മനുഷ്യ ശരീരത്തിലെ ഏറ്റവും വലിയ അവയവമാണ് കരൾ. ദഹനനാളത്തിലൂടെ വരുന്ന രക്തം അരിച്ച് മാലിന്യങ്ങൾ നീക്കം ചെയ്ത് ശരീരത്തിൻ്റെ മറ്റ് ഭാഗങ്ങളിലേക്ക് എത്തിക്കുന്നതാണ് കരളിന്റെ പ്രധാന ജോലി. ശരീരത്തിലെ വിഷവസ്തുക്കളെ പുറംതള്ളുന്നതിനായി കരളിന്റെ പ്രവർത്തനം ആരോഗ്യകരമായിരിക്കണം.
കരളിന്റെ ആരോഗ്യം നിലനിർത്താൻ സമീകൃതാഹാരം കഴിക്കുക, കൊഴുപ്പ്, പഞ്ചസാര, ഉപ്പ് എന്നിവയുടെ ഉപയോഗം കുറയ്ക്കുക, പതിവായി വ്യായാമം ചെയ്യുക, ധാരാളം വെള്ളം കുടിക്കുക, അമിതമായ മദ്യപാനം ഒഴിവാക്കുക, ആരോഗ്യകരമായ ഭാരം നിലനിർത്തുക, പതിവായി വൈദ്യപരിശോധന നടത്തുക എന്നിവയാണ് പ്രധാന മാർഗങ്ങൾ. കരളിന്റെ ആരോഗ്യം നിലനിർത്തുന്നതിന് കഴിക്കേണ്ട ചില ഭക്ഷണങ്ങളുണ്ട്. കരളിന് ഗുണകരമായ ഭക്ഷണങ്ങളിൽ ഇലക്കറികൾ, ബെറികൾ, കൊഴുപ്പുള്ള മത്സ്യം, നട്സ്, വെളുത്തുള്ളി എന്നിവ ഉൾപ്പെടുന്നു.
ഓട്സ്
രക്തത്തിലെ കൊളസ്ട്രോളിൻ്റെയും ട്രൈഗ്ലിസറൈഡിൻ്റെയും അളവ് കുറയ്ക്കാൻ സഹായിക്കുന്ന ധാരാളം നാരുകൾ ഓട്സിൽ അടങ്ങിയിട്ടുണ്ട്. ഇത് ശരീരഭാര നിയന്ത്രണത്തിന് സഹായിക്കുന്നു. കൂടാതെ ടൈപ്പ് 2 പ്രമേഹം തടഞ്ഞ് ഫാറ്റി ലിവറിൻ്റെ സാധ്യതകൾ ഇല്ലാതാക്കുന്നു.
സിട്രസ് പഴങ്ങൾ
വിറ്റാമിൻ സിയും ആൻ്റിഓക്‌സിഡൻ്റുകളുമടങ്ങിയ മുന്തിരി, ഓറഞ്ച്, നാരങ്ങ തുടങ്ങിയ പഴങ്ങൾക്ക് കരളിനെ ശുദ്ധീകരിക്കാനുള്ള സ്വാഭാവിക കഴിവുണ്ട്. അവ ശരീരത്തിൽ നിന്ന് കാർസിനോജനുകളും മറ്റ് വിഷവസ്തുക്കളും നീക്കം ചെയ്യാൻ സഹായിക്കുന്ന എൻസൈമുകളുടെ അളവ് വർദ്ധിപ്പിക്കുന്നു.
വെളുത്തുള്ളി
അല്ലിസിൻ, സെലിനിയം എന്നറിയപ്പെടുന്ന രണ്ട് പ്രകൃതിദത്ത എൻസൈമുകളാൽ സമ്പന്നമാണ് വെളുത്തുള്ളി. ശരീരത്തിലെ വിഷവസ്തുക്കളെ നീക്കം ചെയ്യാൻ സഹായിക്കുന്ന എൻസൈമുകളെ സജീവമാക്കുന്നതിനുള്ള മികച്ച ഭക്ഷ്യ വസ്തുവാണിത്.
