ദഹനത്തിന്റെ കാര്യമെടുത്താൽ ചോറിനും ചപ്പാത്തിക്കും അതിന്റേതായ പ്രത്യേകതകളുണ്ട്. പോഷകാഹാര വിദഗ്ധ പൂജ മഖിജയുടെ അഭിപ്രായത്തിൽ, വെള്ള അരിയുടെ ചോറ് ദഹിക്കാൻ വളരെ എളുപ്പമാണ്. തവിട് നീക്കം ചെയ്യുന്നതിനാൽ ഇതിൽ നാരുകൾ കുറവാണ്, ഇത് ആമാശയത്തിന് അമിത ജോലി നൽകുന്നില്ല. അസിഡിറ്റി, വയർ വീർക്കുന്ന അസ്വസ്ഥത എന്നിവയുള്ളവർക്ക് ചോറ് കഴിക്കുന്നതാണ് കൂടുതൽ ആശ്വാസം നൽകുക.
അതേസമയം, ഗോതമ്പ് ചപ്പാത്തിയിൽ ധാരാളം നാരുകൾ അടങ്ങിയിട്ടുണ്ട്. ഇത് ദഹനപ്രക്രിയയെ സാവധാനത്തിലാക്കുന്നു. നാരുകൾ കുടലിന്റെ ആരോഗ്യത്തിന് നല്ലതാണെങ്കിലും, ദഹിക്കാൻ കൂടുതൽ സമയമെടുക്കുന്നതിനാൽ ചിലർക്ക് ചപ്പാത്തി കഴിച്ചാൽ വയറിന് ഭാരം അനുഭവപ്പെടാൻ സാധ്യതയുണ്ട്.
അമിതഭാരം കുറയ്ക്കാൻ ഏതാണ് നല്ലത്?
ചോറ് കഴിച്ചാൽ വണ്ണം കൂടുമെന്നത് ഒരു പൊതുവായ തെറ്റിദ്ധാരണയാണ്. വാസ്തവത്തിൽ, അമിതഭാരം കൂടുന്നത് ചോറോ ചപ്പാത്തിയോ കഴിക്കുന്നത് കൊണ്ട് മാത്രമല്ല, മറിച്ച് നമ്മൾ കഴിക്കുന്ന മൊത്തം കാലറിയെയും ഭക്ഷണത്തിന്റെ അളവിനെയും ആശ്രയിച്ചാണ്. ചപ്പാത്തി കഴിക്കുമ്പോൾ അതിലെ ഫൈബർ സാന്നിധ്യം കാരണം പെട്ടെന്ന് വിശപ്പ് അനുഭവപ്പെടില്ല. ഇത് ഇടയ്ക്കിടെയുള്ള ഭക്ഷണം കഴിക്കൽ ഒഴിവാക്കാൻ സഹായിക്കും. എന്നാൽ ചോറ് പെട്ടെന്ന് ദഹിക്കുമെങ്കിലും അത് കഴിക്കുന്ന അളവ് നിയന്ത്രിക്കുകയാണെങ്കിൽ ഭാരം കുറയ്ക്കാൻ തടസ്സമാകില്ല.
ശ്രദ്ധിക്കേണ്ട കാര്യങ്ങൾ
ചോറിനേക്കാൾ പ്രോട്ടീനും ഫൈബറും അല്പം കൂടുതൽ ചപ്പാത്തിയിലാണ്. എന്നാൽ അരി വിഭവങ്ങൾ ഗ്ലൂറ്റൻ ഫ്രീ ആണെന്ന ഗുണവുമുണ്ട്. ചോറോ ചപ്പാത്തിയോ ഏതായാലും കൂടെ ധാരാളം പച്ചക്കറികളും പ്രോട്ടീൻ അടങ്ങിയ ഭക്ഷണങ്ങളും (പരിപ്പ്, പയർ വർഗ്ഗങ്ങൾ, മീൻ തുടങ്ങിയവ) ഉൾപ്പെടുത്താൻ ശ്രദ്ധിക്കുക. രാത്രി വൈകി ഭക്ഷണം കഴിക്കുന്ന ശീലമുണ്ടെങ്കിൽ ദഹിക്കാൻ എളുപ്പമുള്ള ചോറ് തിരഞ്ഞെടുക്കുന്നതാണ് നല്ലത്.
ചോറും ചപ്പാത്തിയും ആരോഗ്യകരമായ ഭക്ഷണങ്ങളാണ്. നിങ്ങളുടെ ശരീരപ്രകൃതിക്കും ദഹനശേഷിക്കും അനുയോജ്യമായത് ഏതാണോ അത് തിരഞ്ഞെടുക്കാം. പ്രമേഹരോഗികൾ ചോറ് കഴിക്കുമ്പോൾ അളവ് പരിമിതപ്പെടുത്തുന്നതും ചപ്പാത്തിക്കൊപ്പം ധാരാളം കറികൾ ഉൾപ്പെടുത്തുന്നതും ഉചിതമായിരിക്കും. കൃത്യമായ അളവിൽ കഴിക്കുക എന്നതാണ് ആരോഗ്യകരമായ ജീവിതശൈലിയുടെ രഹസ്യം.
