കൺപോളകളിൽ അധികമുള്ള തൊലിയും കൊഴുപ്പും നീക്കം ചെയ്താൽ കണ്ണുകൾ മനോഹരമാകും. കൺപോളകൾ തൂങ്ങുന്നത് ഒഴിവാക്കാനും ചുളിവുകൾ നിവർത്താനും കഴിയും. ഇതിനു സഹായിക്കുന്ന ഐലിഡ് ലിഫ്റ്റ് ശസ്ത്രക്രിയയ്ക്ക് യുവാക്കൾക്കിടയിലും ഇന്ന് പ്രിയമേറുകയാണ്.
മുപ്പതുകളിലും ഇരുപതുകളുടെ അവസാനത്തിലുമുള്ള യുവാക്കൾ അവരുടെ കൺപോളകളുടെ ആകൃതി നിലനിർത്തണമെന്ന് ആഗ്രഹിക്കുന്നവരാണ്. മേക്കപ്പുകൾ ആകർഷകമായി പ്രകടിപ്പിക്കുന്നതിന് കൺപോളകളുടെ ആകൃതി പ്രധാനമാണ് എന്നതാണ് ഇതിന് കാരണം. ഇതിനായി അവരെ സഹായിക്കുന്നത് ‘ബ്ലെഫറോപ്ലാസ്റ്റി’ എന്ന ഐലിഡ് ലിഫ്റ്റ് (Eyelid Lift) ശസ്ത്രക്രിയയാണ്.
ഡിജിറ്റൽ രംഗത്ത് പ്രവർത്തിക്കുന്ന അവതാരകർ, മോഡലുകൾ, സോഷ്യൽ മീഡിയ ഇൻഫ്ലുവൻസർമാർ തുടങ്ങിയവർക്ക് മുഖത്തിന്റെയും കണ്ണുകളുടേയും ആകൃതി പ്രധാനമാണ്. സെൽഫികൾ, സൂം മീറ്റിംഗുകൾ, വീഡിയോ ഉള്ളടക്കങ്ങൾ എന്നിവ നിത്യജീവിതത്തിന്റെ ഭാഗമായതോടെയാണ് തങ്ങളുടെ മുഖം സ്ക്രീനിൽ എങ്ങനെയിരിക്കുന്നു എന്നത് യുവാക്കൾക്ക് പ്രധാനമായത്.
ഫില്ലറുകൾ (Fillers) അല്ലെങ്കിൽ ബോട്ടോക്സ് (Botox) പോലുള്ള താത്കാലിക മാറ്റത്തിന് പകരം കൂടുതൽ കാലം നിലനിൽക്കുന്ന സ്വാഭാവിക ഫലം ബ്ലെഫറോപ്ലാസ്റ്റിയിലൂടെ ലഭിക്കുന്നു. ശസ്ത്രക്രിയ കഴിഞ്ഞാൽ 6 മാസം മുതൽ 12 മാസം വരെ നീണ്ടുനിൽക്കുന്ന റിസൾട്ട് ലഭിക്കുമെന്നാണ് റിപ്പോർട്ടുകൾ പറയുന്നത്.
