്ങൾ സാധാരണ കോശങ്ങളെക്കാൾ വേഗത്തിൽ വളരുന്നതിനാൽ അവയ്ക്ക് കൂടുതൽ ഊർജ്ജം ആവശ്യമാണ്. ഈ ഊർജ്ജത്തിനായി അവ ഗ്ലൂക്കോസിനെയാണ് പ്രധാനമായും ആശ്രയിക്കുന്നത്. ഇതാണ് ‘പഞ്ചസാര കാൻസറിനെ വളർത്തുന്നു’ എന്ന വാദത്തിന് പിന്നിലെ ശാസ്ത്രീയ വശം. എന്നാൽ, പഞ്ചസാര പൂർണ്ണമായും ഒഴിവാക്കുന്നത് കൊണ്ട് മാത്രം കാൻസറിനെ ഇല്ലാതാക്കാൻ കഴിയില്ലെന്ന് ഡോക്ടർമാർ വ്യക്തമാക്കുന്നു.
എന്തുകൊണ്ട് പഞ്ചസാര പൂർണ്ണമായും ഒഴിവാക്കരുത്?
നമ്മുടെ ശരീരത്തിലെ ആരോഗ്യകരമായ കോശങ്ങൾക്കും പ്രവർത്തിക്കാൻ ഗ്ലൂക്കോസ് ആവശ്യമാണ്. പഞ്ചസാര തീർത്തും ഒഴിവാക്കിയാൽ അത് ശരീരത്തിന്റെ മൊത്തത്തിലുള്ള ഊർജ്ജത്തെയും പ്രതിരോധശേഷിയെയും ബാധിച്ചേക്കാം. കാൻസർ ചികിത്സയുടെ ഭാഗമായുള്ള കീമോതെറാപ്പി പോലെയുള്ള കഠിനമായ പ്രക്രിയകളിലൂടെ കടന്നുപോകുന്ന രോഗികൾക്ക് ആവശ്യത്തിന് ഊർജ്ജം ലഭിക്കേണ്ടത് അനിവാര്യമാണ്.
ശ്രദ്ധിക്കേണ്ട കാര്യങ്ങൾ
അമിത ഉപയോഗം ഒഴിവാക്കുക: പഞ്ചസാര നേരിട്ട് കാൻസറിന് കാരണമാകുന്നില്ലെങ്കിലും, അമിതമായ പഞ്ചസാരയുടെ ഉപയോഗം അമിതവണ്ണത്തിന് കാരണമാകുന്നു. അമിതവണ്ണം പലതരത്തിലുള്ള കാൻസർ സാധ്യതകൾ വർദ്ധിപ്പിക്കുമെന്ന് പഠനങ്ങൾ പറയുന്നു.
സംസ്കരിച്ച പഞ്ചസാര വേണ്ട: മധുരപാനീയങ്ങൾ, മിഠായികൾ, കേക്കുകൾ തുടങ്ങിയവയിലുള്ള സംസ്കരിച്ച പഞ്ചസാര നിയന്ത്രിക്കുന്നത് ആരോഗ്യത്തിന് നല്ലതാണ്.
പഴങ്ങൾ കഴിക്കാം: പഴങ്ങളിൽ സ്വാഭാവികമായുള്ള മധുരം ശരീരത്തിന് ഹാനികരമല്ല. അവയിലുള്ള ഫൈബറും വിറ്റാമിനുകളും ശരീരത്തിന് ഗുണകരമാണ്.
പഞ്ചസാര ഉപേക്ഷിക്കുന്നത് കൊണ്ട് മാത്രം കാൻസറിനെ പ്രതിരോധിക്കാമെന്നത് ഒരു മിഥ്യാധാരണയാണ്. കൃത്യമായ വ്യായാമം, പോഷകഗുണമുള്ള ആഹാരം, ആരോഗ്യകരമായ ഭാരം നിലനിർത്തൽ എന്നിവയാണ് കാൻസർ തടയാൻ അത്യാവശ്യം. ഏതെങ്കിലും തരത്തിലുള്ള കർശനമായ ഡയറ്റ് പിന്തുടരുന്നതിന് മുൻപ് വിദഗ്ദ്ധനായ ഒരു ഡോക്ടറുടെ ഉപദേശം തേടേണ്ടത് പ്രധാനമാണ്.
