ഉയർന്ന രക്തസമ്മർദ്ദം അഥവാ ഹൈപ്പർടെൻഷൻ ഇന്ന് ലോകമെമ്പാടും വലിയൊരു ഭീഷണിയാണ്. പലപ്പോഴും കൃത്യമായ ലക്ഷണങ്ങൾ കാണിക്കാതെ ശരീരാരോഗ്യത്തെ തകർക്കുന്നതിനാൽ ഇതിനെ ‘നിശബ്ദ കൊലയാളി’ എന്ന് വിളിക്കുന്നു. നാം നിത്യജീവിതത്തിൽ ചെയ്യുന്ന ചില ചെറിയ കാര്യങ്ങൾ പോലും രക്തസമ്മർദ്ദം കൂടാൻ കാരണമാകുമെന്ന് അമേരിക്കൻ ഡോക്ടറായ ഡോ. കുനാൽ സൂദ് മുന്നറിയിപ്പ് നൽകുന്നു. രക്തസമ്മർദ്ദം നിശബ്ദമായി വർദ്ധിപ്പിക്കുന്ന ആ 5 ശീലങ്ങൾ ഇവയാണ്.
- ഉറക്കമില്ലായ്മ
രാത്രിയിൽ കുറഞ്ഞത് ഏഴ് മണിക്കൂർ ഉറക്കം ലഭിക്കാതിരിക്കുന്നത് രക്തസമ്മർദ്ദത്തെ ദോഷകരമായി ബാധിക്കും. ഉറക്കക്കുറവ് ശരീരത്തിലെ സ്ട്രെസ് ഹോർമോണായ കോർട്ടിസോളിന്റെ അളവ് വർദ്ധിപ്പിക്കുകയും ഹൃദയമിടിപ്പ് നിയന്ത്രിക്കുന്ന നാഡീവ്യവസ്ഥയെ അമിതമായി ഉത്തേജിപ്പിക്കുകയും ചെയ്യുന്നു. ഇത് കാലക്രമേണ ഉയർന്ന രക്തസമ്മർദ്ദത്തിലേക്ക് നയിക്കും.
- വിട്ടുമാറാത്ത മാനസിക സമ്മർദ്ദം
ജോലി സംബന്ധമായതോ വ്യക്തിപരമായതോ ആയ പ്രശ്നങ്ങൾ മൂലമുള്ള മാനസിക സമ്മർദ്ദം രക്തസമ്മർദ്ദം പെട്ടെന്ന് വർദ്ധിപ്പിക്കും. സമ്മർദ്ദമുണ്ടാകുമ്പോൾ ശരീരം ഉത്പാദിപ്പിക്കുന്ന ഹോർമോണുകൾ രക്തക്കുഴലുകളെ സങ്കോചിപ്പിക്കുന്നു. ഇത് രക്തസമ്മർദ്ദം ക്രമാതീതമായി ഉയരാൻ കാരണമാകുന്നു.
- രാത്രി വൈകിയുള്ള ഭക്ഷണം
രാത്രി വൈകി ഭക്ഷണം കഴിക്കുന്നത് ശരീരത്തിന്റെ ഉറക്ക-ഉണർവ് ചക്രത്തെ തകരാറിലാക്കും. ഇത് വൃക്കകൾ സോഡിയം പുറന്തള്ളുന്ന പ്രക്രിയയെയും ഇൻസുലിൻ സെൻസിറ്റിവിറ്റിയെയും ബാധിക്കുന്നു. രാത്രി വൈകി കൂടുതൽ കലോറി അടങ്ങിയ ഭക്ഷണം കഴിക്കുന്നവർക്ക് ഉയർന്ന രക്തസമ്മർദ്ദം ഉണ്ടാകാനുള്ള സാധ്യത കൂടുതലാണെന്ന് പഠനങ്ങൾ സൂചിപ്പിക്കുന്നു.
- കുടവയർ അഥവാ വിസറൽ ഫാറ്റ്
ശരീരഭാരത്തേക്കാൾ ഉപരിയായി വയറിന് ചുറ്റും കൊഴുപ്പ് അടിയുന്നത് രക്തസമ്മർദ്ദവുമായി നേരിട്ട് ബന്ധപ്പെട്ടിരിക്കുന്നു. വയറിലെ ആന്തരിക അവയവങ്ങൾക്ക് ചുറ്റും അടിയുന്ന ഈ കൊഴുപ്പ് രക്തക്കുഴലുകളിൽ വീക്കം ഉണ്ടാക്കുകയും രക്തസമ്മർദ്ദം നിയന്ത്രിക്കുന്ന എൻസൈമുകളുടെ പ്രവർത്തനത്തെ തടസ്സപ്പെടുത്തുകയും ചെയ്യുന്നു.
- അമിതമായ കഫീൻ ഉപയോഗം
കാപ്പിയിലോ ചായയിലോ അടങ്ങിയിരിക്കുന്ന കഫീൻ രക്തസമ്മർദ്ദം പെട്ടെന്ന് വർദ്ധിപ്പിക്കാൻ കഴിവുള്ള ഒന്നാണ്. പ്രത്യേകിച്ച് രാത്രി വൈകി കഫീൻ ഉപയോഗിക്കുന്നത് ഉറക്കത്തെ തടസ്സപ്പെടുത്തുകയും അതുവഴി രക്തസമ്മർദ്ദം ഉയർത്തുകയും ചെയ്യുന്നു.
എങ്ങനെ പ്രതിരോധിക്കാം?
നമ്മുടെ ജീവിതശൈലിയിൽ ചെറിയ മാറ്റങ്ങൾ വരുത്തിയാൽ ഹൈപ്പർടെൻഷൻ തടയാനാകും. കൃത്യസമയത്തുള്ള ഉറക്കം, ശരിയായ വ്യായാമം, ആരോഗ്യകരമായ ഭക്ഷണക്രമം, മനസ്സിനെ ശാന്തമാക്കാനുള്ള വഴികൾ എന്നിവ ശീലമാക്കുന്നത് രക്തസമ്മർദ്ദം നിയന്ത്രിക്കാൻ സഹായിക്കും.