ബ്രോക്കോളി
നാരുകൾ, വിറ്റാമിൻ എ, വിറ്റാമിൻ ബി1, വിറ്റാമിൻ ബി6, വിറ്റാമിൻ ഇ, മാംഗനീസ്, ഫോസ്ഫറസ്, കോളിൻ, പൊട്ടാസ്യം, കോപ്പർ, മഗ്നീഷ്യം, ഒമേഗ-3 ഫാറ്റി ആസിഡുകൾ, പ്രോട്ടീൻ, സിങ്ക്, കാൽസ്യം, ഇരുമ്പ്, നിയാസിൻ, സെലിനിയം എന്നിവയാൽ സമ്പന്നമാണ് ബ്രോക്കോളി. കരളിലെ ക്യാൻസർ വളർച്ചയെ സംരക്ഷിക്കാൻ ഇത് സഹായിച്ചേക്കുമെന്ന് ചില പഠനങ്ങൾ പറയുന്നു.
കാപ്പി
മിതമായ അളവിൽ കാപ്പിയുടെ കുടിക്കുന്നത് ക്യാൻസർ, ഫൈബ്രോസിസ്, സിറോസിസ്, എന്നിങ്ങനെയുള്ള രോഗങ്ങളുടെ സാധ്യതകൾ കുറയ്ക്കുമെന്ന് ഗവേഷണങ്ങൾ പറയുന്നു. ലിവർ സിറോസിസിൻ്റെ സാധ്യത 44 ശതമാനം കുറയും എന്നും ഈ പഠനങ്ങളിൽ സൂചിപ്പിക്കുന്നു.
മഞ്ഞൾപ്പൊടി
കരളിൻ്റെ ആരോഗ്യത്തിന് ഏറെ ഗുണകരമായ ഒരു ചേരുവയാണിത്. ശരീരത്തിലെ വിഷാംശം നീക്കം ചെയ്യുന്ന എൻസൈമുകളെ സഹായിക്കുന്നു. ഇത് പിത്തസഞ്ചിയുടെ ആരോഗ്യം നിലനിർത്തുന്നു.
നട്സ്
വളരെ കട്ടിയുള്ള പുറന്തോടോടു കൂടിയവ, മരങ്ങളിൽ ഉണ്ടാകുന്നവ, എന്നീ വിഭാഗങ്ങളിൽ പെടുന്ന നട്സ് കരളിന് ഗുണം ചെയ്യും. ഒമേഗ 3 ഫാറ്റി ആസിഡുകളുടെ സമ്പന്നമായ ഉറവിടമാണിവ.
ആപ്പിൾ
ആപ്പിൾ ജ്യൂസ് കരളിനെ ശുദ്ധീകരിക്കാൻ സഹായിക്കും എന്ന് പഠനങ്ങൾ പറയുന്നു. അതിൽ അടങ്ങിയിരിക്കുന്ന മാലിക് ആസിഡ് പിത്ത സഞ്ചിയിലെ കല്ലുകൾ നീക്കം ചെയ്യുന്നതിന് സഹായിക്കും.
ഒലിവ് എണ്ണ
ഒമേഗ – 3, 6 ഫാറ്റി ആസിഡുകൾ, വിറ്റാമിൻ ഇ, വിറ്റാമിൻ കെ, മോണോസാച്ചുറേറ്റഡ് കൊഴുപ്പുകൾ എന്നിവയുടെ സമ്പന്നമായ ഉറവിടമായതിനാൽ ഒലിവ് ഓയിൽ വളരെ ആരോഗ്യകരമാണ്. നാരങ്ങ, ഒലിവ് ഓയിൽ എന്നിവയുടെ സംയോജനത്തിന് നിങ്ങളുടെ ശരീരത്തെ ശുദ്ധീകരിക്കാൻ സാധിക്കും.
ഇലക്കറികൾ
ഇവ പച്ചക്കോ, വേവിച്ചോ, ജ്യൂസാക്കിയോ കഴിക്കാവുന്നതാണ്. ധാരാളം ക്ലോറോഫിൽ അടങ്ങിയിരിക്കുന്നതിനാൽ കരളിൻ്റെ ആരോഗ്യം ഇവ വാഗ്ദാനം ചെയ്യുന്നു.
