പുകവലി ശ്വാസകോശത്തെ മാത്രമേ ബാധിക്കൂ എന്ന ധാരണ തിരുത്തേണ്ട സമയമായിരിക്കുന്നു. ശ്വാസകോശ അർബുദത്തെക്കുറിച്ചും ചുമയെക്കുറിച്ചുമൊക്കെ നാം വാചാലരാകാറുണ്ടെങ്കിലും, പുകയില ഹൃദയത്തിന് ഏൽപ്പിക്കുന്ന ആഘാതം പലപ്പോഴും തിരിച്ചറിയപ്പെടാതെ പോകുന്നു. പുകയിലയിലെ നികോട്ടിനും കാർബൺ മോണോക്സൈഡും രക്തക്കുഴലുകളെ നശിപ്പിക്കുകയും ഹൃദയമിടിപ്പിനെ തകിടം മറിക്കുകയും ചെയ്യുന്നു.
പുകവലിക്കുന്ന ഒരാളിൽ ഹൃദയാഘാതം, പക്ഷാഘാതം എന്നിവയ്ക്കുള്ള സാധ്യത മറ്റുള്ളവരേക്കാൾ കൂടുതലാണ്. ഹൃദയത്തിന്റെ ആരോഗ്യം മോശമാകുന്നു എന്നതിന്റെ ഏഴ് പ്രാരംഭ ലക്ഷണങ്ങൾ അറിയാം.
- ചെറിയ അധ്വാനത്തിന് പോലും ശ്വാസംമുട്ടൽ
പടികൾ കയറുമ്പോഴോ ചെറിയ ദൂരം നടക്കുമ്പോഴോ അമിതമായി ശ്വാസംമുട്ടൽ അനുഭവപ്പെടുന്നുണ്ടെങ്കിൽ അത് ഹൃദയത്തിന്റെ ബലക്കുറവിനെ സൂചിപ്പിക്കുന്നു. പുകവലിക്കുമ്പോൾ രക്തത്തിലെ ഓക്സിജന്റെ അളവ് കുറയുന്നതാണ് ഇതിന് കാരണം.
- നെഞ്ചിലെ അസ്വസ്ഥത
നെഞ്ചിൽ അനുഭവപ്പെടുന്ന ഭാരം, വലിമുറുക്കം അല്ലെങ്കിൽ നേരിയ വേദന എന്നിവ നിസ്സാരമായി കാണരുത്. രക്തധമനികളിൽ കൊഴുപ്പ് അടിഞ്ഞുകൂടി ഹൃദയത്തിലേക്കുള്ള രക്തപ്രവാഹം കുറയുന്നതിന്റെ ലക്ഷണമാകാം ഇത്.
- വിശ്രമിക്കുമ്പോഴും വർദ്ധിച്ച ഹൃദയമിടിപ്പ്
നിങ്ങൾ വെറുതെ ഇരിക്കുമ്പോൾ പോലും ഹൃദയം അസാധാരണമാംവിധം വേഗത്തിൽ ഇടുിക്കുന്നുണ്ടെങ്കിൽ സൂക്ഷിക്കണം. പുകവലിയിലെ നികോട്ടിൻ രക്തസമ്മർദ്ദവും ഹൃദയമിടിപ്പും പെട്ടെന്ന് വർദ്ധിപ്പിക്കുന്നു. ഇത് ദീർഘകാലാടിസ്ഥാനത്തിൽ ഹൃദയതാളം തെറ്റാൻ കാരണമാകും.
- കൈകാലുകളിൽ അനുഭവപ്പെടുന്ന തണുപ്പ്
രക്തക്കുഴലുകൾ ചുരുങ്ങുന്നത് മൂലം കൈകളിലേക്കും കാലുകളിലേക്കുമുള്ള രക്തസഞ്ചാരം കുറയാം. കാലാവസ്ഥ തണുപ്പുള്ളതല്ലെങ്കിൽ പോലും കൈവിരലുകളിലും കാൽവിരലുകളിലും തണുപ്പും തരിപ്പും അനുഭവപ്പെടുന്നത് രക്തചംക്രമണത്തിലെ തകരാറിനെ സൂചിപ്പിക്കുന്നു.
- കാലിലെ വീക്കം
കാലുകളിലോ ഉപ്പൂറ്റിയിലോ നീരുണ്ടാകുന്നത് ഹൃദയം ശരിയായി രക്തം പമ്പ് ചെയ്യാത്തതിന്റെ ലക്ഷണമാകാം. പുകവലിക്കാരിലെ ഇത്തരം വീക്കം ഒട്ടും അവഗണിക്കരുത്.
- മാറാത്ത തളർച്ച
ആവശ്യത്തിന് വിശ്രമിച്ചാലും വിട്ടുമാറാത്ത ക്ഷീണം അനുഭവപ്പെടുന്നത് ഹൃദയത്തിന്റെ തകരാർ മൂലമാകാം. ശരീരകലകളിലേക്ക് ആവശ്യത്തിന് ഓക്സിജൻ എത്താതിരിക്കുമ്പോഴാണ് ശരീരം പെട്ടെന്ന് തളരുന്നത്.
- പുരുഷന്മാരിലെ ലൈംഗിക ബലഹീനത
ഇത് കേവലം ഒരു ലൈംഗിക പ്രശ്നമല്ല, മറിച്ച് ഹൃദയാരോഗ്യത്തിന്റെ ഒരു മുന്നറിയിപ്പാണ്. ഹൃദയസംബന്ധമായ ലക്ഷണങ്ങൾ പുറത്തുവരുന്നതിന് വർഷങ്ങൾക്ക് മുമ്പ് തന്നെ രക്തധമനികളിലെ തകരാർ മൂലം ഇത്തരം പ്രശ്നങ്ങൾ കണ്ടുതുടങ്ങാം.
പുകവലി ഉപേക്ഷിക്കുന്ന നിമിഷം മുതൽ നിങ്ങളുടെ ഹൃദയം സുഖപ്പെട്ടു തുടങ്ങും. 24 മണിക്കൂറിനുള്ളിൽ തന്നെ ഹൃദയാഘാത സാധ്യത കുറയാൻ തുടങ്ങുന്നു. മുകളിൽ പറഞ്ഞ ലക്ഷണങ്ങൾ കാണുന്നവർ ഉടൻ തന്നെ ഒരു ഡോക്ടറെ കണ്ട് വിദഗ്ധ പരിശോധന നടത്തേണ്ടതാണ്.
