കാൻസർ, ഹൃദ്രോഗം തുടങ്ങിയ വിട്ടുമാറാത്ത രോഗങ്ങളാൽ മരിക്കുന്നവരുടെ എണ്ണം വർധിച്ച രാജ്യങ്ങളുടെ പട്ടികയിൽ ഇന്ത്യയും ഉൾപ്പെടുന്നുവെന്ന് ലാൻസെറ്റ് പഠനം. ദി ലാൻസെറ്റ് ജേർണലിലാണ് പഠനം പ്രസിദ്ധീകരിച്ചത്. ഇന്ത്യയിൽ പുരുഷന്മാരെ അപേക്ഷിച്ച് സ്ത്രീകളിലാണ് അപകടസാധ്യത കൂടുതലെന്ന് യുകെയിലെ ഇംപീരിയൽ കോളേജ് ലണ്ടനിലെ ഗവേഷകർ പറഞ്ഞു.
ഇന്ത്യയിൽ വിട്ടുമാറാത്ത രോഗങ്ങൾ മൂലമുള്ള മരണങ്ങൾ വർധിച്ചിട്ടുണ്ട്. ഇവയിൽതന്നെ ഹൃദ്രോഗവും പ്രമേഹവും ആണ് മുന്നിലെന്ന് ഗവേഷകർ പറഞ്ഞു. 185 രാജ്യങ്ങളിലെ കണക്കുകളാണ് ഗവേഷകർ പരിശോധിച്ചത്. ലോകാരോഗ്യ സംഘടനയിലെ ഗവേഷകർ ഉൾപ്പെടെയുള്ളവരുമായി ഗവേഷകർ സംസാരിച്ചു.
“2010 മുതൽ 2019 വരെ, ജനനം മുതൽ 80 വയസിനിടയിൽ എൻ‌സി‌ഡി (പകർച്ചവ്യാധിയില്ലാത്ത രോഗം) മൂലം മരിക്കാനുള്ള സാധ്യത 185 രാജ്യങ്ങളിൽ സ്ത്രീകളിൽ 152 (82 ശതമാനം), പുരുഷന്മാരിൽ 147 (79 ശതമാനം) എന്ന നിരക്കിൽ കുറഞ്ഞു. ശേഷിക്കുന്ന 33 (18 ശതമാനം) രാജ്യങ്ങളിൽ പുരുഷന്മാരെ അപേക്ഷിച്ച് സ്ത്രീകളിൽ 38 (21 ശതമാനം) ആയി വർധിച്ചു,” ഗവേഷക സംഘം വ്യക്തമാക്കി.
“ചൈന, ഈജിപ്ത്, നൈജീരിയ, റഷ്യ, ബ്രസീൽ എന്നീ രാജ്യങ്ങളിൽ സാംക്രമികേതര രോഗങ്ങളിൽ നിന്നുള്ള മരണനിരക്ക് പുരുഷന്മാരിലും സ്ത്രീകളിലും കുറഞ്ഞു. അതേസമയം ഇന്ത്യയിലും പാപുവ ന്യൂ ഗിനിയയിലും രണ്ടു ലിംഗക്കാരിലും വർധിച്ചു,” അവർ പറഞ്ഞു. മിക്ക രാജ്യങ്ങളിലും, ഹൃദയാഘാതം, പക്ഷാഘാതം എന്നിവയുൾപ്പെടെ കാൻസർ, ഹൃദ്രോഗം എന്നിവ മൂലമുള്ള മരണങ്ങൾ കുറഞ്ഞിട്ടുണ്ട്. വിട്ടുമാറാത്ത രോഗങ്ങളിൽ നിന്നുള്ള മരണനിരക്ക് കുറയുന്നതിന് ഇത് കാരണമാണെന്ന് ഗവേഷകർ പറഞ്ഞു. എന്നിരുന്നാലും, ഡിമെൻഷ്യ, ന്യൂറോ സൈക്യാട്രിക് അവസ്ഥകൾ, പാൻക്രിയാസിലെയും കരളിലെയും അർബുദങ്ങൾ എന്നിവ മൂലമുള്ള മരണങ്ങൾ വർധിച്ചുവെന്ന് അവർ പറഞ്ഞു.
ദേശീയ തലത്തിൽ, വിട്ടുമാറാത്ത രോഗാവസ്ഥകളുമായി ബന്ധപ്പെട്ട മരണനിരക്കിലെ മാറ്റങ്ങൾ ട്രാക്ക് ചെയ്യുന്ന ആദ്യത്തെ ആഗോള വിശകലനമാണിതെന്ന് ഗവേഷകർ പറഞ്ഞു. 2030 ആകുമ്പോഴേക്കും വിട്ടുമാറാത്ത രോഗാവസ്ഥകൾ മൂലമുള്ള മരണനിരക്ക് മൂന്നിലൊന്നായി കുറയ്ക്കുക എന്ന ഐക്യരാഷ്ട്രസഭയുടെ ലക്ഷ്യം ഉൾപ്പെടെ, വിട്ടുമാറാത്ത രോഗങ്ങളുടെ ചികിത്സ മെച്ചപ്പെടുത്താനുള്ള നടപടികൾ സ്വീകരിക്കാൻ രാജ്യങ്ങളും പദ്ധതിയിടുന്നുവെന്ന് ഗവേഷക സംഘം വ്യക്തമാക്കി.
