പ്രതിരോധശേഷി വർധിപ്പിക്കുന്ന രണ്ടു പാനീയങ്ങളാണ് ഓറഞ്ച് ജ്യൂസും നാരങ്ങ വെള്ളവും. രണ്ടിലും വിറ്റാമിൻ സി ധാരാളമായി അടങ്ങിയിട്ടുണ്ട്. ഇവ രണ്ടും പലർക്കും ഇഷ്ടമാണ്. മാത്രമല്ല, അവ വീട്ടിൽ തന്നെ എളുപ്പത്തിൽ ഉണ്ടാക്കാം. രണ്ടും ആരോഗ്യകരമാണെങ്കിലും, പ്രതിരോധശേഷി വർധിപ്പിക്കുന്നതിന് ഓറഞ്ച് ജ്യൂസ് ആണോ അതോ നാരങ്ങ വെള്ളമാണോ നല്ലതെന്ന കാര്യത്തിൽ പലരും ആശയക്കുഴപ്പത്തിലാകാറുണ്ട്. അങ്ങനെയെങ്കിൽ നാലു ഘടകങ്ങളെ അടിസ്ഥാനമാക്കി ഇവയിലേതാണ് നല്ലതെന്ന് നോക്കാം.
- വിറ്റാമിൻ സി
രോഗപ്രതിരോധ ശേഷി ശക്തമായി നിലനിർത്തുന്നതിൽ വിറ്റാമിൻ സി വളരെ പ്രധാന പങ്ക് വഹിക്കുന്നുണ്ട്. ഓറഞ്ചും നാരങ്ങയും ഇവയുടെ മികച്ച ഉറവിടങ്ങളാണെങ്കിലും അളവ് വ്യത്യസ്തമാണ്. യുണൈറ്റഡ് സ്റ്റേറ്റ്സ് ഡിപ്പാർട്ട്മെന്റ് ഓഫ് അഗ്രികൾച്ചർ (യുഎസ്ഡിഎ) പ്രകാരം, ഒരു ഗ്ലാസ് ഓറഞ്ച് ജ്യൂസിൽ (ഏകദേശം 240 മില്ലി) ഏകദേശം 90 മില്ലിഗ്രാം വിറ്റാമിൻ സി അടങ്ങിയിട്ടുണ്ട്, ഇത് മിക്ക മുതിർന്നവരുടെയും ദൈനംദിന ആവശ്യകത നിറവേറ്റാൻ പര്യാപ്തമാണ്. ഒരു നാരങ്ങയിൽ ഏകദേശം 30-40 മില്ലിഗ്രാം വിറ്റാമിൻ സി അടങ്ങിയിട്ടുണ്ടെന്ന് ഗവേഷണങ്ങൾ കാണിക്കുന്നു. അങ്ങനെയെങ്കിൽ നാരങ്ങ വെള്ളത്തെക്കാൾ ഓറഞ്ച് ജ്യൂസിൽ കൂടുതൽ വിറ്റാമിൻ സി അടങ്ങിയിട്ടുണ്ട്.
- ആന്റിഓക്സിഡന്റുകളും പ്രതിരോധശേഷിയും
ഓറഞ്ച് ജ്യൂസിൽ ഫ്ലേവനോയ്ഡുകൾ ധാരാളം അടങ്ങിയിട്ടുണ്ട്. ഫ്രീ റാഡിക്കലുകളെ ചെറുക്കുകയും വീക്കം കുറയ്ക്കുകയും ചെയ്യുന്ന ആന്റിഓക്സിഡന്റുകളുണ്ട്. അതുവഴി ശരീരത്തെ കേടുപാടുകളിൽ നിന്ന് സംരക്ഷിക്കുകയും രോഗപ്രതിരോധ ശേഷി വർധിപ്പിക്കുകയും ചെയ്യുന്നു. നാരങ്ങയിൽ പോളിഫെനോളുകൾ അടങ്ങിയിട്ടുണ്ട്. ഇത് പ്രതിരോധശേഷി വർധിപ്പിക്കുകയും അണുബാധകളെ അകറ്റി നിർത്താൻ സഹായിക്കുകയും ചെയ്യുന്നു. എന്നാൽ, ഓറഞ്ച് കൂടുതൽ ആന്റിഓക്സിഡന്റ് ഗുണങ്ങൾ നൽകുന്നു.
- ദഹന ഗുണങ്ങൾ
നാരങ്ങ വെള്ളം ദഹനത്തെ ഉത്തേജിപ്പിക്കാനും, വിഷവസ്തുക്കളെ പുറന്തള്ളാനും, കുടലിന്റെ ആരോഗ്യം നിലനിർത്താനും സഹായിക്കുന്നു. ഓറഞ്ച് ജ്യൂസ് ജലാംശം നൽകുന്നതാണ്, പക്ഷേ വലിയ അളവിൽ കഴിച്ചാൽ രക്തത്തിലെ പഞ്ചസാരയുടെ അളവ് വർധിപ്പിക്കും. ഓറഞ്ച് ജ്യൂസിന്റെ ഗുണങ്ങൾ പരമാവധി നേടാൻ, പഞ്ചസാര ചേർക്കാതെ മിതമായ അളവിൽ കുടിക്കുന്നത് പരിഗണിക്കുക. ദഹനപ്രക്രിയയ്ക്ക് നല്ലത് നാരങ്ങ വെള്ളമായിരിക്കാം. അതേസമയം ഓറഞ്ച് ജ്യൂസ് പ്രതിരോധശേഷി വർധിപ്പിക്കുന്നതിന് ഗുണം ചെയ്യും.
- പഞ്ചസാരയുടെ അളവും ദൈനംദിന ഉപഭോഗവും
ഓറഞ്ച് ജ്യൂസിൽ സ്വാഭാവികമായും കൂടുതൽ പഞ്ചസാര അടങ്ങിയിട്ടുണ്ട് (240 മില്ലിക്ക് ഏകദേശം 21 ഗ്രാം), ഇത് ഊർജം വർദ്ധിപ്പിക്കും. പക്ഷേ എല്ലാവർക്കും, പ്രത്യേകിച്ച് രക്തത്തിലെ പഞ്ചസാരയുടെ അളവ് നിരീക്ഷിക്കുന്നവർക്ക് നല്ലതല്ല. നാരങ്ങ വെള്ളത്തിൽ പഞ്ചസാര വളരെ കുറവാണ്. പ്രതിരോധശേഷി വർധിപ്പിക്കാൻ എളുപ്പവഴി തേടുന്നവർക്ക് ഇതൊരു മികച്ച ഓപ്ഷനാണ്.
